ខេត្ដកំពង់ឆ្នាំង ៖ កម្លាំងសមត្ថកិច្ចចម្រុះដឹកនាំដោយលោកព្រះរាជអាជ្ញារងអមសាលាដំបូងខេត្ដកំពង់ឆ្នាំង នៅរសៀលថ្ងៃទី២៣ កក្កដា បានចូលទៅអនុវត្ដដីកាឆែកឆេរលំនៅឋានរបស់ឈ្មោះ ស្ងួន ញឿន និងប្រពន្ធឈ្មោះ អុំ សុភី ស្ថិតក្នុងភូមិឡពាង ឃុំតាជេស ស្រុកកំពង់ត្រឡាច ដើម្បីរកវត្ថុតាង អាវុធកែច្នៃជាតិផ្ទុះដែលរក្សាទុកក្នុងលំនៅឋានសម្រាប់ប្រហារ ជីវិតមនុស្ស ។
អ្វីដែលមានការកត់សម្គាល់នោះ គឺនេះជាលើកទី១ហើយដែលសមត្ថកិច្ចត្រូវបានឈ្មោះ ស្ងួន ញឿន សម្លក់សម្លឹងញេញធ្មេញដាក់ រួចបានកំណត់ឱ្យចូលតែប៉ុន្មាននាក់ប៉ុណ្ណោះ មិនអាចច្រើននាក់បានទេ បន្ទាប់ពីសមត្ថកិច្ចឈររង់ចាំរាប់ម៉ោង ព្រោះខ្លាចមានការចាប់ខ្លួនណាមួយពីសមត្ថកិច្ច លើក្រុមអ្នកតវ៉ាដែលកំពុងដេករួមគ្នាជាក្រុម ជាកង មានស្បៀងអាហារគ្រប់គ្រាន់សម្រាប់រយៈពេលដេកស៊ីជុះច្រើនខែ ។ លោក សេង ម៉េងស្រ៊ុន ព្រះរាជអាជ្ញារងអមសាលាដំបូងខេត្ដ មានប្រសាសន៍ទៅកាន់មេខ្លោង និងក្រុមអ្នកដេកស៊ីចាំតវ៉ាទាំងនោះថា លោកមកនេះមិនមែនមកចាប់ខ្លួននរណាម្នាក់ទេនៅពេលនេះ ប៉ុន្ដែលោកមកនេះគឺមកអនុវត្ដដីកាឆែកឆេររបស់សាលាដំបូងខេត្ដដើម្បីរកវត្ថុតាងមានអាវុធកែច្នៃជាដើម ។
លោកបានបញ្ជាក់ថា ថ្វើបើពេលនេះមិនចាប់ខ្លួនបងប្អូនពិតមែន ប៉ុន្ដែថ្ងៃមុខថ្ងៃក្រោយ បងប្អូនធ្វើខុស លោកមិនទទួលខុសត្រូវឡើយ កុំថាមិនបានជួយប្រាប់មុន។ ក្រោយពីមានការឆែកឆេរ សមត្ថកិច្ចបានរកឃើញមានដបដាក់ប្រេងសាំងមានឆ្នុកធ្វើប្រឆេះសម្រាប់ដុតគប់ ជាអាវុធរាប់សិបដប មានព្រួញមួយបាច់ធំ ចំពាមកៅស៊ូ និងគ្រាប់ដែកជាច្រើនថង់ ចំណែកកាំភ្លើងអាកាច្នៃ ធ្នូ ស្នា និងគ្រាប់បោកផ្ទុះច្នៃប្រហែលសង្ស័យលាក់ទុកក្នុងព្រៃបាត់ទៅហើយ ។ ក្រៅពីនេះ នៅក្នុងព្រៃ និងតាមរបងជុំវិញបរិវេណដីភូមិរបស់ឈ្មោះ ស្ងួន ញឿន មានសុទ្ធតែចម្រូងធ្វើពីឫស្សី ព្រមទាំងមានខ្សែលួសសម្រាប់ដាក់ចរន្ដអគ្គិសនីឱ្យឆក់ទៀតផង ។
បន្ទាប់មក លោកព្រះរាជអាជ្ញារងបានសុំដកសម្ភារនោះបានតែមួយចំនួន នៅសល់មួយចំនួនទៀតពួកក្រុមអ្នកតវ៉ានោះមិនឱ្យឡើយ ដោយទាមទារ និងតវ៉ាថា ទុកការពារខ្លួន ដែលពួកគេអត់គិតថា របស់អស់ទាំងនេះទុកសម្រាប់ទាញខ្លួនឯងឱ្យចូលគុកឡើយសង្ស័យមិនយូរទេ។ មន្ដ្រីនគរបាលខេត្តមួយរូបបានចូលដល់ក្នុងបរិវេណផ្ទះរបស់ឈ្មោះ ស្ងួន ញឿន ប្រពន្ធឈ្មោះ អុំ សុភី ដែលជាមេខ្លោងប្រមូលផ្តុំមនុស្សក្នុងការប្រើអំពើហិង្សាចូលវាយរបងរបស់ក្រុមហ៊ុន K.D.C កាលពីថ្ងៃទី១៧ កក្កដា ២០១៤ កន្លងទៅ បណ្តាលឱ្យកម្មកររបស់ក្រុមហុ៊នរបួសជាង១០នាក់ និងរបងរបស់ក្រុមហ៊ុនកំពុងសាងសង់បានខូចខាតធ្លុះធ្លាយជាច្រើនកន្លែងបាននិយាយលាន់មាត់ថា ពិតជាមិនគួរឱ្យជឿក្នុងបរិវេណផ្ទះឈ្មោះ ស្ងួន ញឿន មានមនុស្សចាំដេកស៊ី និងប្រើអំពើហិង្សាចំនួន៤១នាក់ មានខ្លះដេកក្នុងអង្រឹងក្រោមតង់កៅស៊ូ ក្រោមដើមឈើ មានស្បៀងអាហារដូចទាហាននៅក្នុងសមរភូមិ ។ មន្ត្រីរូបនោះបានពណ៌នាថា ពេលត្រូវបានក្រុមអ្នកតវ៉ានោះអនុញ្ញាតឱ្យចូលក្នុងភូមិ ហើយគាត់មានភារកិច្ចការពារលោកព្រះរាជអាជ្ញារង ពេលចូលអនុវត្តដីកាឆែកឆេរនោះ ។
លោកថា ដំបូងក្រុមអ្នកយាមមាត់ច្រកចូលដែលមានរបងបន្លាឫស្សីបានអនុញ្ញាតឱ្យមន្ត្រីនគរបាលតែ៤-៥នាក់ និងមន្ត្រីតុលាការតែ២នាក់ប៉ុណ្ណោះចូលទៅ ។ ក្រោយមក សមត្ថកិច្ចបានសុំបន្ថែមគ្នាប្រហែលមិនលើសពី១០នាក់ចូលទៅ ។ គ្រាន់តែឆ្លងទ្វាររបងភ្លាម គាត់បានឃើញនៅសងខាងផ្លូវដើរមានចម្រូងឫស្សីច្រូងច្រាងតាមរបង និងក្នុងព្រៃក្បែរៗផ្លូវ ។ ចំណែកនៅគុម្ពឫស្សីខាងស្តាំដៃគាត់បានឃើញដបច្រកសាំងជាច្រើនដបដាក់ទុកទីនោះ ។ ដបសាំងនេះហើយដែល ស្ងួន ញឿន ប្រើគប់លើសមត្ថកិច្ចពេលធ្វើបាតុកម្មតវា៉ ឆេះខូចផ្លូវក្រាលកៅស៊ូជាច្រើនកន្លែង ។ ពេលចូលឆែកឆេរក្នុងផ្ទះឈ្មោះ ស្ងួន ញឿន គាត់បានឃើញអង្ករជាច្រើនបាវប្រហែលជាង១តោនរួមនឹងស្បៀងមួយចំនួនទៀតសម្រាប់មនុស្សជាច្រើននាក់ដេកស៊ីធ្វើបាតុកម្មដូចជាត្រីខកំប៉ុងទាំងកេសៗ ។ លុះចេញផុតមកដល់ក្រោយផ្ទះ គាត់ឃើញមានរោង មានតង់ និងអង្រឹងសម្រាប់អ្នកដេកស៊ីជាច្រើន ចងនៅស្អេកស្កះពេញទីនោះ ។ ចំណែកនៅខាងស្តាំដៃមានរោងចងគ្របដោយតង់ គឺជារោងដាំបាយដោយខ្ទះត្នោតកំពុងពុះ និងមានមនុស្ស៣-៤នាក់នៅទីនោះកំពុងធ្វើម្ហូបដូចធ្វើបុណ្យ ។
រីឯនៅខាងឆ្វេងដៃមានទ្រុងដាក់មាន់រាប់សិបក្បាលកំពុងស្រែករញៀវពេញទ្រុង ។ មន្ត្រីរូបនោះបាននិយាយថា ដល់បានមកឃើញម្តង ដែលពីមុនមកពុំដែលបានចូលសោះ ទើបដឹងថានៅទីនោះប្រៀបដូចសមរភូមិផ្តាច់ខ្លួនណាមួយ របស់ទាហានព្រៃដូឆ្នោះដែរ ព្រោះមានអង្ករ ស្បៀង មានអាវុធ និងរបងការពារយ៉ាងមុតមាំណាស់ ដូចមានអ្នកដឹកនាំច្បាស់លាស់ ដោយមិនបាច់ទៅធ្វើការរកស៊ីទេ គឺដេកស៊ីម៉ាសេរី ហើយបើហៅតំបន់អប្បគមន៍ ក៏មិនខុសដែរព្រោះមិនដែលមានអាជ្ញាធរភូមិ-ឃុំ នគរបាលមូលដ្ឋានណាម្នាក់ចូលបានឡើយ ។ ទោះចង់លាក់អាវុធជាតិផ្ទុះក្នុងនោះ ក៏គ្មានអ្នកណាដឹងដែរ ។
ជាក់ស្តែងដូចថ្ងៃនេះ មកសុំឆែកឆេររកអាវុធជាតិផ្ទុះ គឺចាំតែពួកនេះល្ងង់ ព្រមឱ្យឆែកឃើញតើ ! ពួកគេនេះមិនល្ងង់ដល់ម្លឹងពេកទេ គ្រាន់តែសុំចូលឆែកឆេរត្រូវរង់ចាំរាប់ម៉ោងទម្រាំពួកគេអនុញ្ញាត ព្រៃស្រោងពេញភូមិ ចង់លាក់ត្រង់ណាក៏បានដែរ រកមិនឃើញទេ ។ ម៉្យាងទៀត ស្ងួន ញឿន ត្រូវអ្នកភូមិនិយាយថា មានមេប៉ូលិសស្រុកម្នាក់សុំមិនបញ្ចេញឈ្មោះជាសាច់ញាតិ ម្លោ៉ះហើយខាងខេត្តធ្វើអ្វី ក៏ឈ្មោះ ស្ងួន ញឿន ដឹងទាំងអស់ ។
មន្ត្រីនគរបាលមួយរូបដែលជួបឈ្មោះ ស្ងួន ញឿន ផ្ទាល់បានព្យាយាមអប់រំណែនាំថា សូមកុំបន្តធ្វើមេដឹកនាំតវ៉ាទាំងខុសច្បាប់ទៀតទៅ ដូចប្អូនឯងឈ្មោះ ស្ងូន ញៀន ហៅរាជ សីម៉ា គេប្រកាសផ្តាច់ខ្លួនពីការតវ៉ានេះ ហើយឥឡូវគាត់ទទួលបានប្រាក់គោលនយោបាយពីក្រុមហ៊ុន យកមកទិញម៉ាស៊ីនគោយន្ត និងទិញម៉ូតូជិះ គេមានសេរីភាពគ្រប់បែបយ៉ាង ហើយបើញឿន ឯងនៅតែបន្តការតវ៉ាទៀតក៏ឃើញថាដំណាក់កាលនេះវាអត់ប្រយោជន៍ទេ រស់ដូចក្នុងទ្រុង ត្រូវបានកំណត់ដីដើរដោយខ្លួនឯងមិនហ៊ានចេញក្រៅខ្លាចគេចាប់ រស់ចាំតែអង្គការសិទ្ធិមនុស្ស ចាំតែគណបក្សប្រឆាំងដឹកស្បៀងមកឱ្យស៊ី គ្មានសេរីភាព តើប្រឹងតស៊ូរស់នៅក្រៅច្បាប់ដល់ណាទៀត ។
ឈ្មោះស្ងួន ញឿន បាននិយាយថា មកពីក្រុមហ៊ុនឱ្យប្រាក់តិចពេក ចែកគ្នាមិនគ្រប់ ព្រោះចែកឱ្យមេខាងលើដែរ ។ ក្រោយមកថា ខ្ញុំជាប្រធានសហគមន៍ផងចេញម៉េចបាន ព្រោះកន្លងមក មានអង្គការឱ្យខ្ញុំដឹកនាំអ្នកតវ៉ា ដោយផ្តល់ស្បៀងអាហារ ឱ្យប្រាក់សម្រាប់ចិញ្ចឹមខ្លួន ខ្ញុំធ្វើការឱ្យគេ ដកខ្លួនលែងបានហើយ បើដោះស្រាយត្រូវតែក្រុមហ៊ុនដោះទាំងអស់គ្នា។ ពេលនោះ អ្នកជួយណែនាំបានតបវិញថា «ដោះទាំងអស់គ្នា តែដោះសម្រាប់តែអ្នកភូមិឡពាង ដែលសល់តែ១៥គ្រួសារប៉ុណ្ណោះ ព្រោះក្រុមហ៊ុននៅមានឆន្ទៈយោគយល់នៅឡើយ តែសម្រាប់អ្នកភូមិបឹងកក់និងភូមិដទៃទៀតដែលទើបចេញមកតវ៉ាថ្មី ខណៈឃើញគេបានមកចង់បានដែរគឺមិនបានឡើយ» ។
មុនពេលបែកគ្នា ឈ្មោះ ស្ងួន ញឿន បាននិយាយថា ចាំគិតមើលសិន ។ អ្នកភូមិឡពាងមួយក្រុម ដែលមិនកាន់ជើងក្រុមអ្នកខូចទាំងនោះបាននិយាយថា សព្វថ្ងៃក្រុមអ្នកតវ៉ាមួយក្តាប់តូច ដែលកំពុងរស់នៅសម្ងំពួនផ្តុំគ្នាក្នុងផ្ទះឈ្មោះ ស្ងួន ញឿន និងប្រពន្ធឈ្មោះ អុំ សុភី នេះបានអង្គការមួយនៅរាជធានីភ្នំពេញ និងគណបក្សប្រឆាំងមួយផ្តល់ស្បៀងអាហារសម្រាប់ប្រឹងប្រែងតវ៉ាដោយមិនបាច់ប្រឹងរកស៊ីអីទេ ដេកស៊ីទៅ បើកភ្នែកឡើងរកវីធីតវ៉ា មិនខ្វល់អត់បាយហូបដូចពួកគាត់ ដែលបើកភ្នែកឡើង ប្តីដោយប្តី ប្រពន្ធដោយប្រពន្ធ កូនទៅធ្វើការរោងចក្រប្រឹងដើម្បីរស់នោះទេ ។ ពួកគាត់បញ្ជាក់ថា សព្វថ្ងៃនេះ គាត់ខឹងពួកអ្នកតវ៉ាខ្លាំងណាស់ ធ្វើឱ្យដំណើរការអភិវឌ្ឍរបស់ក្រុមហ៊ុនមានការរាំងស្ទះ ព្រោះតែជនមួយក្តាប់តូច២០-៣០នាក់ ។ តែសម្រាប់ប្រជាពលរដ្ឋនៅតំបន់នោះ គេចង់ឱ្យមានការអភិវឌ្ឍឱ្យបានឆាប់ ព្រោះប្រជាពលរដ្ឋនៅជុំវិញតំបន់នោះមានចំនួន១៨ភូមិ កំពុងរង់ចាំចូលបម្រើការងារដែលនឹងត្រូវការមនុស្សជាង២ម៉ឺននាក់សម្រាប់ចូលធ្វើការ ។
មន្ត្រីអនុវត្តច្បាប់បាននិយាយថា បន្ទាប់ពីចាប់មេខ្លោង២នាក់ដាក់ពន្ធនាគារពីបទប្រើអំពើហិង្សានិងបំផ្លាញទ្រព្យសម្បត្តិអ្នកដទៃ កាលពីថ្មីៗកន្លងទៅនេះ នៅសល់មនុស្សមួយចំនួនទៀត ដែលនៅក្នុងអំពើហិង្សានោះដែរនឹងត្រូវចាប់ខ្លួនបន្តទៀត ព្រោះមេខ្លោង២នាក់ដែលចាប់ខ្លួននោះបានសារភាពប្រាប់ពីឈ្មោះគូកនអស់ហើយ។ ២នាក់នោះបានតវ៉ាថា បើឱ្យតែខ្លួន២នាក់ជាប់គុកបែបនេះ គឺមិនយុត្តិធម៌ទេ ចុះមេខ្លោង ស្ងួន ញឿន ដែលញុះញង់គាត់ឱ្យធ្វើមេដែរ ម៉េចមិនចាប់ផង ? ៕
ចែករំលែកព័តមាននេះ