កម្ពុជារងឥទ្ធិពលព្យុះ នៅតំបន់មាត់សមុទ្ររលកកំពស់ ១ទៅ២ម៉ែត្រ ខ្ពង់រាបខាងជើងនិងឦសានភ្លៀងច្រើន
ដោយ ៖ អប្សរា
ថ្ងៃសុក្រ ទី១៦ ខែកក្កដា ឆ្នាំ២០១០ ម៉ោង ០៩:៥៤
រាជធានីភ្នំពេញ ៖ សេចក្ដីជូនដំណឹង របស់ក្រសួងធនធានទឹក និងឧតុនិយម បានឱ្យដឹងថា បន្ទាប់ពីបានធ្វើការសង្កេតតាមដាន លើស្ថានភាពធាតុអាកាសរួចមកឃើញថា ព្យុះទី២ ឈ្មោះកុងស៊ុន (CONSON) ដែលបានកើតឡើងនៅសមុទ្រប៉ាស៊ីហ្វិកកាលពីថ្ងៃទី១១ ខែកក្កដា ឆ្នាំ២០១០កន្លងមក បានធ្វើដំណើរឆ្លងកាត់ប្រទេសហ្វ៉ីលីពីន មកសមុទ្រ ចិនខាងត្បូង និងកំពុងបន្ដដំណើរកាត់ពីលើ កោះហាយណាំ ឆ្ពោះទៅភាគខាងត្បូងប្រទេសចិន ។
ព្យុះនេះ នឹងមានឥទ្ធិពលមកលើព្រះរាជាណាចក្រកម្ពុជា ចាប់ពីថ្ងៃទី១៦ ដល់ថ្ងៃទី១៨ ខែកក្កដា ឆ្នាំ២០១០ ពិសេសនៅតំបន់មាត់ សមុទ្រ តំបន់ខ្ពង់រាបខាងជើង និងតំបន់ខ្ពង់រាបភាគឦសាន ។ ស្ថានភាពបែបនេះ នឹងបង្កឱ្យមានភ្លៀងធ្លាក់ច្រើន និងខ្យល់បក់បោកខ្លាំង នៅតំបន់មាត់សមុទ្រ មានខេត្ដកោះកុង ខេត្ដព្រះសីហនុ និងខេត្ដកំពត ។ ឯរលកសមុទ្រមានកំពស់ពី ១ទៅ២ម៉ែត្រ ។
ដោយឡែក ចំពោះខេត្ដព្រះវិហារ ខេត្ដរតនគិរី ខេត្ដមណ្ឌលគិរី ខេត្ដក្រចេះ និងខេត្ដស្ទឹងត្រែង អាចនឹងមានភ្លៀងធ្លាក់ច្រើន ។ សេចក្ដីជូនដំណឹងនេះ បានស្នើឱ្យអាជ្ញាធរ ដែនដី ប្រជាពលរដ្ឋដែលរស់នៅតំបន់ខាងលើ ពិសេសប្រជានេសាទតាមតំបន់សមុទ្រ សូមជ្រាបជាព័ត៌មាន និងមានការប្រុងប្រយ័ត្នខ្ពស់ ចំពោះបាតុភូតធម្មជាតិខាងលើនេះ ។ ក្រសួងធនធានទឹក និងឧតុនិយម បាននិងកំពុងបន្ដតាមដានស្ថានភាពធាតុអាកាស ខាងលើនេះ ហើយនឹងធ្វើសេចក្ដីជូនដំណឹង បន្ថែមទៀត ក្នុងករណីដែលស្ថានភាព របស់ព្យុះនេះមានការប្រែប្រួល ៕
