រាជធានីភ្នំពេញ ៖ ស្រ្តីម្នាក់បានរងរបួសធ្ងន់ និងមនុស្ស៣នាក់ទៀតបានរងរបួសស្រាល នៅក្នុងហេតុការណ៍គ្រោះថ្នាក់ចរាចរណ៍មួយដែលបង្កឡើងដោយម៉ូតូហុងដាឌ្រីមសេ១២៥ បើកមកទាក់ដៃចង្កូតគ្នាជាមួយម៉ូតូសង់កូរេ កាលពីវេលាម៉ោង ៩និង២០នាទីយប់ថ្ងៃទី ២៤ កក្កដា ២០១៤ នៅចំណុចមុខផ្សារហេងលី តាមបណ្តោយផ្លូវលេខ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូហុងដាឌ្រីមសេ១២៥ ពណ៌ខ្មៅមួយគ្រឿង ពាក់ស្លាកលេខភ្នំពេញ 1AV-3337 ជិះដោយយុវជនម្នាក់យ៉ាងលឿនតាមផ្លូវលេខ២៧១ ក្នុងទិសដៅ ពីជើងទៅត្បូង មកដល់ចំណុចកើតហេតុក៏បានបើកមកទាក់ដៃចង្កូត ម៉ូតូសង់កូរេ មួយគ្រឿងជិះដោយស្រ្តី៣នាក់ស្របទិសគ្នា បណ្តាលឱ្យស្រ្តីដែលជិះក្រោយគេបង្អស់ធ្លាក់បោកក្បាលលើថ្នល់រងរបួសធ្ងន់ ចំណែកស្រ្តីអ្នកបើកម៉ូតូ និងស្រ្តីជិះកណ្តាល រួមជាមួយបុរសជិះម៉ូតូហុងដាឌ្រីមសេ១២៥ រងរបួសស្រាលទាំង៣នាក់ ។
ក្រោយពេលកើតហេតុជនរងគ្រោះរបួសធ្ងន់ត្រូវគេបញ្ជូនទៅសង្រ្គោះបន្ទាន់នៅមន្ទីរពេទ្យចំណែក ម៉ូតូទាំងពីរគ្រឿងត្រូវសមត្ថកិច្ចយកទៅរក្សាទុកនៅអធិការដ្ឋានខណ្ឌសែនសុខរងចាំដោះស្រាយគ្នាតាមផ្លូវច្បាប់ ។
ចែករំលែកព័តមាននេះ