ខណៈបានក្លាយជាអ្នកបើកបរលឿនជាងគេយកឈ្នះការនាំមុខថបណ្តោះអាសន្នក្នុងកម្មវិធី Hungarian Grand Prix កីឡាករអាល្លឺម៉ង់ Nico Rosberg កំពុងបោះជំហានឈានឆ្ពោះទៅរកការឈ្នះពានជើងឯកព្រឹត្តិការណ៍ប្រណាំងរថយន្តហ្វមមូឡាវ័នជាលើកទី៦ ក្នុងរដូវកាល ។
អ្នកបើកបរឱ្យក្រុម Mercedes រូបនេះបានបញ្ចប់ការប្រណាំង១ ជុំទីលាននៅប្រទេសហុងគ្រីកាលពីថ្ងៃសៅរ៍ម្សិលមិញ ក្នុងថិរវេលា១នាទីនិង២២.៧១៥វិនាទី នាំមុខកីឡាករអាល្លឺម៉ង់ Sebastian Vettel បើកបរឱ្យក្រុម Red Bullដែលប្រើថិរវេលាច្រើនជាង០.៤៨៦វិនាទី ។ ចំណែក កីឡាករ Valtteri Bottas បានក្លាយទៅជាអ្នកបើរបរលឿនលំដាប់ទី៣ បន្ទាប់ពីប្រើអស់ថិរវេលា១នាទី និង២៣.៣៥៤វិនាទី ។
កីឡាករជើងខ្លាំងមកពីអេស្ប៉ាញ Fernando Alonso បញ្ចប់១ជុំ ទីលានប្រណាំងក្នុងថិរវេលា ១នាទីនិង២៣.៩០៩វិនាទីតាមពីក្រោយកីឡាករ Daniel Ricciardoដែលបញ្ចប់ក្នុងលំដាប់ទី៤ ។
កីឡាករប្រេស៊ីល Felipe Massa បញ្ចប់ការប្រណាំងក្នុងលំដាប់ទី៦ បន្ទាប់ពីប្រើថិរវេលាយឺតជាង Rosberg ១.៥០៨វិនាទី ។ អ្នកបើកបរឱ្យក្រុម Williams រូបនេះបញ្ចប់១ជុំទីលានប្រណាំងក្នុងថិរវេលា ១នាទីនិង២៤.២២៣វិនាទី នាំមុខកីឡាករអង់គ្លេស Jenson Button របស់ក្រុមដែលប្រើអស់ថិរវេលា ១នាទីនិង២៤.២៩៤វិនាទី ស្ថិតក្នុងលំដាប់ទី៧ ។
ដោយឡែក កីឡាករអង់គ្លេស Lewis Hamilton មិនអាចបញ្ចប់ការប្រណាំងរបស់ខ្លួនបានដូចសព្វដងនោះឡើយ បន្ទាប់ពីរថយន្តរបស់គេឆេះជាអណ្តាតភ្លើង ។ គេបានថ្លែងថា ៖«យើងគ្រោងប្តូរម៉ាស៊ីន និងប្រអប់លេខចេញ ហើយបន្ទាប់ពីមានឧប្បតិ្តហេតុឆេះ យើងក៏បានធ្វើវា ។ ទោះជាយ៉ាងណា ខ្ញុំមិនអាចបើកបរបានជាដដែល ។ ចិត្តរបស់ខ្ញុំពិតជាទទួលការប៉ះទង្គិច ប៉ុន្តែមិនថ្វីទេ ខ្ញុំត្រូវតែព្យាយាមឱ្យអស់ពីលទ្ធភាព ធ្វើយ៉ាងណាដណ្តើមជ័យជម្នះនៅថ្ងៃស្អែកឱ្យខាងតែបាន ។ ថ្ងៃស្អែក ខ្ញុំត្រូវតែធ្វើឱ្យល្អប្រសើរជាងថ្ងៃនេះ» ៕
ចែករំលែកព័តមាននេះ