អាជ្ញាធរបារាំងនិយាយកាលពីព្រឹកថ្ងៃទី២៥ កក្កដា ថា បំណែកយន្តហោះមួយគ្រឿងរបស់ក្រុមហ៊ុនអាកាសចរណ៍អាល់ហ្សេរី ដែលបាត់ដាន កាលពីថ្ងៃទី២៤ កក្កដា ជាមួយមនុស្សជិះក្នុងនោះ១១៦នាក់ ត្រូវបានប្រទះឃើញនៅប្រទេសម៉ាលី ។ យោងតាមទូរទស្សន៍រដ្ឋម៉ាលី និងវិមានប្រធានាធិបតីបារាំងថា បំណែកយន្តហោះនោះត្រូវបានប្រទះឃើញក្នុងតំបន់មួយ ស្ថិតនៅចន្លោះទីក្រុង Gossi របស់ម៉ាលី និងព្រំដែនប៊ួកាណាហ្វាសូ ។
Gossi ជាទីក្រុងតូចមួយស្ថិតនៅខាងត្បូងទីក្រុង Gao ។ ទាហានបារាំងមួយកង ត្រូវបានបញ្ជូនទៅកាន់ទីនោះ ដើម្បីធានាសន្តិសុខតំបន់យន្តហោះធ្លាក់ ហើយប្រមូលព័ត៌មាននានា ។ វិមានប្រធានាធិបតីបារាំងបញ្ជាក់ទៀតថា បំណែកនោះពិតជាបំណែករបស់យន្តហោះអាល់ហ្សេរី ទោះបីជាយន្តហោះត្រូវបែកជាច្រើនបំណែកក្តី ។
ចំណែកឧត្តមសេនីយ៍ Gilbert Diendere សមាជិកក្រុមគ្រប់គ្រងវិបត្តិប៊ួគីណា ហ្វាសូ គូសបញ្ជាក់ថាក្រុមរបស់លោកបានពិនិត្យរួចហើយនូវបំណែកនោះ ដែលស្ថិតនៅជិតភូមិ Boulikessi ចម្ងាយ៥០គីឡូម៉ែត្រ ពីព្រំដែន ។ក្រុមលោក អះអាងពីការបានឃើញបំណែកនៃយន្តហោះដែលត្រូវភ្លើងឆេះហ្មត់ ហើយបំណែកខ្ទាតរ៉ាយប៉ាយលើដី ។ សាកសពមនុស្សទាំងឡាយត្រូវបានរកឃើញ ។ តែគួរឱ្យសោកស្តាយ ក្រុមលោកពុំឃើញមានមនុស្សណាម្នាក់នៅកន្លែងយន្តហោះធ្លាក់ឡើយ ពោលគឺពុំបានឃើញអ្នកនៅរស់រានមានជីវិតទេ ។
ប្រធានាធិបតីប៊ួគីណាហ្វាសូ លោក Blaise Compaore ប្រកាសពីការកាន់មរណទុក្ខជាតិ ចំនួន២ថ្ងៃ ចាប់ពីថ្ងៃទី២៥ កក្កដា ទៅ ។
យោងតាមអ្នកទទួលខុសត្រូវមូលដ្ឋានឯក្រុង Gossi ថា ពួកអ្នកឃ្វាលគោជិតភូមិមួយបានឃើញយន្តហោះធ្លាក់ ហើយរាយការណ៍ប្រាប់អាជ្ញាធរ ៕
ចែករំលែកព័តមាននេះ