រាជធានីភ្នំពេញ ៖ ជនជាប់ចោទឈ្មោះ ហេង ឆន់ ភេទប្រុស អាយុ៤៨ឆ្នាំ និងប្រពន្ធឈ្មោះសំ ណាង អាយុ៣៥ឆ្នាំ ត្រូវបានសាលាដំបូងរាជធានីភ្នំពេញ កាលពីព្រឹកថ្ងៃទី២៥ កក្កដា សម្រេចផ្តន្ទាទោសដាក់ពន្ធនាគារម្នាក់ៗចំនួន១៥ឆ្នាំ ពីបទ«នាំចេញដោយមានគោលដៅក្នុងការទិញទារកអាយុ៧ខែយកសុំទាននៅប្រទសម៉ាឡេស៊ី» ក្នុងអំឡុងខែតុលា កាលពីឆ្នាំ២០១៣។
ការសម្រេចនេះ បន្ទាប់ពីតុលាការបានបើកសវនាការជាសាធារណៈដោយមានវត្តមាន លោកចៅក្រមជំនុំជម្រះ តាំង ស៊ុនឡាយ លោកស្រី ស៊ឺ វណ្ណី ព្រះរាជអាជ្ញារងតំណាងអយ្យការ ជនជាប់ចោទប្តីប្រពន្ធ និងមេធាវីការពារក្តីជនជាប់ចោទ។
លោកចៅក្រមបានបញ្ជាក់ថា ជនជាប់ចោទជាប្តីឈ្មោះ ហេង ឆន់ និងប្រពន្ធឈ្មោះសំ ណាង ត្រូវបានចាប់ខ្លួនកាលពីខែវិច្ឆិកា ២០១៣ បន្ទាប់ពីប៉ូលិសបានឆែកឆេរនៅច្រកទ្វារអន្តរជាតិប៉ោយប៉ែត ពេលដែលពួកគេបាននាំក្មេងរងគ្រោះនិងមនុស្សមួយចំនួនទៀតក្នុងទិសដៅចេញទៅសុំទាននៅប្រទេសម៉ាឡេស៊ី។ តុលាការបានរកឃើញថា ជនជាប់ចោទពិតជាបានប្រព្រឹត្តដូចការចោទប្រកាន់របស់តុលាការមែន ហើយការសម្រេចរបស់តុលាការ គឺយោងតាមចម្លើយរបស់ជនជាប់ទាំងពីនាក់ សាក្សីនិងភស្តុតាងនានា។ លោកចៅក្រម បានលើកឡើងថា នៅក្នុងខែតុលា ២០១៣ ជនជាប់ចោទឈ្មោះ ហេង ឆន់ បានចំណាយលុយចំនួន៤០០ដុល្លារអាមេរិកក្នុងការទិញក្មេងស្រីរងគ្រោះពីក្រុមគ្រួសារក្រីក្រមួយនៅក្នុងសង្កាត់បឹងកេកកងទី៣ និងបាននាំទៅខេត្តកំពង់ស្ពឺ ហើយក្រោយមកបានយកនៅសុំទានចំនួនពីរដងមកហើយនៅក្នុងប្រទេសម៉ាឡេស៊ីអំឡុងខែតុលា ២០១៣។ ក្នុងកិច្ចការងារនេះឈ្មោះហេង ឆន់ បានឲ្យកុមារីរងគ្រោះទៅប្រពន្ធឈ្មោះ សំ ណាង ធ្វើឯកសារលិខិតកំណើតថាជាកូនរបស់ខ្លួន មុនពេលនាំចេញ។
គួររំលឹកថា កាលពីថ្ងៃទី៩ កក្កដា ២០១៤ សាលាដំបូងរាជធានីភ្នំពេញ បានលើកយកសំណុំរឿងព្រហ្មទណ្ឌស្តីពីបទ«ជូញដូរមនុស្សឆ្លងដែនដែលមានគោលដៅ» ករណីដែលជនជាប់ចោទប្តីប្រពន្ធត្រូវចោទថាបានទិញកូនក្មេងស្រី អាយុ៧ខែតម្លៃ៤០០ដុល្លារអាមេរិក។ ស្រ្តីជាប់ចោទឈ្មោះ សំ ណាង បាននិយាយថាគាត់បានសុំក្មេងម្នាក់ អាយុ៧ខែ នៅក្នុងសង្កាត់បឹងកេង៣ ខណ្ឌចំការមន និងបានផ្តល់បានប្រាក់ចំនួន៤០០ដុល្លារអាមេរិកឲ្យទៅម្តាយក្មេងនោះ ព្រោះឃើញគ្រួសារនេះក្រីក្រពេក តែបដិសេធថាមិនបានទិញក្មេងស្រីនោះទេ ៕
ចែករំលែកព័តមាននេះ