ក្រុងប៉ោយប៉ែត ៖ បុរសជនជាតិថៃដែលតាមសេចក្ដីរាយការណ៍ថា មានចំនួន៤នាក់ បានបន្លំខ្លួនជាតម្រួតថៃ ហើយចាប់ពលការិនីខ្មែរ៤នាក់យកទៅរំលោភម្នាក់មួយរហូតបានសម្រេច កាលពីយប់ថ្ងៃទី២៣ កក្កដា នៅក្នុងស្រុកអារញ្ញ ខេត្ដស្រះកែវ ប្រទេសថៃ ។
ប្រភពព័ត៌មានបានឱ្យដឹងថា ក្រោយកើតមានអំពើចាប់រំលោភនេះ ជនសង្ស័យត្រូវបានចាប់ខ្លួន៣នាក់ ចំណែកម្នាក់ទៀតកំពុងរត់គេចខ្លួន ។
មុននឹងពួកគេធ្វើសកម្មភាពចាប់ពលការិនីខ្មែរយកទៅរំលោភនាយប់នោះ គឺពួកគេបានស្លៀកពាក់បន្លំខ្លួនធ្វើជាតម្រួតថៃ ហើយមកគោះទ្វារបន្ទប់ស្នាក់នៅរបស់ពលការិនីចំនួន៦នាក់ ក្នុងនោះពលការិនី៤នាក់នៅលីវ និង២នាក់មានប្ដី ស្នាក់នៅក្នុងបន្ទប់ជាមួយគ្នា នៅផ្សាររុងក្លឿ ទឹកដីថៃ ។ ជនជាតិថែដែលបន្លំខ្លួនធ្វើជាតម្រួតនោះ បានហៅពលការិនីខ្មែរតែ៤នាក់ដែលនៅលីវថា យកទៅសួរនាំពីការឆ្លងដែនចូលក្នុងទឹកដីរបស់គេ តើមានច្បាប់ទម្លាប់ដែរឬអត់ ។ ខណៈពួកគេនាំទៅដល់កន្លែងស្ងាត់ក៏ធ្វើសកម្មភាពចាប់រំលោភរហូតបានសម្រេចតែម្ដង ។ លុះព្រឹកឡើងថ្ងៃទី២៤ កក្កដា ទើបពលការិនីរងគ្រោះទាំងអស់នោះមកប្ដឹងតម្រួតថៃឱ្យជួយអន្ដរាគមន៍រកយុត្ដិធម៌ ។
ប្រភពព័ត៌មានពីមន្ដ្រីទំនាក់ទំនងព្រំដែនកម្ពុជា-ថៃ ដែលឈរជើងនៅច្រកទ្វារអន្ដរជាតិប៉ោយប៉ែត បានឱ្យដឹងថា ជនជាតិថៃដែលចាប់ពលការិនីខ្មែរយកទៅរំលោភរហូតបានសម្រេចនោះ ក្រោយមកត្រូវសមត្ថកិច្ចថៃស្វែងរកចាប់ខ្លួនបានចំនួន៣នាក់ កាលពីរសៀលថ្ងៃទី២៤ កក្កដា និងកំពុងសួរនាំនៅកន្លែងតម្រួតថៃក្នុងស្រុកអារញ្ញប្រាថេត ខេត្ដស្រះកែវ ។ ចំណែកបក្សពួកម្នាក់ទៀតបានរត់គេចខ្លួនបាត់ ។ ជនជាតិថៃដែលត្រូវចាប់ខ្លួនមាន ១-ឈ្មោះ ណាយ ថានុត កនឌីនី អាយុ ៣១ឆ្នាំ រស់នៅក្នុងខេត្ដឡុងបូរី ២-ឈ្មោះ ណាយ អ៊ុកថី ហៅឡេង ណងសា អាយុ៣៣ឆ្នាំ រស់នៅខេត្ដរយអេត និង៣-ឈ្មោះ ណាយ ធីតដាំងើយ អាយុ ៣០ឆ្នាំ រស់នៅក្រុងបាងកក ។
ប្រភពដដែលបន្ដថា ស្រ្ដីខ្មែរជាពលការិនីទាំងនេះឆ្លងដែនចូលទៅទឹកដីថៃបម្រុងទៅរកការងារធ្វើ និងជួលបន្ទប់ស្នាក់នៅជិតផ្សាររុងក្លឿ ស្រុកអារញ្ញ ខេត្ដស្រះកែវ ប្រទេសថៃ ដើម្បីរង់ចាំថៅកែជនជាតិថៃមកទទួលយកទៅធ្វើការនៅក្រុងបាងកក ។ ចំពោះពលការិនីខ្មែររងគ្រោះកំពុងត្រូវបានស្ថានកុងស៊ុលខ្មែរប្រចាំនៅខេត្ដស្រះកែវ ប្រទេសថៃ យកចិត្ដទុកដាក់ការពារដល់សុវត្ថិភាពរបស់ពួកគេផងដែរនាពេលនេះ ៕
ចែករំលែកព័តមាននេះ