រាជធានីភ្នំពេញ ៖ កីឡាករកម្ពុជា៣រូបមាន២រូបគឺ សែន រ៉ាឌី មកពីក្លិបអប្សរាគុនខ្មែរ និងកំពែង ខ្មៅ មកពីក្លិបវីអាយភីចំការមន បានយកឈ្នះពិន្ទុកីឡាករថៃ ចំណែក១រូបទៀតគឺ ឡៅ ស៊ីណាត មកពីក្លិបទ័ពពិសេសឆត្រយោង៩១១ ត្រូវកីឡាករថៃទាត់ឱ្យខូចដៃខាងឆ្វេងប្រកួតលែងកើតនៅត្រឹមទឹកទី៣ នៅក្នុងព្រឹត្តិការណ៍ប្រកួតប្រដាល់ជាលក្ខណៈមិត្តភាពអន្តរជាតិ នៅលើសង្វៀនស្ថានីយទូរទស្សន៍អប្សរាកាលពីថ្ងៃសៅរ៍ ទី២៦ កក្កដា កន្លងមកនេះ ។
ឈុតឆាកប្រកួតនាពេលនោះ គេឃើញ សែន រ៉ាឌី បានបើកការវាយសង្គ្រុបទៅលើកីឡាករថៃ Jaoprayasupeet ស្ទើរតែមិនអាចតដៃរួច តាំងតែពីនៅក្នុងទឹកទី១ និងទឹកទី២ មកម៉្លេះ ។ ទោះបីកីឡាករថៃវាយតបតវិញ ក៏មិនអាចបង្អាក់ដំណើររុលចូលវាយរបស់ សែន រ៉ាឌី បានឡើយ ។ នៅក្នុងទឹកទី៣ សែន រ៉ាឌី បានម៉ាត់ចូលមុខ និងពោះទឹកកីឡាករថៃរូបនេះពេញៗតែម្តងក្នុងពេលដែលកីឡាករថៃរូបនេះបានព្យាយាមសម្រុកចូលកៀកវាយកែងសងវិញយ៉ាងសាហាវ ។ លុះចូលដល់ទឹកទី៤ និងទី៥ សែន រ៉ាឌី ត្រូវកីឡាករថៃវាយសង្គ្រុបជាប់រហូតធ្វើឱ្យគេព្យាយាមដកថយអែបខ្សែរេញជាញឹកញាប់ ដោយសារកម្លាំងរបស់គេចុះខ្សោយមិនអាចតតាំងឱ្យបានខ្លាំងក្លាជាមួយកីឡាករថៃបានឡើយ ។ ទោះបីយ៉ាងណា កីឡាករថៃមិនអាចធ្វើអ្វី សែន រ៉ាឌី បានឡើយ ទើបលទ្ធផលចុងក្រោយ សែន រ៉ាឌី ជាអ្នកឈ្នះដោយពិន្ទុ ។
ចំណែកកំពែង ខ្មៅ ដែលបានយកឈ្នះពិន្ទុកីឡាករថៃ Rajahs នាពេលនោះ គឺពិតជាមិនធម្មតានោះឡើយ ដោយសារកីឡាករថៃហាក់បីដូចជាមិនញញើត កំពែង ខ្មៅ បន្តិចណាឡើយ។ នៅក្នុងទឹកទី១ និងទឹកទី២ Rajahs បានដើរចូលវាយភ្លាមៗមិនបង្អង់ទុកយូរឡើយ ឯកំពែង ខ្មៅ ក៏បានវាយបកសងវិញភ្លាមៗដោយបានទាត់សន្ធាប់ទៅលើល្វែងខាងក្រោមបង្ខំឱ្យកីឡាករថៃរូបនេះដកថយទាំងព្រលឹងចុងសក់ ។ កំពែង ខ្មៅ មានឱកាសគ្រប់គ្រងស្ថានការណ៍ប្រកួតបានច្រើនជាងចាប់តាំងពីទឹកទី៣ រហូតទៅ ជាពិសេសនៅក្នុងទឹកទី៥ ពេលឃើញកីឡាករថៃកាន់តែដុនដាប កំពែង ខ្មៅ បានបើកការវាយសម្រុកតាមអំពើចិត្ត តែមិនអាចធ្វើអីកីឡាករថៃបានឡើយ ទើបបានត្រឹមឈ្នះពិន្ទុប៉ុណ្ណោះ ។
ដោយឡែក ឡៅ ស៊ីណាត ត្រូវកីឡាករថៃ Pat KiaKhamphon ទាត់ឱ្យខូចដៃខាងឆ្វេងប្រកួតលែងកើតនៅត្រឹមទឹកទី៣ ។ ឡៅ ស៊ីណាត បង្ហាញពីភាពកំសោយរបស់ខ្លួនតាំងតែពីក្នុងទឹកទីមួយមកម៉្លេះ ជាក់ស្តែង គេត្រូវកីឡាករថៃទាត់ និងធាក់ឱ្យដួលច្រងាប់ច្រងិលជាច្រើនលើកច្រើនសាទៀតផង ។ តាំងពីទឹកទី១ដល់ទឹក៣ ឡៅ ស៊ីណាត បានត្រឹមតែការពារខ្លួនយ៉ាងលំបាកបំផុត លុះចូលដល់ពាក់កណ្តាលទឹកទី៣ គេត្រូវកីឡាករថៃទាត់ត្រូវដៃខាងឆ្វេងបណ្តាលឱ្យថ្លោះប្រកួតលែងកើតតែម្តង៕
ចែករំលែកព័តមាននេះ