កាសែតធំរបស់អាមេរិក ញូវយ៉កថែម កាលពីថ្ងៃទី២៦ កក្កដា បានស្នើឱ្យផ្តល់ភាពស្របច្បាប់ដល់ការប្រើកញ្ឆា ដោយប្រៀបធៀបការដាក់ទោសឧក្រិដ្ឋដល់ការប្រើកញ្ឆាទៅនឹងការប្រព្រឹត្តខុស នៃសម័យកាលហាមឃាត់ការផលិតស្រា ។
ក្នុងបទអត្ថាធិប្បាយមួយ កាសែតនោះអះអាងថា ការហាមឃាត់ការប្រើកញ្ឆាប៉ះពាល់មិនសមស្របដល់បណ្តាយុវជនស្បែកខ្មៅ ខណៈដែលការប្រើកញ្ឆាកើតមានបញ្ហាតិចតួច បើប្រៀបធៀបទៅនឹងការញៀនស្រា និងថ្នាំជក់ ។ កាសែតញូវយ៉កថែម បន្តថា សហរដ្ឋអាមេរិកហាមឃាត់ការផលិតស្រារយៈពេល១៣ឆ្នាំ តែរយៈពេល១៣ឆ្នាំនោះមនុស្សទាំងឡាយនៅតែបន្តផឹកស្រា ខណៈបណ្តាអ្នកដែលគោរពច្បាប់ក្លាយទៅជាឧក្រិដ្ឋជន ហើយក្រុមឧក្រិដ្ឋជនកើតមានកាន់តែច្រើន ។
កាលពីជាង៤០ឆ្នាំមុននេះ សភាអាមេរិកបានអនុម័តច្បាប់ហាមឃាត់ការប្រើកញ្ឆាដែលកាសែតញូវយ៉កថែម ថា ធ្វើឱ្យមានការប៉ះពាល់ធំបំផុតដល់សង្គម ដោយសារការហាមឃាត់ផលិតផលមួយដែលមានគ្រោះថ្នាក់តិចជាងស្រាទៅទៀតនោះ ។ រដ្ឋាភិបាលសហព័ន្ធត្រូវបញ្ឈប់ការដាក់ទោសឧក្រិដ្ឋដល់អ្នកប្រើកញ្ឆា ។
ក្នុងបទអត្ថាធិប្បាយមានចំណងជើងថា «ចូរលុបចោលការហាមឃាត់បន្តទៀត» ញូវយ៉កថែម បញ្ជាក់ថា បណ្តាអ្នកទទួលខុសត្រូវលើបទវិចារណកថារបស់កាសែត បានធ្វើការសន្និដ្ឋានបែបនេះ ក្រោយការជជែកដេញដោលគ្នា ហើយកាសែតនោះយល់ឃើញថា ការបាត់បង់លើការហាមឃាត់កញ្ឆាសម្រាប់សង្គមមានធំធេងណាស់ ។ កាសែតនេះបានដកស្រង់តួរលេខនានារបស់ FBI ដែលជំរឿនឃើញថា មនុស្សដល់ទៅ៦៥៨.០០០នាក់ ត្រូវចាប់ខ្លួនដោយសារប្រើកញ្ឆា កាលពីឆ្នាំ២០១២ គឺច្រើនជាងអ្នកមានកូកាអីុន ហេរ៉ូអីុន និងគ្រឿងញៀនឯទៀតៗផលិតពីគ្រឿងញៀនទាំង២នោះ ហើយការដាក់ទោសអ្នកប្រើកញ្ឆានាំដល់លទ្ធផលនៃការប្រកាន់ពូជសាសន៍ ដែលមិនសមស្របចំពោះពួកយុវជនស្បែកខ្មៅ ធ្វើឱ្យប៉ះពាល់ដល់ជីវិតពួកគេ ហើយបង្កើតជំនាន់ថ្មីៗនៃពួកឧក្រិដ្ឋជន ។
ដោយប្រឆាំងការលក់កញ្ឆាដល់មនុស្សមិនទាន់ពេញវ័យ (ក្រោម២១ឆ្នាំ) កាសែតញូវយ៉កថែម អះអាងថា ការសេពកញ្ឆាជាមធ្យមហាក់ពុំបណ្តាលឱ្យមានគ្រោះថ្នាក់ឡើយ ៕
ចែករំលែកព័តមាននេះ