ខេត្តស្វាយរៀង ៖ មានការភ្ញាក់ផ្អើលមួយមិនធ្លាប់មានពីមុនមកនៅខេត្តស្វាយរៀង ដែលវេជ្ជបណ្ឌិតម្នាក់បានយកកាំបិតចាក់.កស្រីកំណាន់របស់ខ្លួនលិច១កាំបិតបណ្តាលឱ្យរងរបួសយ៉ាងធ្ងន់ ខណៈស្ត្រីរងគ្រោះកំពុងដេកនៅលើអង្រឹងក្រោមផ្ទះមិត្តភក្តិ ធ្វើឱ្យអ្នកឃើញហេតុការណ៍ស្រែកឆោទ្បោ ហើយវេជ្ជបណ្ឌិតដែលជាជនល្មើសបានទ្បើងជិះម៉ូតូគេចខ្លួនបាត់ ។
ហេតុការណ៍នេះ បានកើតទ្បើងកាលពីវេលាម៉ោង១១និង១៥នាទីព្រឹក ថ្ងៃទី២៦ កក្កដា នៅភូមិស្រះវង់ សង្កាត់ស្វាយរៀង ក្រុងស្វាយរៀង។ លោក ប៉ែន សាមឿន នាយប៉ុស្តិ៍នគរបាលរដ្ឋបាលសង្កាត់ស្វាយរៀង បានឱ្យដឹងថា ជនជាប់ចោទគឺវេជ្ជបណ្ឌិត គង់ ចន្ថា ភេទប្រុស អាយុ៤២ឆ្នាំ ជាប្រធានផ្នែកប្រព័ន្ធព័ត៌មាន នៃមន្ទីរសុខាភិបាលខេត្ត មានស្រុកកំណើតនៅភូមិស្រះ ឃុំជ្រៃធំ ស្រុករមាសហែក មានប្រពន្ធកូនដែរ តែប្រពន្ធកូនបានទៅរស់នៅឯសហរដ្ឋអាមេរិកអស់ហើយ ។ ចំណែកវេជ្ជបណ្ឌិតរូបនេះ បានទាក់ទងស្ត្រីឈ្មោះ លី ឆេង អាយុ៣៨ឆ្នាំ មានស្រុកកំណើតនៅភូមិយោត ឃុំមេ-សប្រចាន់ ស្រុកពារាំង ខេត្តព្រៃវែង មានមុខរបរជាអ្នកធ្វើក្រចក ជួលផ្ទះស្នាក់នៅក្នុងភូមិកៀនសាំង សង្កាត់ស្វាយរៀង ក្រុងស្វាយរៀង ធ្វើជាស្ត្រីកំណាន់រហូតមក ។
តាមប្រភពព័ត៌មានថា ដោយសារភ្លើងប្រចណ្ឌ លោកវេជ្ជបណ្ឌិតរូបនេះ បានវាយធ្វើបាបស្ត្រីជាគូកំណាន់ ហើយប្តឹងចោទថា លួចម៉ូតូនិងប្រាក់ជាង១ពាន់ដុល្លារ ក៏ត្រូវសមត្ថកិច្ចចាប់ខ្លួនស្រ្តីកំណាន់បញ្ជូនទៅសាលាដំបូងខេត្ត និងចេញដីកាឃុំខ្លួននៅពន្ធនាគារអស់រយៈពេល១ខែ ទើបវេជ្ជបណ្ឌិតរូបនេះ ទៅសុំដោះលែងពីពន្ធនាគារវិញ និងដកពាក្យបណ្តឹង ។ ដោយសារតែជួបរឿងជូរចត់មិនអាចរស់នៅជាមួយគ្នាបាន ស្ត្រីកំណាន់ក៏សុំបែកផ្លូវគ្នា និងបានទៅជួលផ្ទះស្នាក់នៅភូមិកៀនសាំង សង្កាត់ស្វាយរៀង ប្រកបមុខរបរធ្វើក្រចកនិងផាត់មុខ ។ ថ្វីបើស្ត្រីកំណាន់បានចាកចេញពីដើមទ្រូងរបស់ខ្លួនទៅហើយក្តី ក៏វេជ្ជបណ្ឌិត គង់ ចន្ថា នៅតែតាមលួងលោមឱ្យជានាគ្នាវិញ តែនាងមិនព្រម ។
លុះនៅថ្ងៃកើតហេតុខាងលើ ក្រោយពីដើរធ្វើក្រចកតាមផ្ទះរួចនាង លី ឆេង ក៏មកដេកលេងនៅលើអង្រឹងក្រោមផ្ទះមិត្តភក្តិ នៅភូមិស្រះវង់ ។ ពេលនោះ ប្រៀបដូចជាស្រមោលអន្ទោលតាមប្រាណ វេជ្ជបណ្ឌិតដៃដល់ដែលតាមមករកឃើញ ក៏ចូលទៅនិយាយលួងលោមឱ្យទៅនៅជាមួយគ្នាវិញ តែនាងមិនព្រម ស្រាប់តែវេជ្ជបណ្ឌិតរូបនេះ ដកកាំបិតកៃចេញពីកាបូបចាក់ចំ.កនារីរងគ្រោះលិចមួយកាំបិតបាញ់ឈាមពេញខ្លួនសន្លប់ឈឹង ធ្វើឱ្យម្ចាស់ផ្ទះស្រែកឆោទ្បោដោយការរន្ធត់ចិត្ត ។ រីឯជនល្មើសបានរត់ទ្បើងជិះម៉ូតូបើកគេចខ្លួនបាត់ភ្លាមៗ ចំណែកអ្នកស្រុកក៏ប្រញាប់ប្រញាល់បញ្ជូនជនរងគ្រោះទៅមន្ទីរពេទ្យខេត្តដើម្បីសង្គ្រោះ ប៉ុន្តែដោយសាររបួសធ្ងន់ពេកគ្រូទេព្យក៏បញ្ចូនបន្តទៅមន្ទីរពេទ្យឯរាជធានីភ្នំពេញទៀត ។
រហូតមកដល់ល្ងាចថ្ងៃទី២៧ កក្កដា មិនមានព័ត៌មានថា វេជ្ជបណ្ឌិតដៃដល់រូបនោះ ត្រូវចាប់ខ្លួនបានឬបែបណានៅទ្បើយទេ ៕
ចែករំលែកព័តមាននេះ