រាជធានីភ្នំពេញ ៖ បុរសម្នាក់ខឹងស្រីសេ្នហ៍អង្គុយលេងបៀរជាមួយអ្នកជិតខាង បានស្ទុះទៅវាយ៣ដៃចំកណ្ដាលមុខបណ្ដាលឱ្យប៉ោងមុខហើយមិនអស់ចិត្តហៅចូលក្នុងបន្ទប់កាប់មួយបុ័ងតោចំស្មាខាងឆ្វេងរយះដេរ៥ថ្នេររួចឃុំទុកក្នុងបន្ទប់បង្កឱ្យមានការភ្ញាក់ផ្អើល កាលពីវេលាម៉ោង១០ និង១០នាទីយប់ ថ្ងៃទី២៧ កក្កដា ២០១៤ នៅចំណុចផ្ទះជួលអត់លេខ មួយកន្លែង ស្ថិតក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ។
បុរសកំណាចខាងលើឈ្មោះ អឹក សំអាង អាយុ២៩ឆ្នាំ មុខរបរជាពេទ្យទាហាន ស្នាក់នៅសង្កាត់ចោមចៅ ខណ្ឌពោធិ៍សែនជ័យ ចំណែកនារីរងគ្រោះឈ្មោះ ភីន អឿន អាយុ៣០ឆ្នាំ ជាកម្មការិនីរោងចក្រកាត់ដេរ ស្នាក់នៅផ្ទះជួលកើតហេតុខាងលើ។ តាមការឱ្យដឹងពីស្ត្រីរងគ្រោះខាងលើ បានរៀបរាប់ប្រាប់សមត្ថកិច្ច និងក្រុមអ្នកយកព័ត៌មានទាំងទឹកភ្នែកហូររលីងរលោងថា មុនពេលកើតហេតុរូបគាត់ និងបុរសកំណាចខាងលើបានទាក់ទងគ្នារយៈពេល៣ខែមកហើយ តែមិនទាន់ឈានដល់ថ្នាក់ប្ដីប្រពន្ធរួមរស់នៅផ្ទះជាមួយគ្នានៅឡើយទេ។
ស្ត្រីរងគ្រោះបានឱ្យដឹងទៀតថា ជារៀងរាល់ថ្ងៃបុរសកំណាចខាងលើតែងតែមកលេងផ្ទះជួលរបស់គាត់ ហើយតែងរករឿងរូបគាត់ពីបញ្ហានេះបញ្ហានោះ ថែមទាំងបិទសិទ្ធិសេរីភាពរបស់គាត់ដោយមិនឱ្យគាត់និយាយលេងជាមួយអ្នកជិតខាង ឬទៅលេងបៀរនៅផ្ទះអ្នកជិតខាងជាដាច់ខាត បើទោះបីជាគាត់ព្យាយាមអង្វរ.កសុំកុំឱ្យបុរសកំណាចរូបនោះបិទសិទ្ធិសេរីរបស់គាត់ ក៏រូបគេមិនព្រមស្ដាប់ដែរ ។
នៅយប់កើតហេតុរូបគាត់បានទៅលេងបៀរនៅផ្ទះជួលរបស់អ្នកជិតខាង បុរសកំណាចរូបនោះបានត្រឡប់មកពីធ្វើការហើយបានមកលេងផ្ទះរបស់គាត់ដូចរាល់ដងក៏ឃើញរូបគាត់កំពុងអង្គុយលេងបៀរជាមួយអ្នកជិតខាងបែបនោះធ្វើឱ្យរូបគេខឹងយ៉ាងខ្លាំងក៏បានស្ទុះមកវាយរូបគាត់ចំកណ្ដាលមុខ៣ដៃបណ្ដាលឱ្យប៉ោងមុខហើយមិនអស់ចិត្តក៏ហៅរូបគាត់ចូលទៅក្នុងបន្ទប់រួចទាញយកកាំបិតបុ័ងតោមកកាប់រូបគាត់ចំដៃខាងឆ្វេងបណ្ដាលឱ្យរយះហូរឈាមកក្លាក់ រួចចាក់សោឃុំរូបគាត់ទុកក្នុងបន្ទប់ថែមទៀតធ្វើឱ្យគាត់ទ្រាំមិនបានក៏ស្រែកហៅអ្នកជិតខាងជួយបង្កឱ្យមានការភ្ញាក់ផ្អើលដល់សមត្ថកិច្ចចុះមកធ្វើការអន្តរាគមន៍ចាប់បុរសកំណាចខាងលើវាយខ្នោះយកទៅឃុំខ្លួន និងធ្វើការសាកសួរនៅប៉ុស្ដិ៍នគរបាលរដ្ឋបាលទឹកថ្លា ចំណែករូបគាត់ត្រូវបានប្រជាពលរដ្ឋដឹកយកទៅព្យាបាលដេររបួសដៃខាងឆ្វេងចំនួន៥ថ្នេរនៅមន្ទីរពេទ្យព្រះកុសុមៈ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ