រាជធានីភ្នំពេញ ៖ យោងតាមមន្ត្រីជាន់ខ្ពស់នៃរដ្ឋសភា បានឱ្យដឹងកាលពីរសៀលថ្ងៃទី២៥ កក្កដា ថា គណៈកម្មាធិការអចិន្ត្រៃយ៍រដ្ឋសភា ដែលមានសមាសភាព១២រូប ដឹកនាំដោយសម្តេចពញាចក្រី ហេង សំរិន ប្រធានរដ្ឋសភា បានកោះប្រជុំបន្ទាន់ ដើម្បីផ្តល់សុពលភាព ដល់លោក សម រង្ស៊ី ជាបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ នៅមណ្ឌលខេត្តកំពង់ចាម ។ ការប្រជុំនេះ បានធ្វើឡើងបន្ទាប់ពីគណៈកម្មាធិការជាតិរៀបចំការបោះឆ្នោត ផ្ញើលិខិតទទួលស្គាល់លោក សម រង្សុី ជាបេក្ខភាពជាប់ឆ្នោតតំណាងរាស្ត្រថ្មីរបស់គណបក្សសង្គ្រោះជាតិ នៅមណ្ឌលខេត្តកំពង់ចាម ។
លោក អុឹម សួស្តី ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី២៥ កក្កដា ឆ្នាំ២០១៤ បានផ្ញើលិខិតមួយច្បាប់ទៅប្រធានរដ្ឋសភាកម្ពុជា សម្តេច ហេង សំរិន អំពីការលុបឈ្មោះបេក្ខជនជាប់ឆ្នោតតំណាងរាស្ត្រ បេក្ខជនតំណាងរាស្ត្រ ការទទួលស្គាល់ បញ្ជីបេក្ខជនជាប់ឆ្នោតតំណាងរាស្ត្ររបស់គណបក្សសង្គ្រោះជាតិ (CNRP) មណ្ឌលខេត្តកំពង់ចាម ។លិខិត គ.ជ.ប បានបញ្ជាក់ថា បេក្ខជនជាប់ឆ្នោតតំណាងរាស្ត្រ និងបេក្ខជនតំណាងរាស្ត្រមណ្ឌលខេត្តកំពង់ចាម របស់គណបក្សសង្គ្រោះជាតិ នីតិកាលទី៥មួយចំនួន បានលាលែង និងមួយចំនួនទៀត ត្រូវបានគណបក្សលុបឈ្មោះចេញពីបញ្ជីគណបក្ស ។ គណបក្សក៏បានស្នើសុំ គ.ជ.ប ចុះបញ្ជីបេក្ខជនបម្រុងបន្ថែមនៃគណបក្ស សម្រាប់បេក្ខជនតំណាងរាស្ត្រ មណ្ឌលខេត្តកំពង់ចាម នីតិកាលទី៥ ។
គណៈកម្មាធិការជាតិរៀបចំការបោះឆ្នោត (គ.ជ.ប) មានសមាជិក៩រូប បានជួបប្រជុំ នាព្រឹកថ្ងៃទី២៥ កក្កដា ដោយបានសម្រេចទទួលស្គាល់បញ្ជីឈ្មោះបេក្ខជនជាប់ឆ្នោតតំណាងរាស្ត្រថ្មី របស់គណបក្សសង្គ្រោះជាតិ នៅ មណ្ឌលខេត្តកំពង់ចាម ដែលបានលាឈប់ និងដាក់ជំនួសថ្មី ដែល (គ.ជ.ប) បានទទួលស្គាល់បេក្ខភាពលោក សម រង្ស៊ី ជាបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិលំដាប់លេខរៀងទី២ នៅមណ្ឌលកំពង់ចាម ។ លោក សម រង្ស៊ី ត្រូវបានគេដាក់ឈ្មោះជំនួសលោក គួយ ប៊ុនរឿន ជាបេក្ខជនជាប់ឆ្នោតតំណាងរាស្ត្រមណ្ឌលកំពង់ចាម ។ ចំណែក លោក គួយ ប៊ុនរឿន តំណាងរាស្ត្រមណ្ឌលកំពង់ចាម ត្រូវទៅធ្វើជាបេក្ខភាពសមាជិក គ.ជ.ប ។
ស្របពេលជាមួយគ្នានេះដែរ នៅព្រឹកថ្ងៃទី២៥ កក្កដា គ.ជ.ប បានបើកកិច្ចប្រជុំជាបន្ទាន់មួយ និងបានសម្រេចលើការផ្លាស់ប្តូរបញ្ជីឈ្មោះបេក្ខជនតំណាងរាស្ត្ររបស់គណបក្សសង្គ្រោះជាតិទាំង២៧រូបនៅខេត្តកំពង់ចាម ។ ក្នុងនោះ លោក សម រង្ស៊ី ត្រូវបានចុះឈ្មោះជាបេក្ខជនជាប់ឆ្នោតតំណាងរាស្ត្រ លំដាប់លេខរៀងទី១ នៅខេត្តកំពង់ចាម របស់គណបក្សសង្គ្រោះជាតិ ។ ការបោះឆ្នោតកាលពីថ្ងៃទី២៨ កក្កដា ឆ្នាំ២០១៣ បង្ហាញថា នៅខេត្តកំពង់ចាម គណបក្សសង្គ្រោះជាតិ មានបេក្ខជនជាប់ឆ្នោតតំណាងរាស្ត្រចំនួន១០រូប ក្នុងចំណោម១៨អាសនៈ ។
លោក កឹម សុខា អនុប្រធានគណបក្សសង្គ្រោះជាតិថ្លែងប្រាប់អ្នកកាសែតនៅឯសាលាដំបូងរាជធានីភ្នំពេញថា កិច្ចព្រមព្រៀងរវាងគណបក្សសង្គ្រោះជាតិ និងគណបក្សប្រជាជនកម្ពុជា កាលពីថ្ងៃទី២២ កក្កដា ឆ្នាំ២០១៤ គ្រាន់តែជាគោលការណ៍តែប៉ុណ្ណោះ ។ គណបក្សទាំងពីរ នឹងបង្កើតក្រុមការងារចំនួន៣ ដើម្បីជជែកឱ្យលម្អិត ទី១-ក្រុមការងារធ្វើវិសោធនកម្មរដ្ឋធម្មនុញ្ញ ទី២-ក្រុមការងារធ្វើវិសោធនកម្មបទបញ្ជាផ្ទៃក្នុងរដ្ឋសភា និងទី៣-ក្រុមការងារធ្វើវិសោធនកម្មច្បាប់បោះឆ្នោត ។ លោក កឹម សុខា បញ្ជាក់ថា នៅពេលណាដែលក្រុមការងារទាំង៣ បញ្ចប់ការងាររបស់ខ្លួន ទើបគណបក្សសង្គ្រោះជាតិចូលសភា ។
យោងតាមសេចក្តីប្រកាសព័ត៌មានស្តីពីលទ្ធ ផលកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ត្រូវបានអគ្គលេខាធិការដ្ឋានរដ្ឋសភាប្រកាសថា នៅថ្ងៃសុក្រ ទី២៥ កក្កដា វេលាម៉ោង៣រសៀល គណៈកម្មាធិការអចិន្ត្រៃយ៍រដ្ឋសភានៃព្រះរាជាណាចក្រកម្ពុជា បានប្រជុំក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ដែលមានលទ្ធផលដូចខាងក្រោម ៖
១-អង្គប្រជុំបានឯកភាពលើសំណើសុំប្រកាសសុពលភាពនៃអាណត្តិរបស់លោក សម រង្ស៊ី ជាសមាជិករដ្ឋសភា នីតិកាលទី៥ ។
២-អង្គប្រជុំបានសម្រេចប្រគល់ភារកិច្ចជូនគណៈកម្មការនីតិកម្ម និងយុត្តិធម៌ នៃរដ្ឋសភាពិនិត្យ និងសិក្សាលើការស្នើសុំធ្វើវិសោធនកម្មប្រការ៦ថ្មី នៃបទបញ្ជាផ្ទៃក្នុងនៃរដ្ឋសភា ។
៣-អង្គប្រជុំបានកំណត់កាលបរិច្ឆេទសម័យប្រជុំពេញអង្គរដ្ឋសភាជាវិសាមញ្ញ នីតិកាលទី៥ នៅថ្ងៃចន្ទ ទី២៨ ខែកក្កដា ឆ្នាំ២០១៤ វេលាម៉ោង៨ព្រឹក ដើម្បីប្រកាសសុពលភាពនៃអាណត្តិរបស់លោកសម រង្ស៊ី ជាសមាជិករដ្ឋសភានីតិកាលទី៥ ៕
ចែករំលែកព័តមាននេះ