នៅទីក្រុងគែរ ជាកន្លែងលោកជួបជាមួយរដ្ឋមន្ត្រីការបរទេសអាមេរិក លោក ចន ឃ័ររី នោះលោក បាន គីមូន មានប្រសាសន៍ថា ហេតុអ្វីក៏លោកអ្នកបន្តសម្លា.ប់ប្រជាជនអ្នក ? មានវិធីជាច្រើនដើម្បីដោះស្រាយបញ្ហានេះ ដោយមិនចាំបាច់សម្លា.ប់ប្រជាជនលោកអ្នក ។ អ្វីដែលលោកអ្នកកំពុងធ្វើញុំាងឱ្យខ្ញុំខឹង ។
កងទ័ពអុីស្រាអែល កាលពីថ្ងៃទី២៤ កក្កដា បានវាយប្រហារលើភាគខាងជើងជ្រោយហ្គាហ្សា ត្រូវចំសាលារៀនមួយគ្រប់គ្រងដោយអ.ស.ប ជាកន្លែងស្នាក់នៅរបស់ជនភៀសខ្លួនប៉ាឡេស្ទីនជាច្រើននាក់ បណ្តាលឱ្យមនុស្សស្លាប់យ៉ាងតិច១៥នាក់ ហើយច្រើននាក់ទៀតត្រូវរបួស ។
អគ្គលេខាធិការ អ.ស.ប លោក បាន គីមូន បានសម្តែងការក្តុកក្តួលយ៉ាងខ្លាំងចំពោះការសម្លាប់ជនស៊ីវិលបែបនេះ ។ លោកឆ្លៀតឱកាសនោះអំពាវនាវជាថ្មីឱ្យមានបទឈប់បាញ់គ្នារវាងអុីស្រាអែល និងក្រុមហាម៉ាស់ ព្រមទាំងក្រុមប៉ាឡេស្ទីនឯទៀតៗ ។
នៅទីក្រុងគែរ ជាកន្លែងលោកជួបជាមួយរដ្ឋមន្ត្រីការបរទេសអាមេរិក លោក ចន ឃ័ររី នោះលោក បាន គីមូន មានប្រសាសន៍ថា ហេតុអ្វីក៏លោកអ្នកបន្តសម្លាប់ប្រជាជនអ្នក ? មានវិធីជាច្រើនដើម្បីដោះស្រាយបញ្ហានេះ ដោយមិនចាំបាច់សម្លាប់ប្រជាជនលោកអ្នក ។ អ្វីដែលលោកអ្នកកំពុងធ្វើញុំាងឱ្យខ្ញុំខឹង ។
ការវាយប្រហារលើភាគខាងជើងជ្រោយហ្គាហ្សាកាលពីថ្ងៃទី២៤ កក្កដា ធ្វើឱ្យចំនួនជនប៉ាឡេស្ទីន ដែលស្លាប់ចាប់តាំងពីថ្ងៃទី៨ កក្កដា មក ឡើងដល់៧៦២នាក់ហើយ ។ ចំណែកខាងអុីស្រាអែលវិញ បាត់បង់ទាហានយ៉ាងតិច៣២នាក់ ក្នុងការប៉ះទង្គិចគ្នា និងក្នុងការបាញ់គ្រាប់រ៉ុក្កែតរបស់ពួកប៉ាឡេស្ទីន ហើយជនស៊ីវិលអុីស្រាអែល៣នាក់ក៏ស្លាប់ដែរ ។
អ្នកនាំពាក្យក្រសួងសុខាភិបាលនៅហ្គាហ្សា លោក អាស្រាវ អាល់ គីដ្រា បញ្ជាក់ថា ការវាយប្រហារប្រឆាំងសាលារៀនខាងលើនោះក្រៅពីមនុស្សស្លាប់១៥នាក់ មនុស្សដល់ទៅ២០០នាក់ទៀត ត្រូវរបួសបញ្ជូនមកកាន់មន្ទីរពេទ្យនានានៅតំបន់បេអុីតអានូន ។
នារីម្នាក់ស្នាក់នៅសាលារៀនដែលរងការវាយប្រហារ បានរៀបរាប់ប្រាប់រ៉យទ័រថា យើងកំពុងអង្គុយលេងពេលគ្រាប់ផ្លោង៤គ្រាប់ធ្លាក់លើយើង ។ មានមនុស្សស្លាប់រដូករណែលនៅលើដី លាយនឹងសម្រែកអ្នកត្រូវរបួស ។ កូនប្រុសខ្ញុំម្នាក់ត្រូវស្លាប់យ៉ាងខ្លោចផ្សារ ហើយបណ្តាសាច់ញាតិខ្ញុំត្រូវរបួស ក្នុងនោះមានទាំងកូនឯទៀតៗរបស់ខ្ញុំផង ។
នៅភាគខាងត្បូងជ្រោយហ្គាហ្សា ភូមិចំនួន២ គឺភូមិ Khouzaa និងភូមិ Abassan ត្រូវកាត់ផ្តាច់ការទាក់ទងពីខាងក្រៅ ចាប់តាំងពីច្រើនថ្ងៃមកហើយ ដោយសារការបាញ់ផ្លោងរបស់កងរថក្រោះអុីស្រាអែល រួចពួកអ្នករបួសពុំអាចជម្លៀសចេញបានឡើយ ។
ក្រុមហាម៉ាស់ នាថ្ងៃទី២៤ កក្កដា បានបន្តបាញ់គ្រាប់រ៉ុក្កែតដាក់ដែនដីអុីស្រាអែល ហើយអះអាងថា បានដាក់ការពួនស្ទាក់វាយប្រហារមួយលើកងល្បាតអុីស្រាអែលនៅភាគខាងជើងជ្រោយហ្គាហ្សា ។
ភាគីទាំង២ ក្នុងជម្លោះហាក់ពុំត្រៀមចុះហត្ថលេខាលើបទឈប់បាញ់គ្នាដ៏ស្ថិតស្ថិរមួយឡើយ។ ជាថ្នូរនឹងបទឈប់បាញ់គ្នាបែបនោះ ក្រុមហាម៉ាស់ទាមទារឱ្យអុីស្រាអែលលុបចោលការហ៊ុមព័ទ្ធជ្រោយហ្គាហ្សា ៕
ចែករំលែកព័តមាននេះ