រាជធានីភ្នំពេញ ៖ ទោះបីនៅសល់មួយថ្ងៃទៀត(អាទិត្យទី២៧ កក្កដា)ការប្រកួតបាល់ទាត់Metfone Cambodian League 2014 ឈានចូលទីបញ្ចប់ ក៏ក្រុមជើងឯកលើកពានរដូវកាលនេះត្រូវគេដឹងរួចហើយគឺក្រុមភ្នំពេញក្រោន ឯក្រុមទទួលចំណាត់ថ្នាក់លេខ២ គឺចម្ការកៅស៊ូបឹងកេត តែក្រុមចំណាត់ថ្នាក់លេខ៣ និងលេខ៤ មិនទាន់ដឹងថា បានទៅលើក្រុមណាមួយនៅឡើយទេ ។
សម្រាប់ការប្រកួតនារសៀលថ្ងៃសៅរ៍នៅទីលានស្ដាតចាស់ចាប់ផ្ដើមនៅម៉ោង១៣និង៣០នាទីគឺក្រុមបាល់ទាត់សាកលវិទ្យាល័យអាស៊ីអឺរ៉ុប ត្រូវជួបប្រកួតជាមួយក្រុមគីរីវង់សុខសែនជ័យ ខណៈមួយប្រកួតទៀតក្រុមខេត្ដស្វាយរៀង ត្រូវជួបប្រកួតជាមួយក្រុមក្រសួងការពារជាតិ ។ នេះជាការប្រកួតលើកចុងក្រោយរបស់ក្រុមសាកលវិទ្យាល័យអាស៊ីអឺរ៉ុប និងក្រុមចំនួន៧ផ្សេងទៀត ។ ដោយលេងបាន២១ប្រកួតក្រុមសាកលវិទ្យាល័យអាស៊ីអឺរ៉ុប មាន២៣ពិន្ទុ គឺឈ្នះ៥ប្រកួត ស្មើ៨ប្រកួត ចាញ់៨ប្រកួត ស្ថិតនៅក្នុងចំណាត់ថ្នាក់លេខរៀងទី៩ក្នុងតារាង ។
ចំណែកក្រុមគីរីវង់សុខសែនជ័យវិញ លេងបាន២១ប្រកួតដូចគ្នា គឺឈ្នះ៣ប្រកួត ស្មើ៤ប្រកួត ចាញ់១៤ប្រកួត មាន១៣ពិន្ទុប៉ុណ្ណោះ ស្ថិតនៅចំណាត់ថ្នាក់លេខរៀងទី១១នៃតារាង ។ ចំពោះក្រុមខេត្ដស្វាយរៀង ពេលនេះកំពុងតែមានពិន្ទុប្រកៀកជាមួយក្រុមណាហ្គាខប ដោយលេងបាន២១ប្រកួត មាន៣៦ពិន្ទុគឺចាញ់ណាហ្គាខប១ពិន្ទុប៉ុណ្ណោះ ក្នុងនោះឈ្នះ១០ប្រកួត ស្មើ៦ប្រកួត និងចាញ់៥ប្រកួត ឈរនៅលេខរៀងទី៤នៃតារាង ។ លទ្ធផលនេះអាចនិយាយបានថា ក្រុមទាំង២កំពុងប្រជែងគ្នាដណ្ដើមចំណាត់ថ្នាក់លេខ៣ បើក្រុមណាធ្លោយឱ្យចាញ់គូប្រកួតនៅមួយប្រកួតចុងក្រោយនោះ នឹងបាត់បង់តំណែងលេខ៣មិនខាន ។
ចំណែកក្រុមក្រសួងការពារជាតិ ពេលនេះលេងបាន២១ប្រកួតមាន២៣ពិន្ទុគឺឈ្នះ៥ប្រកួត ស្មើ៨ប្រកួត និងចាញ់៨ប្រកួត ឈរនៅលេខរៀងទី៨ក្នុងតារាង ។ សម្រាប់ការប្រកួតនៅទីលានពហុកីឡដ្ឋានជាតិឯណេះវិញចាប់ផ្ដើមនៅវេលាម៉ោង១៥និង៣០នាទីដែលមានក្រុមត្រាយអាស៊ី ប្រកួតជាមួយក្រុមអគ្គស្នងការដ្ឋាននគរបាលជាតិ និងមួយប្រកួតទៀតក្រុមវេស្ទើនយូនីអែហ្វស៊ី ជួបប្រកួតជាមួយក្រុមបៀលប្រាយយូណាយធីត ។ ក្រុមត្រាយអាស៊ី លេងបាន២១ប្រកួត កន្លងមក គឺឈ្នះ៩ប្រកួត ស្មើ៤ប្រកួត និងចាញ់៨ប្រកួត មាន៣១ពិន្ទុ ស្ថិតនៅលេខរៀងទី៥ក្នុងតារាង ខណៈដែលក្រុមអគ្គស្នងការដ្ឋាននគរបាលជាតិ លេងបាន២១ប្រកួត កន្លងមក មាន២៨ពិន្ទុ គឺឈ្នះ៧ប្រកួត ស្មើ៧ប្រកួត និងចាញ់៧ប្រកួត ឈរនៅលេខរៀងទី៦បន្ទាប់ពីក្រុមត្រាយអាស៊ី ។
ចំណែកក្រុមវេស្ទើនយូនីអែហ្វស៊ី លេងបាន២១ប្រកួតមាន១៩ពិន្ទុ គឺឈ្នះ៤ប្រកួត ស្មើ៧ប្រកួត និងចាញ់១០ប្រកួត ស្របពេលដែល២១ប្រកួតរបស់ក្រុមបៀលប្រាយយូណាយធីត មាន២៧ពិន្ទុ ឈ្នះ៧ប្រកួត ស្មើ៦ប្រកួត និងចាញ់៨ប្រកួត ។ ដូច្នេះ សូមរង់ចាំតាមដានទាំងអស់គ្នា តើក្រុមណាហ្គាខប ឬក្រុមខេត្ដស្វាយរៀងទទួលបានចំណាត់ថ្នាក់លេខ៣ ពីព្រឹត្ដិការណ៍បាល់ទាត់លីកកំពូលរដូវកាល២០១៤ នេះ ខណៈក្រុមជើងឯក និងជើងឯករងគេបានរកឃើញរួចទៅហើយនិងត្រូវប្រកួតបង្គ្រប់កិច្ចនៅថ្ងៃអាទិត្យទី២៧ កក្កដា ស្អែកនេះ ៕
ចែករំលែកព័តមាននេះ