រាជធានីភ្នំពេញ ៖ នៅថ្ងៃអាទិត្យ ទី២៧ កក្កដាស្អែកនេះ កីឡាករជើងចាស់ពីររូប គឺកីឡាករសរ សី មកពីសមាគមកីឡាប្រដាល់ក្រសួងការពារជាតិ និងកីឡាករពេជ្រ អារុណ មកពីក្លិបសម្រែករាជសីហ៍បង្ក្រាបគ្រឿងញៀន នឹងត្រូវប៉ះគ្នា ។ ពួកគេជួបគ្នានៅសង្វៀនទូរទស្សន៍អាស៊ីអាគ្នេយ៍ (SEATV) ដើម្បីរំលេចការប្រកួតដណ្ដើមខ្សែក្រវាត់ស្រាបៀរកម្ពុជារបស់កីឡាករ៤រូបទៀតឱ្យកាន់តែមានការចាប់អារម្មណ៍ ។
រាជធានីភ្នំពេញ ៖ នៅថ្ងៃអាទិត្យ ទី២៧ កក្កដាស្អែកនេះ កីឡាករជើងចាស់ពីររូប គឺកីឡាករសរ សី មកពីសមាគមកីឡាប្រដាល់ក្រសួងការពារជាតិ និងកីឡាករពេជ្រ អារុណ មកពីក្លិបសម្រែករាជសីហ៍បង្ក្រាបគ្រឿងញៀន នឹងត្រូវប៉ះគ្នា ។ ពួកគេជួបគ្នានៅសង្វៀនទូរទស្សន៍អាស៊ីអាគ្នេយ៍ (SEATV) ដើម្បីរំលេចការប្រកួតដណ្ដើមខ្សែក្រវាត់ស្រាបៀរកម្ពុជារបស់កីឡាករ៤រូបទៀតឱ្យកាន់តែមានការចាប់អារម្មណ៍ ។
ជាការពិត កីឡាករជើងខ្លាំង និងធ្លាប់ល្បីឈ្មោះកក្រើកក្នុងពិភពប្រដាល់ទាំងពីររូបនេះធ្លាប់ប៉ះគ្នាច្រើនលើករួចមកហើយ ដោយមានឈ្នះមានចាញ់ទៅវិញទៅមក ។ រវាងពួកគេ ដ្បិតថា ចង់ហួសស៊េរីបន្តិចមែន ប៉ុន្តែនៅខ្លាំងកម្លាំងពេញ និងមានសមត្ថភាពតតាំងគ្នាបានរស់រវើកនៅលើសង្វៀននាពេលកន្លងមក ទើបនៅតែមានការចង់ឃើញថា រវាង សរ សី និង ពេជ្រ អារុណ ដែលបានបាត់មុខអស់មួយរយៈ និងវ័យជ្រេដូចគ្នា តើអ្នកណានឹងឈ្នះ ។ ប្រសិនបើឱ្យទស្សន៍ទាយ គេនឹងជ្រើសយកកីឡាករសរ សី ដោយសារតែក្នុងពេលនេះ គេហាក់នៅមានកម្លាំងស៊ុហ្វល្អនៅឡើយ ។ ដោយឡែកចំពោះកីឡាករពេជ្រ អារុណ ក៏នៅមានអ្នករំពឹងថា នឹងឈ្នះច្រើននោះដែរ បើទោះជាគេធ្លាក់ដៃ ហើយឆាប់ហត់បន្តិច ។ បើគិតពីបច្ចេកទេស កីឡាករពេជ្រ អារុណ នៅមានក្រេឌីតជាង ។
អ៊ីចឹងហើយទើបការប៉ះគ្នារបស់ពួកគេ ហាក់ធ្វើឱ្យអ្នកស្នេហាវិស័យកីឡាប្រដាល់ច្របូកច្របល់មិនដឹងថា អ្នកណានឹងឈ្នះសម្រាប់រសៀលថ្ងៃអាទិត្យនេះ ។ យ៉ាងណាក៏ដោយ ការប្រកួតរបស់ពួកគេ គ្រាន់តែជាគូឯកដើម្បីរំលេចការប្រកួតតែប៉ុណ្ណោះ ។ ផ្ទុយទៅវិញ គូដែលចាប់អារម្មណ៍ គឺកីឡាករ៤រូបដែលស្រេកឃ្លានម្នាក់៣ពិន្ទុបន្ថែម ដើម្បីឆ្ពោះទៅប្រកួតខ្វែងដណ្ដើមខ្សែក្រវាត់របស់ស្រាបៀរកម្ពុជាឯណោះទេ ទើបជាការប្រកួតដែលមានគេឃ្លាំមើល និងតាមដានខ្លាំងជាង ។
នៅក្នុងសប្ដាហ៍នេះ កីឡាករដែលស៊ីសាច់ហុតឈាមគ្នាទាំង៤នោះរួមមាន កីឡាករយិន បូរិន មកពីក្លិបអាស៊ីកីឡា ជួបប្រកួតជាមួយកីឡាករជ័យ វណ្ណៈ មកពីក្លិបឃ្លាំងមឿងកីឡា និងកីឡាករគួន ប៊ុនហ៊ីម មកពីក្លិបពន្លឺសាមគ្គីខេត្តបាត់ដំបង ជួបប្រកួតជាមួយកីឡាករមាស ឆៃយ៉ា មកពីក្លិបរាជសីហ៍ខេត្តបាត់ដំបង ។ ពួកគេទាំង៤ នឹងប្រកួតគ្នាដណ្ដើមយក៣ពិន្ទុបន្ថែម ក្នុងវគ្គជម្រុះដណ្ដើមខ្សែក្រវាត់ជើងឯកស្រាបៀរកម្ពុជា ប្រភេទទម្ងន់៥៧គីឡូក្រាមសម្រាប់ពូល B ។
យិន បូរិន និងជ័យ វណ្ណៈ ពួកគេមានសមត្ថភាពប្រហាក់ប្រហែលគ្នា ហើយមាឌ និងកម្ពស់ក៏ប្រហែលគ្នាដែរ ។ ទោះជាយ៉ាងណា សម្រាប់ការជួបគ្នា ពុំអាចសន្និដ្ឋានបានទេថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះក៏មិនអាចថា អ្នកណាមើលស្រាលអ្នកណាម្នាក់បានដែរ ។ ទស្សនិកជនហាក់ទុកចិត្តលើកីឡាករយិន បូរិន ដោយសារតែគេមានក្បាច់ទាត់ល្អ ប៉ុន្តែ ជ័យ វណ្ណៈ ក៏មុះមុតក្នុងការវាយលុកផងដែរ ទើបមិនអាចមើលស្រាល ។
មួយគូទៀត កីឡាករគួន ប៊ុនហ៊ីម និងមាស ឆៃយ៉ា វិញ គឺពួកគេជាគូលំពិបាកទស្សន៍ទាយ ។ គួន ប៊ុនហ៊ីម មានប្រៀបខាងជង្គង់ និងរហ័សជាង ប៉ុន្តែមាស ឆៃយ៉ា ជាអ្នកលេងកណ្តាប់ដៃដែលពិបាកមើលរំលង ។ មាស ឆៃយ៉ា បើកុំតែបាត់មុខមួយរយៈ ប្រហែលជា គួន ប៊ុនហ៊ីម មិនមែនជាដៃគូនោះទេនាពេលនេះ ។ ក្នុងចំណោមពួកគេទាំង៤នេះ សុទ្ធតែត្រូវការ៣ពិន្ទុដូចគ្នា ដ្បិតបើអ្នកណាយកបាន៣ពិន្ទុ មានន័យថា ឱកាសឡើងរបស់គេនឹងកាន់តែឃើញពន្លឺច្បាស់ ៕
ចែករំលែកព័តមាននេះ