ខេត្តកំពង់ចាម ៖ ជនសង្ស័យចំនួន៣នាក់ ត្រូវបានកម្លាំងសមត្ថកិច្ចឃាត់ខ្លួន នាព្រឹកថ្ងៃទី២៤ កក្កដា២០១៤ ដោយជាប់ចោទពីបទឆបោកប្រាក់ បញ្ចាំរថយន្តចំនួន ១ម៉ឺនដុល្លារ ស្ថិតនៅភូមិស្ពឺកើតឃុំស្ពឺ ស្រុកចំការលើ ត្រូវបានបញ្ជូនមកកាន់ ស្នងការដ្ឋាននគរបាលខេត្ត ដើម្បីសួរនាំ ។
លោកវរសេនីយ៍ទោ សុខ សំបូរ នាយការិយាល័យព្រហ្មទណ្ឌកម្រិតស្រាលខេត្ត បានប្រាប់ឲ្យដឹងថាក្រុមឆបោកទាំង៣នាក់នោះមាន ១-ឈ្មោះ អ៊ួក ពៅ ភេទប្រុស អាយុ ៣២ ឆ្នាំ ២-ប្រពន្ធឈ្មោះពុំ ចិន្តា អាយុ៣៣ឆ្នាំ នៅភូមិត្រមូល ឃុំត្រមែង ស្រុកឈូក ខេត្តកំពត ៣-ឈ្មោះ នៅ ជា ភេទប្រុស អាយុ២២អ្នកបើករថយន្ត នៅភូមិប្រាសាទ ឃុំតាំងក្រាំង ស្រុកបាធាយ ខេត្តកំពង់ចាម ។
លោកវរសេនីយ៍ទោ សុខ សំបូរ នាយការិយាល័យព្រហ្មទណ្ឌកម្រិតស្រាលខេត្ត បានប្រាប់បន្តថាមានមនុស្សចំនួន៤នាក់ បាននាំគ្នាជិះរថយន្ត១គ្រឿងម៉ាកហ៊ីយ៉ាន់ដាយ ចំណុះ៥តោនពាក់ស្លាកលេខភ្នំពេញ3B-9214 ចេញមកពីរាជធានីភ្នំពេញ ក្នុងនោះមានទាំងឈ្មោះ សន សារ៉ា ភេទប្រុស អាយុ៣៣ឆ្នាំនៅក្រុមទី១៥ សង្កាត់ទួលស្វាយព្រៃ ខណ្ឌចំការមន រាជធានីភ្នំពេញ នៅវេលាម៉ោង២២និង៣០នាទីយប់ ថ្ងៃទី២៣ កក្កដា ២០១៤ ដោយឈ្មោះ សារ៉ា យករថយន្តទៅបញ្ចាំតម្លៃ១ម៉ឺនដុល្លារ នៅផ្ទះរបស់ស្ត្រីឈ្មោះ ហ៊ាង វ៉ាន់លីជង់ អាយុ៣៧ ឆ្នាំ នៅភូមិស្ពឺកើត ឃុំស្ពឺ ស្រុកចំការលើ ដោយមានឯកសារត្រឹមត្រូវ បន្ទាប់មកគេចខ្លួនបាត់ ។
ស្រាប់តែនៅវេលាម៉ោង៧ និង១២នាទីព្រឹក ថ្ងៃទី២៤ កក្កដាស្រ្តីឈ្មោះ លី ជង់ បានមកប្តឹងប៉ុស្តិ៍រដ្ឋបាលឃុំស្ពឺ ដើម្បីឲ្យជួយអន្តរាគមន៍ដោយមាន២នាក់ប្រពន្ធចេញមកអះអាងថារថយន្ត ដែលបញ្ចាំខាងលើជារបស់ពួកគេទៅវិញ ។ តែមិនមានឯកសារច្បាស់លាស់នោះទេ ដោយមានការឯកភាពពីលោក ហួត វុទ្ធី ព្រះរាជអាជ្ញាអមសាលាដំបូងខេត្ត បានអនុញ្ញាតឲ្យសមត្ថកិច្ច ឃាត់ជនសង្ស័យទាំង៣នាក់ខាងលើ ពីបទឆបោកប្រាក់១ម៉ឺនដុល្លារ ចំណែកអ្នកមកបញ្ចាំវិញបានរត់គេចខ្លួនបាត់ស្រមោល ។
ចែករំលែកព័តមាននេះ