របេង គឺជាជំងឺឆ្លងដែលបង្កទ្បើងដោយមេរោគរបេងឈ្មោះ បាស៊ីដឺកុក ហៅកាត់ថាបេកា។ ជំងឺនេះមិនមែនជាប្រភេទជំងឺតំណពូជទេ ហើយវាអាចប្រហារជីវិតមនុស្សបាន បើសិនជាមិនបានព្យាបាលនោះ ។ ជួបជាមួយលោកវេជ្ជបណ្ឌិត ម៉ៅ តាន់អ៊ាន ទីប្រឹក្សាអមក្រសួងសុខាភិបាល និងជានាយកមជ្ឈមណ្ឌលជាតិកម្ចាត់រោគរបេង បានប្រាប់កោះសន្តិភាពថា ជំងឺរបេងច្រើនកើតនៅនឹងសួតហៅថា របេងសួត ។
ប៉ុន្តែសរីរាង្គផ្សេងទៀត ក៏អាចកើតជំងឺរបេងដែរហៅថា ជំងឺរបេងក្រៅសួតដូចជា របេងឆ្អឹង របេងស្រោមខួរក្បាល របេងកូនកណ្តុរ របេងស្រោមសួត និងរបេងតម្រងនាមជាដើម ។ លោកវេជ្ជបណ្ឌិតបានបន្តទៀតថា មានតែជំងឺរបេងសួតតែមួយគត់ដែលចម្លងមេរោគរបេងពីអ្នកជំងឺទៅអ្នកជា (ពីមនុស្សម្នាក់ទៅមនុស្សម្នាក់ទៀត) តាមរយៈខ្យល់ដង្ហើម ក្អក ឬកណ្តាស់ ឬក៏និយាយស្តីទល់មុខគ្នា ។ ចំណែកឯជំងឺរបេងក្រៅសួត មិនឆ្លងទៅអ្នកដទៃតាមរបៀបខាងលើនោះទេ ។ ចំពោះរោគសញ្ញាចម្លងនៃជំងឺរបេងសួតមានដូចជា ក្អកលើសពី២សប្តាហ៍ទៅ៣សប្តាហ៍(មានឬគ្មានកំហាក) និងអាចរួមផ្សំដោយការក្តៅខ្លួនស្រៀវស្រាញពេលល្ងាច បែកញើសពេលយប់ស្រក់ទម្ងន់ អស់កម្លាំង ឬឈឺទ្រូង ។
បើសិនជាលោកអ្នកសង្ស័យថា កើតមានជំងឺរបេង ត្រូវតែទៅពិនិត្យនៅមណ្ឌលសុខភាព ឬមន្ទីរពេទ្យបង្អែក ។ ការព្យាបាលជំងឺរបេងបានទាន់ពេលវេលា និងលេបថ្នាំទៀងទាត់តាមការណែនាំរបស់គ្រូពេទ្យ នឹងអាចជាសះស្បើយ ហើយការពិនិត្យកំហាក និងព្យាបាលដោយឱសថរបេង គឺឥតគិតថ្លៃនោះទេ ។ ការព្យាបាលជំងឺរបេងអាចមានរយៈពេល៦ខែ ហើយត្រូវព្យាបាលតាមការកំណត់របស់គ្រូពេទ្យ ៕
ចែករំលែកព័តមាននេះ