រាជធានីភ្នំពេញ ៖ កីឡាករសេក រតនា មកពីក្លិបសឹករងខេត្តសៀមរាប បានបង្ហាញអារម្មណ៍មិនអស់ចិត្តបន្ទាប់ពីរូបគេត្រូវអាជ្ញាកណ្តាលលោករាម កុសល ប្រកាសឱ្យចាញ់ពិន្ទុកីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិនៅក្នុងព្រឹត្តិការណ៍នៃការប្រកួតប្រដាល់ដណ្តើមខ្សែក្រវាត់របស់ក្រុមហ៊ុនស្រាបៀរលីអូក្នុងប្រភេទទម្ងន់៦០គីឡូក្រាមវគ្គជម្រុះវិលជុំ ដែលបានធ្វើឡើងនៅលើសង្វៀន CTN កាលពីល្ងាចថ្ងៃសៅរ៍ ទី២៦ កក្កដា កន្លងមកនេះ។
នៅក្នុងទឹកទី១ និងទឹកទី២ សេក រតនា បានប្រើក្បាច់ពិសេសៗវាយសម្រុកទៅលើ រឿម វណ្ណៈ យ៉ាងចាស់ដៃដូចជា ការប្រើស្នៀតជើងទាត់ទៅលើល្វែងខាងក្រោម ព្រមទាំងបានម៉ាត់ចូលមុខពេញៗជាច្រើនដៃបន្ថែមទៀត ។ រឿម វណ្ណៈ មិនត្រឹមតែពុំមានលទ្ធភាពវាយបកសងវិញប៉ុណ្ណោះទេ ផ្ទុយទៅវិញមានពេលខ្លះគេបណ្តោយឱ្យ សេក រតនា ទាត់ឱ្យដួលទាំងជំហរជាច្រើនលើកច្រើនសាទៀតផង ។ និយាយរួមនៅក្នុងទឹកទី១ និងទឹកទី២ នេះ រឿម វណ្ណៈ ចាញ់ប្រៀប សេក រតនា ដាច់តែម្តង ។ ចូលដល់ទឹកទី៣ សេក រតនា នៅតែព្យាយាមដើរចូលវាយសម្រុកកាន់តែខ្លាំងក្នុងគោលបំណងផ្តួល រឿម វណ្ណៈ ឱ្យបានឆាប់បំផុត ។ ប៉ុន្តែលើកនេះ រឿម វណ្ណៈ មិនទុកឱកាសឱ្យ សេក រតនា វាយមកលើរូបគេតាមតែចិត្តដូចមុនទៀតឡើយ គេបានប្រើស្នៀតជើងទាត់ និងវាយកែងសំដៅសៀតផ្កា និងថ្ងាសរបស់ សេក រតនា មើលទៅគួរឱ្យស្រៀវសាច់ ។ ប៉ុន្តែទោះជាយ៉ាងណា សិស្សគុនមកពីក្លិបសឹករងខេត្តសៀមរាបរូបនេះមិនព្រមដកថយដោយងាយនោះឡើយ គឺគេនៅតែដើរចូលយ៉ាងងងើលទាត់ និងម៉ាត់សងវិញ ប៉ុន្តែការវាយសងរបស់គេមិនខ្លាំងដូចនៅដើមទឹកឡើយ ។ នៅ៣ទឹកចុងក្រោយនេះ គេឃើញ សេក រតនា កាន់តែដើរចូល រឿម វណ្ណៈ កាន់តែមានឱកាសវាយត្រូវច្រើន ទើបលទ្ធផលចុងក្រោយ រឿម វណ្ណៈ ត្រូវគេកាត់ក្តីឱ្យឈ្នះពិន្ទុទាំងមិនសូវស្រួលខ្លួនប៉ុន្មាន ។ ជ័យជម្នះរបស់កីឡាកររឿម វណ្ណៈ លើកនេះធ្វើឱ្យអ្នកខ្លះស្រែកអបអរ ឯអ្នកខ្លះសើចចំអកឱ្យផងដែរ ខណៈ សេក រតនា បានសម្តែងនូវការខកចិត្តយ៉ាងខ្លាំងដោយសារគេគិតថា លទ្ធផលនេះមិនយុត្តិធម៌សម្រាប់រូបគេឡើយ ។ ទោះបីយ៉ាងណា ការសម្រេចរបស់ចៅក្រមទាំង៥រូប គឺមិនអាចកែប្រែបានទេ ។
ពេលនេះគេបានរកឃើញកីឡាកររឿម វណ្ណៈ ម្នាក់ទៀតហើយដែលមានលទ្ធភាពក្នុងការរកបាន៣ពិន្ទុជាលើកដំបូង ។ កាលសប្តាហ៍ទី១ កីឡាករថុល មករា មកពីក្លិបឃ្លាំងមឿងកីឡា និងកីឡាករង៉ែត រដ្ឋា មកពីសមាគមកីឡាប្រដាល់ក្រសួងមហាផ្ទៃ គឺជាអ្នកដែលរកបាន៣ពិន្ទុមុនគេ ៕
ចែករំលែកព័តមាននេះ