រាជធានីភ្នំពេញ ៖ វគ្គសិក្សាសាមគ្គីអូឡាំពិក ស្តីពីគ្រូបង្វឹកកីឡាទ្រីយ៉ាត្លុងលើកទី១ ក្រោមការឧបត្ថម្ភរបស់អង្គការសាមគ្គីអូឡាំពិកអន្តរជាតិ (OS) សហការរៀបចំដោយគណៈកម្មាធិការជាតិអូឡាំពិកកម្ពុជា និងសហព័ន្ធកីឡាទ្រីយ៉ាត្លុងកម្ពុជា បង្រៀនដោយលោក Franz Studer ជនជាតិអាហ្វ្រិកខាងត្បូង ជាគ្រូឧទ្ទេសនាមមកពីសហព័ន្ធកីឡាទ្រីយ៉ាត្លុងអន្តរជាតិនោះ បានបញ្ចប់ហើយកាលពីព្រឹកថ្ងៃទី២៦ កក្កដា កន្លងមកនេះ ។ វត្តមានចូលរួមក្នុងពិធីបិទវគ្គខាងលើនេះមានលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា, លោក គង់ ឬទ្ធីជព្វ ប្រធានសហព័ន្ធកីឡាទ្រីយ៉ាត្លុងកម្ពុជា រួមទាំងមន្ត្រីពាក់ព័ន្ធ និងសិក្ខាកាមជាច្រើននាក់ទៀត ។
អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា លោក ងិន សុខបញ្ញា បានថ្លែងថា វគ្គសិក្សាដែលមានរយៈពេលមួយសប្តាហ៍ពេញ ចាប់ពីថ្ងៃទី២០ រហូតដល់ថ្ងៃទី២៦ ខែកក្កដា នេះ គឺមានសិក្ខាកាមចូលរួមទាំងអស់ចំនួន២៥នាក់ ដោយបានសិក្សាពីទ្រឹស្តី និងការអនុវត្តជាក់ស្តែងជារៀងរាល់ថ្ងៃពីប្រភេទកីឡាហែលទឹក ជិះកង់ និងរត់ប្រណាំង ។ ជាលទ្ធផលមានសិក្ខាកាម១៣នាក់ទទួលបាននិទ្ទេសល្អ, ៨នាក់ទទួលបាននិទ្ទេសមធ្យម និង៤នាក់ទៀតទទួលបាននិទ្ទេសខ្សោយ ។
លោក Franz Studer ដែលជាគ្រូឧទ្ទេសនាមក្នុងវគ្គនេះ បានថ្លែងឱ្យដឹងថា ឆ្លងកាត់ការសិក្សាជាមួយគ្នារយៈពេលប៉ុន្មានថ្ងៃកន្លងមក លោកគិតថា គ្រូបង្វឹកទាំងអស់នឹងក្លាយជាគ្រូបង្វឹកកីឡាទ្រីយា៉ត្លុង ដែលមានសមត្ថភាព និងបច្ចេកទេសគ្រប់គ្រាន់ដើម្បីធ្វើជាមូលដ្ឋានសម្រាប់បណ្តុះបណ្តាលដល់អ្នកជំនាន់ក្រោយ ។ ទោះបីយា៉ងណា អ្វីដែលបានសិក្សាយើងគិតថា មិនទាន់គ្រប់គ្រាន់តាមតម្រូវការទេ ដូច្នេះសិក្ខាកាមទាំងអស់ត្រូវតែព្យាយាមស្វែងរកអ្វីដែលថ្មីមកបំពេញបន្ថែម ។
ប្រធានសហព័ន្ធកីឡាទ្រីយ៉ាត្លុងកម្ពុជា លោក គង់ ឬទ្ធីជព្វ បានថ្លែងអំណរគុណដល់លោក Franz Studer ដែលបានចំណាយពេលវេលាដ៏មានតម្លៃចូលរួមធ្វើបទបង្ហាញ និងបង្ហាត់បង្រៀនក្នុងវគ្គនេះ ស្របពេលកីឡាទ្រីយ៉ាត្លុងកម្ពុជាត្រូវចូលរួមប្រកួតកីឡា SEA Games លើកទី២៨ នៅសិង្ហបុរី នាឆ្នាំ២០១៥ខាងមុខ ។ ដូច្នេះគ្រូបង្វឹក និងកីឡាករ-កីឡាការិនីទាំងអស់ ត្រូវខិតខំប្រឹងប្រែងហ្វឹកហាត់បន្ថែមទៀត ដើម្បីចូលប្រកួតក្នុងព្រឹត្តិការណ៍អន្តរជាតិជាលើកដំបូងនេះ ។ លោកបន្តថា គ្រូបង្វឹកដែលបានចូលរួមសិក្សាក្នុងវគ្គបច្ចេកទេសកីឡាទ្រីយ៉ាត្លុងនេះ ត្រូវយកចំណេះដឹងដែលទទួលបានពីការសិក្សាជាមួយលោក Franz Studer ទៅចែករំលែកបន្ត ដើម្បីធ្វើឱ្យកីឡាទ្រីយ៉ាត្លុងយើងកាន់តែរីកសុះសាយ និងមានការរីកចម្រើនមួយកម្រិតទៀត ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ដែរថា គ្រូបង្វឹកទាំងអស់ត្រូវយកចិត្តទុកដាក់ទាំងការបង្ហាត់បង្រៀនបច្ចេកទេស សីលធម៌ និងការអនុវត្តជាក់ស្តែង ក៏ដូចជាបណ្តុះបណ្តាលយុវជនថ្នាល ដើម្បីត្រៀមខ្លួនចូលរួមប្រកួតប្រជែងក្នុងព្រឹត្តិការណ៍អន្តរជាតិផ្សេងៗ ។ ជាពិសេសមុនដល់ឆ្នាំ២០២៣ យើងត្រូវរៀបចំផែនការសំខាន់ៗសម្រាប់ប្រកួតដណ្តើមយកមេដាយក្នុងព្រឹត្តិការណ៍ SEA Games មុននឹងយើងធ្វើជាម្ចាស់ផ្ទះព្រឹត្តិការណ៍ដ៏ធំប្រចាំតំបន់មួយនេះ ៕
ចែករំលែកព័តមាននេះ