រាជធានីភ្នំពេញ ៖ ប្រធានគណបក្សសង្គ្រោះជាតិ លោក សម រង្ស៊ី បានមានប្រសាសន៍ថា សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) អាចនឹងត្រូវបង្ហាញឈ្មោះឲ្យដឹងនៅថ្ងៃនេះ(២៨កក្កដា) ឬ យ៉ាងយូរថ្ងៃស្អែក ។
មេបក្សប្រឆាំងថ្លែងបែបនេះ នៅក្រោយពេលលោកបង្ហាញមុខជាលើកដំបូងក្នុងសម័យប្រជុំពេញអង្គរដ្ឋសភា ដើម្បីឲ្យសមាជិកសភាគណបក្សប្រជាជនអនុម័តទទួលស្គាល់លោកជាតំណាងរាស្រ្តមណ្ឌលកំពង់ចាម ជំនួសលោក គួយ ប៊ុនរឿន នាព្រឹកថ្ងៃទី២៨ កក្កដា ២០១៤ ។
គេមិនទាន់ដឹងថាតើមន្រ្តីរូបណាជាសមាជិកទី០៩នៃគណៈកម្មាធិការជាតិរៀបចំការបោះឆ្នោតនោះនៅឡើយទេ ខណៈដែលកាលពីថ្ងៃអាទិត្យម្សិលមិញ ក្នុងឱកាសបើកសន្និបាតក្រុមប្រឹក្សាជាតិលើកដំបូងរបស់គណបក្សសង្គ្រោះជាតិ លោក សម រង្ស៊ី ក្នុងនាមមេបក្សប្រឆាំងបានស្នើទៅគណបក្សប្រជាជនកម្ពុជានូវបេក្ខភាព១០រូបចេញមកពីអង្គការសង្គមស៊ិវិលដែលមានឈ្មោះល្បី ។
ជាការកត់សម្គាល់ តំណាងអង្គការសង្គមស៊ីវិលមួយចំនួនដែលគេសង្ឃឹមថាអាចនឹងក្លាយជាសមាជិកទី០៩នៃគណៈកម្មាធិការជាតិរៀបចំការបោះឆ្នោតនោះរួមមាន ៖ លោកស្រី ពង្ស ឈីវហ្គិច , លោក ធន់ សារ៉ាយ , លោក គល់ បញ្ញា , លោក ហង្ស ពុទ្ឋា , លោក ឡៅ ម៉ុងហៅ , លោក អ៊ូ វិរៈ , លោក កែម ឡី , លោក យ៉េង វីរៈ ,លោក ព្រាប កុលជាដើម ៕
ចែករំលែកព័តមាននេះ