ខេត្តមណ្ឌលគិរី ៖ កុមារាអាយុ៤ឆ្នាំម្នាក់បានលង់ទឹកស្លាប់ និងម្នាក់ទៀតជួយសង្គ្រោះទាន់ ខណៈជីតារបស់គេពរដើរឆ្លងស្ពានរអិលជើងដួលធ្លាក់ចូលទឹកអូរ។ ហេតុការណ៍នេះបានកើតឡើងកាលពីវេលាម៉ោង៥ និង១២នាទីល្ងាច ថ្ងៃទី២៤ កក្កដា ២០១៤ ត្រង់ចំណុចភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ។
តាមប្រភពព័ត៌មានឲ្យដឹងថា មុនពេលកើតហេតុគេឃើញជីតារបស់ក្មេងរងគ្រោះបាននាំចៅប្រុសពីរនាក់ទៅលេងផ្ទះរបស់គាត់ ដោយដៃម្ខាងពរចៅម្នាក់ និងដៃម្ខាងដឹកដៃចៅម្នាក់ទៀត។ ប្រភពបន្តថា លុះពេលមកចំណុចអូរដែលមានទឹកហូរខ្លាំង ទាំងបីនាក់តានិងចៅ បានដើរឆ្លងស្ពាន តែនៅពេលដើរឆ្លងស្ពានក៏រអិលជើងធ្លាក់ចូលក្នុងទឹកអូរទាំងអស់គ្នា ព្រោះមេឃទើបនឹងភ្លៀងរួច ហើយស្ពានមានសភាពរអិល។
នៅពេលធ្លាក់ចូលទៅក្នុងទឹកអូរជីតារបស់កេ្មងរងគ្រោះក៏បាន ស្រវ៉ាចាប់បានដៃចៅប្រុសច្បងស្រង់មកគោកវិញ។ រីឯកុមារដែលរងគ្រោះស្លាប់នោះ បានលិចបាត់រាវរកពុំឃើញ។ រហូតជិតមួយម៉ោងក្រោយមក ទើបមានអ្នកស្រុកយកសំណាញ់ទៅបង់ជាប់សពយកទៅធ្វើបុណ្យតាមប្រពៃណី ដោយក្តីអាឡោះអាល័យបំផុតពីសំណាក់ម្តាយឪពុករបស់កុមាររងគ្រោះ។
សមត្ថកិច្ចបានឲ្យដឹងថា ក្មេងប្រុសដែលស្លាប់នោះឈ្មោះ អាន ម៉ៅ អាយុ៤ឆ្នាំ រស់នៅភូមិ-ឃុំកើតហេតុខាងលើ ហើយឪពុកជាកម្មករធ្វើសំណង់។ក្រុមគ្រូពេទ្យក៏បានឲ្យដឹងដែរថា បន្ទាប់ពីក្រុមគ្រួសាររាវរកឃើញក្មេងត្រូវទឹកកួចលង់ស្លាប់នោះភ្លាមៗ ក៏នាំយកមកសង្រ្គោះនៅមន្ទីរពេទ្យបង្អែកដែរ ប៉ុន្តែក្មេងនេះស្លាប់ប្រហែល៣០នាទីកន្លងទៅហើយមិនអាចជួយសង្រ្គោះបានឡើយ៕
ចែករំលែកព័តមាននេះ