ខណៈនៅសល់មួយដំណាក់ទៀត ព្រឹត្តិការណ៍ប្រណាំងកង់ Tour de France ប្រចាំឆ្នាំ២០១៤ ត្រូវបានបញ្ចប់ កីឡាករអុីតាលី Vincenzo Nibali នៅតែរក្សាការនាំមុខរបស់ខ្លួនលើតារាងថិរវេលាសរុបជាដដែល ។
ខណៈនៅសល់មួយដំណាក់ទៀត ព្រឹត្តិការណ៍ប្រណាំងកង់ Tour de France ប្រចាំឆ្នាំ២០១៤ ត្រូវបានបញ្ចប់ កីឡាករអុីតាលី Vincenzo Nibali នៅតែរក្សាការនាំមុខរបស់ខ្លួនលើតារាងថិរវេលាសរុបជាដដែល ។
បើទោះណា ការប្រណាំងក្នុងដំណាក់ទី២០ដែលបញ្ចប់ទៅនៅទីក្រុង Périgueux កាលពីថ្ងៃសៅរ៍ ទី២៦ កក្កដា កីឡាកររូបនេះដណ្តើមបានត្រឹមចំណាត់ថ្នាក់លេខ៤ក្តី ក៏ប៉ុន្តែ គេនៅតែមានលទ្ធភាពគ្រងអាវកាក់ពណ៌លឿង ក្នុងនាមជាអ្នកនាំមុខព្រឹត្តិការណ៍ទាំងមូលជាដដែល ។
ឆ្លងកាត់ការប្រណាំងអស់ចំនួន២០ដំណាក់មកនេះ Nibali ដែលជាអ្នកជិះកង់ឱ្យក្រុម Astana Pro Team បានប្រើអស់ថិរវេលាសរុបតិចជាងគេបំផុតគឺ ៨៦ម៉ោង ៣៧នាទីនិង៥២វិនាទី នាំមុខកីឡាករបារាំង Jean-Christophe Péraud ជិះឱ្យក្រុម AG2R La Mondiale ដែលប្រើអស់ថិរវេលាច្រើនជាង៧នាទីនិង៥២វិនាទី និងនាំមុខកីឡាករបារាំងម្នាក់ទៀត គឺ Thibaut Pinot ជិះឱ្យក្រុម FDJ.fr ដែលប្រើថិរវេលាច្រើនជាង៨នាទីនិង២៤វិនាទី ។
គេបានថ្លែងថា ៖ «ពេលនេះហាក់មិនមែនជាសុបិនទៀតទេ ។ គិតថា ខ្ញុំប្រហែលជាឈ្នះជើងឯក ។ យ៉ាងណាក៏ដោយ យើងនឹងរង់ចាំមើលនៅថ្ងៃស្អែក ។ នោះជាពេលវេលាដ៏អស្ចារ្យនិងពិសេសបំផុត ។ ខ្ញុំជឿថា មួយដំណាក់នៅថ្ងៃស្អែក អ្នកដែលចូលដល់ទីព្រ័ត្រមុនគេគឺជារូបខ្ញុំ»។ ដោយឡែក ជ័យជម្នះក្នុងដំណាក់ទី២០ បានទៅលើកីឡាករអាល្លឺម៉ង់ Tony Martin ។
អ្នកជិះកង់ឱ្យក្រុម Omega Pharma-Quick Step រូបនេះបានបញ្ចប់ដំណាក់មានចម្ងាយផ្លូវ៥៤គីឡូម៉ែត្រចេញពីទីក្រុង Bergerac ប្រទេសបារាំង ក្នុងថិរវេលា១ម៉ោង ៦នាទីនិង២១វិនាទីយកឈ្នះកីឡាករហូឡង់ Tom Dumoulin ជិះឱ្យក្រុម Team Giant-Shimano ដែលប្រើថិរវេលាច្រើនជាង១នាទីនិង៣៩វិនាទី ។ ចំណែកកីឡាករឆែក Jan Barta ជិះឱ្យក្រុម Team Netapp-Endura បញ្ចប់ការប្រណាំងក្នុងលំដាប់ទី៣ បន្ទាប់ពីប្រើថិរវេលាច្រើនជាង Martin ១នាទីនិង៤៧វិនាទី។
សូមបញ្ជាក់ថា ការប្រណាំងកម្មវិធី Tour de France ឆ្នាំនេះមាន២១ដំណាក់ និងមានចម្ងាយផ្លូវសរុប៣៦៦៣,៥គីឡូម៉ែត្រ ។ ចំណែកដំណាក់ទី២១ ដែលជាដំណាក់ផ្តាច់ព្រ័ត្រមានចម្ងាយផ្លូវ១៣៧,៥គីឡូម៉ែត្រ ដោយការប្រណាំងចាប់ចេញដំណើរពីទីប្រជុំជន Évry ឆ្ពោះទៅកាន់វិមាន Champs-Élysées ទីក្រុងប៉ារីស ប្រទេសបារាំង ៕
ចែករំលែកព័តមាននេះ