ចក្ខុវិញ្ញាណជាសរីរាង្គដ៏សំខាន់ ដែលអាចចាប់រូបភាពទាំងទ្បាយបញ្ជូនទៅកាន់ខួរក្បាលធ្វើឱ្យយើងដឹងពីរឿងរ៉ាវទាំងទ្បាយដែលកើតមាននៅជុំវិញខ្លួន តែបើភ្នែករបស់យើងមានបញ្ហាដោយប្រការណាមួយ ហើយពិតជាបានផ្តល់នូវផលវិបាកយ៉ាងធ្ងន់ធ្ងរសម្រាប់ខ្លួនអ្នកផ្ទាល់ ។
ចក្ខុវិញ្ញាណជាសរីរាង្គដ៏សំខាន់ ដែលអាចចាប់រូបភាពទាំងទ្បាយបញ្ជូនទៅកាន់ខួរក្បាលធ្វើឱ្យយើងដឹងពីរឿងរ៉ាវទាំងទ្បាយដែលកើតមាននៅជុំវិញខ្លួន តែបើភ្នែករបស់យើងមានបញ្ហាដោយប្រការណាមួយ ហើយពិតជាបានផ្តល់នូវផលវិបាកយ៉ាងធ្ងន់ធ្ងរសម្រាប់ខ្លួនអ្នកផ្ទាល់ ។
លោកវេជ្ជបណ្ឌិត ងី ម៉េង នាយកមន្ទីរពេទ្យមិត្តភាពខ្មែរ-សូវៀត និងជាប្រធានកម្មវិធីជាតិសុខភាពភ្នែកបានប្រាប់កោះសន្តិភាពថា ការថែរក្សាភ្នែកគឺត្រូវធ្វើទ្បើងតាំងពីនៅពេលដែលយើងកើតមក ហើយទារកដែលកើតមកភ្លាម អាណាព្យាបាលគប្បីពិនិត្យ និងយកចិត្តទុក្ខដាក់ទៅលើសុខភាពភ្នែករបស់កូនថា តើមានសភាពធម្មតា ឬខុសប្លែកពីលក្ខណធម្មតា ។
បើសិនជាមានអ្វីខុសប្លែកចាំបាច់ត្រូវយកកូនទៅជួបជាមួយគ្រូពេទ្យជំនាញ ដើម្បីពិនិត្យឱ្យបានទាន់ពេលវេលា ។ក្មេងទើបនឹងកើតជាពេលវេលាដែលសំខាន់បំផុតក្នុងការវិវឌ្ឍនៃគំហើញក្នុងរយៈពេល២ឆ្នាំដំបូង ។ យកចិត្តទុក្ខដាក់ទៅលើការមើលរបស់ក្មេង គឺសំខាន់បំផុតត្រូវឱ្យមានពន្លឺគ្រប់គ្រាន់នៅក្នុងកន្លែងដែលកូនលេង ។ ត្រូវឱ្យកូនអង្គុយរៀនឱ្យបានត្រឹមត្រូវ ដោយការមើលសៀវភៅក្នុងរយៈចម្ងាយមួយដែលសមស្របមិនត្រូវឱ្យក្មេងមើលជិតពេក ឬឆ្ងាយពេកនោះទេ ព្រោះអាចធ្វើឱ្យភ្នែករបស់ក្មេងមានបញ្ហាដោយការប្រឹងសម្លឹងមើលវត្ថុអ្វីមួយ ។
កុមារដែលមានអាយុចន្លោះពី៧ឆ្នាំទៅ៨ឆ្នាំ មិនត្រូវឱ្យលេងហ្គេម សម្លឹងកុំព្យូទ័រ ឬមើលទូរទស្សន៍ច្រើនពេកទេ ជួនកាលវាអាចធ្វើឱ្យក្មេងមានបញ្ហាភ្នែកមីញ៉ូប ។ ដូចនេះ ការលេង ឬរៀនតាមកុំព្យូទ័រ ត្រូវមានរយៈពេលកំណត់ ។ ចំពោះមនុស្សធំក្នុងវ័យសិក្សានៅក្នុងកន្លែងសិក្សា ក៏ត្រូវឱ្យមានពន្លឺគ្រប់គ្រាន់ដែរ ហើយការមើលត្រូវឱ្យមានរយៈចម្ងាយមួយសមរម្យ គឺពី៣ទៅ៤តឹក ហើយដើម្បីការពារពីសារជាតិគីមី ឬពន្លឺជះខ្លាំងចំភ្នែក ត្រូវមានប្រដាប់ការពារដូចជា ការពាក់វ៉ែនតា ដើម្បីកុំឱ្យជះចំភ្នែកបណ្តាលឱ្យស្រវាំង ។
រាល់ពេលដែលចេញដើរទៅណាមកណាត្រូវពាក់មួកសុវត្ថិភាពការពារភ្នែកកុំឱ្យធូលីដីចូលភ្នែក ក៏ជាការប៉ះទង្គិចក្បាលពេល កើតមានគ្រោះថ្នាក់ជាយថាហេតុណាមួយដែរ ។ ចំពោះការទទួលទានចំណីអាហារវិញ ត្រូវបរិភោគអាហារដែលសម្បូរទៅដោយវីតាមីនមានជីវជាតិជំនួយដល់ភ្នែក ដែលជាប្រភេទបន្លែពណ៌លឿង ឬបៃតងដែលសម្បូរ ដោយជាតិវីតាមីនអា ដូចជា ល្ពៅ ឬល្ហុង និងទទួលទានសាច់ត្រី ហើយទទួលទានផ្លែឈើឱ្យបានគ្រប់គ្រាន់ នេះជាវិធីដ៏សាមញ្ញមួយដែលជាជំនួយសម្រាប់សុខភាពភ្នែក ។
ចំពោះវ័យអាយុចាប់ពី៤០ឆ្នាំទ្បើងទៅ គួរទៅពិនិត្យភ្នែកឱ្យបានមួយឆ្នាំម្តង ដើម្បីពិនិត្យរកជំងឺដែលកើតមានចំពោះភ្នែកដែលមិនអាចដឹងមុន ។ រីឯចំពោះវ័យចាប់ពី៥៥ ទៅ៦០ឆ្នាំទ្បើងទៅ ត្រូវទៅពិនិត្យពី៦ខែ ទៅ៨ខែម្តង ដើម្បីការពារសុខភាពភ្នែក ព្រោះវ័យនេះច្រើនជួបប្រទះជាញឹកញាប់ពីបញ្ហាភ្នែកទ្បើងបាយ ។
រាល់ពេលត្រទ្បប់មកពីខាងក្រៅ លោកអ្នកត្រូវលាងមុខងូតទឹកសម្អាតខ្លួន ដើម្បីជួយឱ្យសុខភាពភ្នែក កាន់តែមានលក្ខណៈប្រសើរ ។ វាមិនមានការពិបាកអ្វីទេ ក្នុងការថែរក្សាភ្នែកនោះ គឺគ្រាន់តែមើលក្នុងរយៈចម្ងាយមួយឱ្យបានត្រឹមត្រូវ ពាក់វ៉ែនតាការពារ ឬមួកការពាររាល់ពេលដែលធ្វើដំណើរ ត្រូវទទួលទានចំណីអាហារដែលមានជីវជាតិឱ្យបានគ្រប់គ្រាន់ ជាពិសេសគឺអាហារដែលមានសារប្រយោជន៍សម្រាប់សុខភាពភ្នែក ៕
ចែករំលែកព័តមាននេះ