ការសិក្សាមួយរបស់ក្រុមអ្នកស្រាវជ្រាវស៊ុយអែតបានបង្ហាញថា បណ្តាបុរសដែលចូលចិត្តទទួលទានសាច់កែច្នៃ ជាពិសេសសាច់ក្រក ឬសាច់ជ្រូកបីជាន់កែច្នៃ ប្រឈមទ្វេដងនឹងការស្លាប់ដោយជំងឺខ្សោយបេះដូងធៀបទៅនឹងបណ្តាបុរសដែលកម្រទទួលទានសាច់ប្រភេទទាំងនេះ ។
ផ្តល់ផលអាក្រក់ដូចខាងលើនេះ ក៏ព្រោះ ៖ សាច់ក្រក ឬសាច់ជ្រូកបីជាន់ដែលគេកែច្នៃទុកឱ្យបានយូរត្រូវបានបន្ថែមសារធាតុគីមីផ្សេងៗរួមនឹងអំបិលផងដែរ ដែលនាំឱ្យសម្ពាធឈាមឡើងខ្ពស់នាំទៅរកការកើតមានជំងឺខ្សោយបេះដូង ។ ការពិសោធន៍រយៈពេល១២ឆ្នាំ លើបុរសវ័យពី៤៥ឆ្នាំ ដល់៧៩ឆ្នាំប្រមាណជាង៣ម៉ឺន និង៧ពាន់នាក់ រកឃើញថា ក្រុមដែលទទួលទានប្រភេទសាច់កែច្នៃច្រើនជាង៧៥ក្រាម (ស្មើនឹងសាច់ក្រក២ដុំ ឬសាច់ជ្រូកបីជាន់ប្រឡាក់៤បន្ទះ) ក្នុងមួយថ្ងៃ ២៤ភាគរយប្រឈមនឹងការកើតជំងឺខ្សោយបេះដូង ខណៈការស្លាប់មុនអាយុដោយជំងឺផ្សេងៗមានដល់ទៅទ្វេដង ។
សាស្ត្រាចារ្យ Alicja Wolk អ្នកដឹកនាំការសិក្សាមកពីសាកលវិទ្យាល័យ Karolinska Institutet ទីក្រុងស្តុកខូល ប្រទេសស៊ុយអែតបានថ្លែងថា៖ «ការប្រើប្រាស់សាច់កែច្នៃក្នុងកម្រិតខ្ពស់អាចបង្កើនហានិភ័យខ្សោយបេះដូង ។ សាច់ក្រហមដែលគេយកទៅកែច្នៃ តាមធម្មតា គឺមានផ្ទុកសូដ្យូម ផូស្វាត នីត្រាតនិងសារធាតុបន្ថែមរសជាតិផ្សេងទៀតដែលទាំងអស់នេះជាកត្តាបង្កើនហានិភ័យជំងឺខ្សោយបេះដូង ។ ដោយឡែក សាច់មិនកែច្នៃ (សាច់ស្រស់) មិនមានផ្ទុកគ្រឿងគីមីបន្ថែមរសជាតិ ហើយជាធម្មតាគ្មានសារធាតុសូដ្យូម »។
ទោះជាយ៉ាងណា ការសិក្សាលើកនេះមិនបានរកឃើញថា បុរសដែលទទួលទានសាច់ក្រហម ប្រឈមនឹងជំងឺខ្សោយបេះដូងនោះទេ ប៉ុន្តែសម្រាប់ស្ត្រីវិញ លទ្ធផលគឺផ្ទុយគ្នាស្រឡះ ។ ស្ត្រីដែលទទួលទានសាច់ក្រហមច្រើនក្នុងវ័យពេញក្រមុំប្រឈមនឹងជំងឺមហារីកសុដន់ពេលក្រោយក្នុងជីវិត ។ ដើម្បីគេចផុតពីហានិភ័យនេះ គេគួរទទួលទានបណ្តាបន្លែ ផ្លែឈើ ត្រី ពពួកគ្រាប់ធញ្ញជាតិឱ្យបានច្រើនតាមដែលអាចធ្វើទៅបាន ៕
ចែករំលែកព័តមាននេះ