ខេត្តកំពង់ចាម ៖ ក្នុងរយៈពេល២ថ្ងៃ គឺ២៤ និង២៥ កក្កដា ២០១៤ លោក ហេង វណ្ណនី អភិបាលស្រុកស្រីសន្ធរអមដំណើរដោយអភិបាលរងស្រុក នគរបាលស្រុក អាវុធហត្ថ ព្រមទាំងអាជ្ញាធរមូលដ្ឋានជាច្រើននាក់បានចុះជួយរុះរើផ្ទះប្រជាពលរដ្ឋនៅភូមិគគីរ ឃុំកោះអណ្តែត ស្រុកស្រីសន្ធរដើម្បីគេចពីការគំរាមកំហែងគ្រោះទឹកជំនន់ បាក់ច្រាំងទន្លេមេង្គទៅរកទីកន្លែងសុវត្ថិភាព។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរ បានប្រាប់ឲ្យដឹងថា ដោយទទួលបានការណែនាំពីសំណាក់លោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត ក្នុងវិធានការចុះជួយអន្តរាគមន៍ដល់ប្រជាពលរដ្ឋរស់នៅតាមជួរដងទន្លេមេគង្គដែលរងគ្រោះដោយទឹកជំនន់រូបលោក
បានត្រៀមនូវលក្ខណសម្បតិ្តគ្រប់បែបយ៉ាងផ្នែកមនុស្សធម៌មិនប្រកាន់និន្នាការនយោបាយក្នុងការជម្លៀសប្រជាជនទៅកាន់ទីទួលសុវត្ថិភាព ។
លោកវរសេនីយ៍ត្រី ខេង ស្រេង បានប្រាប់បន្តថា នៅថ្ងៃទី២៤ កក្កដា លោកអភិបាលស្រុកស្រីសន្ធរ និងរូបលោក ព្រមទាំងមន្រ្តីរាជការជាច្រើននាក់បានចុះទៅពិនិត្យពីស្ថានភាពទឹកជំនន់នៅភូមិគគីរ ឃុំកោះអណ្តែត ដោយមានផ្ទះចំនួន១១២ខ្នងកំពុងតែទទួលរងផលប៉ះពាល់ដោយច្រាំងទន្លេចេះ
បាក់ខិតមកជិត និងផ្ទះរបស់ប្រជាជន ។ ជាមួយនោះអ្នកស្រុក និងសមត្ថកិច្ចបាននាំគ្នារុះរើផ្ទះជាបន្ទាន់បានចំនួន១៣ខ្នង ត្រូវបានរុះទាន់ពេលវេលាមិនបណ្តាលឲ្យបាក់ធ្លាក់ចូលទៅក្នុងទន្លេនោះទេ។ នៅព្រឹកថ្ងៃទី២៥ កក្កដា លោកអភិបាលស្រុកបានបន្តដឹកនាំកម្លាំងសម្ថកិច្ចចុះទៅកាន់ទីនោះបន្តទៀតដើម្បីជួយរុះផ្ទះប្រជាពលរដ្ឋធ្វើយ៉ាងណាគេចឲ្យផុតពីគ្រោះថ្នាក់ទាំងផ្ទះសម្បែង និងអាយុជីវិតផងដែរ ។
លោកថាជារឿយៗនៅភូមិគគីរនេះតែងតែបាក់ច្រាំងទន្លេនៅក្នុងរដូវវស្សាម្តងៗ តែពីមុនមិនមានសភាពធ្ងន់ធ្ងរដូចឆ្នាំ២០១៤នេះឡើយ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ