ខេត្តកណ្តាល ៖ នគរបាលព្រហ្មទណ្ឌខេត្តកាលពីព្រឹកថ្ងៃទី២៤ កក្កដា បានបញ្ជូនជនសង្ស័យម្នាក់ទៅកាន់សាលាដំបូងខេត្ត ដើម្បីធ្វើការសាកសួរពាក់ព័ន្ធនឹងករណីឃាតកម្មសម្លាប់កូនប្រុសថៅកែហាងនំប៉័ង ហេង ចេង នៅក្រុងតាខ្មៅ ជំរិតទារប្រាក់១០ម៉ឺនដុល្លារ កាលពីពេលថ្មីៗកន្លងទៅនេះ ។ ទោះបីជាបែបណា មន្ត្រីនគរបាលមានការប្រយ័ត្នប្រយែងក្នុងការផ្តល់ព័ត៌មានដល់អ្នកកាសែតជុំវិញការចាប់ខ្លួននេះ ។
ជនសង្ស័យដែលត្រូវបានចាប់ខ្លួនបញ្ជូនទៅកាន់សាលាដំបូងមិនត្រូវបានគេប្រាប់ និងបង្ហាញឱ្យដឹងពីអត្តសញ្ញាណឡើយ តែតាមប្រភពព័ត៌មានមួយបានបង្ហើបឱ្យដឹងថា ជនសង្ស័យជាបុរសមានអាយុប្រហែល២៥ឆ្នាំ ត្រូវបាននគរបាលនាយកដ្ឋានព្រហ្មទណ្ឌក្រសួងមហាផ្ទៃ សហការជាមួយនគរបាលព្រហ្មទណ្ឌខេត្តកណ្តាល ឃាត់ខ្លួននៅរាជធានីភ្នំពេញ និងធ្វើការសាកសួរអស់រយៈពេល៤ថ្ងៃមកហើយ នៅដំណាក់កាលនគរបាល ។ គេមិនបានប្រាប់ថា ជនសង្ស័យនេះជាប់ពាក់ព័ន្ធនឹងករណីឃាតកម្មជំរិតទារប្រាក់នោះពិតប្រាកដឬយ៉ាងណាទេ តែតាមប្រភពព័ត៌មានថា ជនសង្ស័យនោះគឺជាមិត្តភក្ដិចំណាប់ខ្មាំង ។ ចំណែកមន្ត្រីនគរបាលដែលបញ្ជូនជនសង្ស័យទៅកាន់សាលាដំបូង មិនបានប្រាប់ពីការជាប់ពាក់ព័ន្ធនឹងករណីឃាតកម្មជំរិតទារប្រាក់ទេ និងបានប្រាប់ង្វែងដានថា ជាករណីរំលោភសេពសន្ថវៈទៅវិញ ។
សូម្បីតែនៅមុខបន្ទប់សាកសួររបស់ព្រះរាជអាជ្ញារង ក៏ត្រូវបានគេហាមឃាត់មិនឱ្យអ្នកកាសែត ឬអ្នកស្លៀកពាក់សីុវិលណាម្នាក់ទៅជិតឡើយ ។
តាមប្រភពព័ត៌មានពីអ្នកជិតស្និទ្ធម្នាក់ បានប្រាប់ឱ្យដឹងថា រយៈពេលបុ៉ន្មានថ្ងៃមកនេះ នគរបាលខេត្តកណ្តាល សហការជាមួយនគរបាលនាយកដ្ឋានក្រសួងមហាផ្ទៃ បានហៅមនុស្សចំនួន៤នាក់មកសាកសួរ ហើយក៏ឱ្យវិលត្រឡប់ទៅវិញ ។ ចំណែកជនសង្ស័យម្នាក់ដែលបញ្ជូនទៅសាលាដំបូងនេះ បានសាកសួរចំនួន៤ថ្ងៃមកហើយតាមនីតិវិធី បុ៉ន្តែពេលនេះដល់ដំណាក់កាលនីតិវិធីរបស់តុលាការ ដែលនៅវេលាថ្ងៃត្រង់ថ្ងៃទី២៤ កក្កដា គេមិនទាន់ដឹងថា ព្រះរាជអាជ្ញា និងចៅក្រមចោទប្រកាន់ឬបែបណាទេ ។ ការព្យាយាមលាក់បាំងព័ត៌មានរបស់សមត្ថកិច្ចនេះ ដោយសារនីតិវិធីស្វែងរកក្រុមឧក្រិដ្ឋជននៅបន្តនៅឡើយ ក្នុងការរកយុត្តិធម៌សម្រាប់អ្នករងគ្រោះ និងក្រុមគ្រួសារ ។
គួរបញ្ជាក់ថា កាលពីថ្ងៃទី១៧ កក្កដា កន្លងទៅ កូនប្រុសថៅកែហាងនំប័ុងហេង ចេង ឈ្មោះ ហេង ពិសិដ្ឋ ហៅ ស្រេង អាយុ២៤ឆ្នាំ មានទីលំនៅភូមិក្រពើហា សង្កាត់ព្រែកឫស្សី ក្រុងតាខ្មៅ ត្រូវពួកឧក្រិដ្ឋជនចាប់ជំរិតទារប្រាក់ អស់ចំនួន១០មុឺនដុល្លារ ហើយជនរងគ្រោះបានបាត់ដំណឹងតាំងពីពេលនោះមក ។ រហូតដល់រសៀលថ្ងៃទី១៩ កក្កដា សពជនរងគ្រោះត្រូវបានគេប្រទះឃើញនៅក្បែរជើងភ្នំមួយ នៅស្រុកបរសេដ្ឋ ខេត្តកំពង់ស្ពឺ ដោយមានស្កុតរុំ ដៃជើង និងមានសភាពហើមទៅហើយ ហើយត្រូវគេរាយការណ៍មកក្រុមគ្រួសារ និងសមត្ថកិច្ចនៅខេត្តកណ្តាល ទៅពិនិត្យសព និងនាំមកប្រគល់ឱ្យក្រុមគ្រួសារធ្វើបុណ្យតាមប្រពៃណី ទាំងក្តីចុកចាប់ខ្លោចផ្សាបំផុត ៕
ចែករំលែកព័តមាននេះ