ដោយជំពាក់បំណុលគេច្រើន តែគ្មានលទ្ធភាពសងបាន ប្ដីប្រពន្ធមួយគូនៅប្រទេសអង់គ្លេសបានដាច់ចិត្តសម្លាប់ឪពុកម្ដាយខ្លួនឯង រួចប្រឌិតរឿងកុហកមនុស្សទាំងអស់នៅក្នុងគ្រួសារក៏ដូចជាអ្នកជិតខាង ។ សពតាយាយដែលជាជនរងគ្រោះទាំងពីរនាក់ទាល់តែ១៦ឆ្នាំក្រោយទើបរកឃើញនៅTown តំបន់ Mamsfield ។
ឧក្រិដ្ឋកម្មគួរឱ្យតក់ស្លុត
ឆ្នាំ១៩៩៨ សោកនាដកម្មគួរឱ្យតក់ស្លុតមួយបាន ធ្លាក់លើប្ដីប្រពន្ធវ័យចាស់មួយគូ ។ ទាំងលោកតាទាំងលោកយាយត្រូវសម្លាប់ដោយអ្នកដែលខ្លួនស្រឡាញ់ជាងគេ និងកំពុងរស់នៅជាមួយពួកគាត់ គឺកូនបង្កើតនិងកូនប្រសា ។ ស៊ូសាន អាយុ៥៥ឆ្នាំ និងប្ដីគ្រីស្ដូហ្វេ៊ី អេដវ៉ដ អាយុ៥៧ឆ្នាំ បានបាញ់សម្លាប់លោកតាវីល្លៀម វ៉ាយសឺឡេ ព្រមទាំងលោកយាយប៉ាទ្រីសីុយ៉ាបន្ទាប់មករុំសពទាំងពីរដោយកម្រាលគ្រែដេក ហើយយកទៅកប់នៅទីធ្លាតូចមួយក្នុងព្រៃនៅTown តំបន់Mansfield ។ ក្រោយពេលសម្លាប់ឪពុកម្ដាយបង្កើត និងឪពុកម្ដាយក្មេកហើយស៊ូសាន និងគ្រីស្ដូហ្វេ៊ីីលក់ផ្ទះចោល ព្រមទាំងលួចប្រាក់សន្សំរបស់តាយាយនៅគណនីធនាគារបាន២៤៥.០០០ផោន ។
បន្ទាប់ពីសម្លាប់ឪពុកម្ដាយរួច ស៊ូសាន និងគ្រីស្ដូហ្វេ៊ីី«ប្រឌិតរឿង»ដើម្បីឱ្យសមាជិកក្នុងគ្រួសារក៏ដូចជាអ្នកជិតខាង រួមទាំងវេជ្ជបណ្ឌិត និងធនាគារផងជឿថាប្ដីប្រពន្ធចាស់នោះនៅរស់សុខសប្បាយជាធម្មតានៅឡើយ ។ ក្នុងសំបុត្រមួយសរសេរក្នុងឆ្នាំ២០០៧ ស៊ូសាន និយាយប្រាប់មនុស្សក្នុងគ្រួសារថាខ្លួនទើបតែទទួលបានប័ណ្ណប្រៃសណីយ៍មួយរបស់ពុកម៉ែផ្ញើឱ្យពីប្រទេសអៀរឡង់ ។ ប្រហែលជាពួកគាត់ទៅអៀរឡង់ដើម្បីលំហែកាយយកខ្យល់អាកាសត្រជាក់បរិសុទ្ធនៅទីនោះ ។ ប៉ុន្តែតាមពិតប្ដីប្រពន្ធចាស់ដ៏អភ័ព្វបានស្លាប់តាំងពី៩ឆ្នាំមកហើយ ។
ឧក្រិដ្ឋជនទាំងពីរនាក់និយាយកុហកយ៉ាងបិុនប្រសប់
សពប្ដីប្រពន្ធត្រូវបានរកឃើញបន្ទាប់ពីគ្រីស្ដូហេ៊ី្វ និយាយប្រាប់សមាជិកក្នុងគ្រួសារថាខ្លួនទើបតែទទួលបានដំណឹងច្បាស់ថា លោកឪពុក និងអ្នកម្ដាយដែលទៅលំហែកាយនៅប្រទេសអៀរឡង់យ៉ាងយូរនោះ ឥឡូវពួកគាត់ស្លាប់អស់ហើយ ។ គេប្រាប់ដំណឹងនេះពេលរូបគេ និងស៊ូសានជាប្រពន្ធទៅលាក់ខ្លួននៅក្រុងលីល(Lille)ប្រទេសបារាំង មិនមែននៅអៀរឡង់ឡើយ ។ ដោយឆ្ងល់នឹងអាកប្បកិរិយាចម្លែកមនុស្សក្នុងគ្រួសារក៏រាយការណ៍ប្រាប់ប៉ូលិស ។ ឆ្លងតាមការសើុបអង្កេតយ៉ាងដិតដល់ប៉ូលិសកំណត់បានថាអ្នកសម្លាប់លោកតាលោកយាយនោះគ្មានអ្នកណាក្រៅពីប្ដីប្រពន្ធគ្រីស្ដូហេ៊ី្វ អេដវ៉ដ ឡើយ ។
តាមពិតលោកតាលោកយាយស្លាប់តាំងពីយូរ តែកូនបង្កើតគាត់និងកូនប្រសាពូកែប្រឌិតរឿងបំភាន់គេឯងឱ្យយល់ច្រលំថាពួកគាត់ទៅលេងនៅប្រទេសអៀរឡង់ ហើយក៏ចាំមើលផ្លូវរហូតដល់១៦ឆ្នាំនៅតែអត់ទាន់ឃើញពួកគាត់ត្រឡប់មកវិញ ។ ពេលកំណត់មុខសញ្ញាបានច្បាស់ហើយ ប៉ូលិសបានបំពេញបែបបទធ្វើបត្យាប័ននាំខ្លួនពួកគេទាំង២នាក់ពីប្រទេសបារាំងត្រឡប់ទៅអង់គ្លេស
វិញ ។ ដោយដឹងខ្លួនអស់លក្ខណ៍ស៊ូសាន និងគ្រីស្ដូហេ៊ី្វ ព្រមសារភាពត្រង់ពីសកម្មភាពរបស់ពួកខ្លួនកន្លងមក ព្រមទាំងប្រាប់ពីទីកន្លែងកប់លាក់សពលោកតាលោកយាយកាលពី១៦ឆ្នាំមុន ។ ពួកគេយល់ព្រមឆ្លើយត្រង់គ្រប់ទាំងអស់អត់ហា៊នប្រើល្បិចពង្វាងចំណុចណាមួយឡើយ។
ការសើុបអង្កេតមួយបានរកឃើញថាមូលហេតុដែលជនទាំងពីរនាក់នោះឈានដល់ដាច់ចិត្តសម្លាប់ឪពុកម្ដាយបង្កើតនិងឪពុកម្ដាយក្មេកដែលនៅផ្ទះជាមួយខ្លួនព្រោះមកពីជំពាក់បំណុលគេច្រើនពេករកប្រាក់សងមិនបាន ហើយឈានដល់ទាល់តម្រេះក៏ដោះស្រាយរបៀបនេះ ដើម្បីយកប្រាក់របស់ឪពុកម្ដាយសងបំណុលគេ ។ ប៉ូលិសធ្វើកោសល្យវិច័យសពលោកលោកតា លោកយាយឃើញថា អ្នករងគ្រោះទាំងពីរត្រូវបាញ់សម្លាប់ម្នាក់មួយគ្រាប់ដោយដោយកាំភ្លើងមួយដើមគឺកាំភ្លើងដែលប៉ូលិសរកឃើញក្នុងផ្ទះរបស់ប្ដីប្រពន្ធគ្រីស្ដូហេ៊ី្វ អេដវ៉ដ ។
លោករដ្ឋអាជ្ញាPeter Joyce និយាយដោយហួសចិត្តថា «ខ្ញុំសង្កេតឃើញច្បាស់ទឹកមុខពួកគេអត់មានបង្ហាញនូវភាពស្ដាយក្រោយ ឬមានវិប្បដិសារៈអ្វីសោះ ។ ពួកគេព្រមឆ្លើយត្រង់គ្រប់យ៉ាងមកពីដឹងច្បាស់អស់ផ្លូវប្រកែកប៉ុណ្ណោះ ។ពីរនាក់នេះពិតជាសមនឹងដាក់គុកអស់មួយជីវិត » ៕ តាមឯកសារបរទេស
ចែករំលែកព័តមាននេះ