ប្រភពព័ត៌មានរបស់ថៃ កាលពីថ្ងៃទី២៨ កក្កដា ផ្សាយថា សង្ឃស៊ូថេប ឬលោកស៊ូថេប ធឿកស៊ូបាន់ មេដឹកនាំក្រុមអ្នកតវ៉ាបណ្តេញលោកស្រីយីងទ្បាក់ ស៊ីណាវ៉ាត្រា អតីតនាយករដ្ឋមន្ត្រីចេញពីតំណែង និងលោកអាប់ភីស៊ីត វ៉េចាជីវា ប្រធានគណបក្សប្រជាធិបតេយ្យថៃ បានចូលតុលាការ ដើម្បីបំភ្លឺពីការប្រព្រឹត្តបទល្មើសលើច្បាប់ប្រទេស តែការសាកសួរត្រូវតុលាការពន្យារពេលវិញ រហូតដល់ថ្ងៃទី២៨ សីហា ។
របាយការណ៍បញ្ជាក់ថា លោកស៊ូថេប ធឿកស៊ូបាន់ ដែលសាងផ្នួសត្រូវបង្ហាញខ្លួនក្នុងតុលាការ ដើម្បីសាកសួរលើបទចោទប្រកាន់ចំនួន២ករណី ។ ករណីទី១ គឺរឿងក្តីរដ្ឋប្បវេណី ពីបទចូលកាន់កាប់ទីតាំងរបស់រដ្ឋាភិបាល ក្រសួងហិរញ្ញវត្ថុ និងករណីទី២ រឿងបទឧក្រិដ្ឋដែលបង្ក្រាបក្រុមបាតុករអាវក្រហម កាលពីឆ្នាំ២០១០ ។
ស្ថានការណ៍នៅក្នុងប្រទេសថៃ នាពេលបច្ចុប្បន្នកំពុងមានភាពស្ងប់ស្ងាត់ល្អ ក្រោមការដឹកនាំរបស់លោកឧត្តមសេនីយ៍ប្រាយុទ្ធ ចាន់អូចា មេទ័ពថៃ ក្រោយពេលធ្វើរដ្ឋប្រហារ កាលពីខែឧសភា កន្លងទៅ ។ ឧត្តមសេនីយ៍ប្រាយុទ្ធ មេយោធាថៃ បានដំណើរការដឹកនាំប្រទេសយ៉ាងរលូន និងបង្កើតរដ្ឋធម្មនុញ្ញបណ្តោះអាសន្នមួយ រួមទាំងសភាកំណែទម្រង់ ដើម្បីលុបបំបាត់ប្រព័ន្ធគ្រង់គ្រងប្រទេស ដែលលំអៀងលើក្រុមពណ៌អាវក្រហម និងលឿង ។ រហូតមកទល់ពេលនេះ ឧត្តមសេនីយ៍ប្រាយុទ្ធ នៅមិនទាន់កំណត់ពេលបោះឆ្នោតនៅទ្បើយ ៕
ចែករំលែកព័តមាននេះ