រាជធានីភ្នំពេញ ៖ កម្មការនីរោងចក្រម្នាក់ ត្រូវបានស្រ្តីសង្ស័យពីរនាក់ប្រើល្បិចទម្លាក់គ្រាប់កង់ ដោះដូរយកគ្រឿងអលង្ការ និងទូរស័ព្ទដៃណូគៀ អិនចុចពិលមួយគ្រឿង រត់គេចខ្លួនដោយសុវត្តិភាព។ ហេតុការណ៍នេះកើតឡើងកាលពីវេលាម៉ោង៦ និង៣០នាទីល្ងាច ថ្ងៃទី ២៤ កក្កដា ២០១៤នៅចំណុច ភូមិអង្គតាគៀត សង្កាត់កន្ទោក ខណ្ឌពោធិ៍សែនជ័យ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុនារីរងគ្រោះបានចេញពីធ្វើការក្នុងរោងចក្របំណងត្រឡប់មកផ្ទះវិញ ពេលដើរមកដល់ចំណុចកើតហេតុ ស្រ្តីសង្ស័យពីរនាក់បានទម្លាក់គ្រាប់កង់ដាក់ក្នុងស្បោងបោះទៅលើដី ហើយពេលនារីរងគ្រោះប្រទះឃើញបំរុងរើស ស្រាប់តែស្រ្តីសង្ស័យដណ្តើមរើសបានមុន ។ បន្ទាប់មកស្រ្តីសង្ស័យធ្វើជាមកនិយាយចរចារជាមួយនារីរងគ្រោះ ថានឹងយកទៅចែកគ្នា ដោយឱ្យនារីរងគ្រោះជិះម៉ូតូឌុបទៅជួបគ្នានៅមុខផ្សារពោធិចិនតុង ចំណែកស្រ្តីសង្ស័យទាំងពីរនាក់ជិះម៉ូតូខ្លួនឯង។ ដោយសារតែកម្មការនីរោងចក្រខាងលើ មានចិត្តចង់បានរបស់គេផងនោះក៏បានជិះទៅជួបជាមួយជនសង្ស័យ នៅពេលជួបគ្នានារីរងគ្រោះបានដោះចិញ្ចៀនប្លាទីន មួយវង់ ខ្សែកប្លាទីនមួយខ្សែ ចិញ្ចៀនមាសមួយវង់និងទូរស័ព្ទដៃណូគៀអិនចុច ពិលមួយគ្រឿងដើម្បីដោះដូរជាមួយគ្រាប់កង់ដែលដាក់ក្នុងកញ្ចប់សម្រាប់ដាក់គ្រឿងអលង្ការមួយកញ្ចប់ ហើយស្រ្តីសង្ស័យទាំងពីរនាក់ក៏បានគេចខ្លួនបាត់ទៅ។
បន្ទាប់ពីដឹងថាចាញ់បោកគេហើយនារីរងគ្រោះមានការតក់ស្លុតក្នុងចិត្ត ដោយដើរទាំងអស់កម្លាំងមកដួលនៅមុខសាលាខណ្ឌពោធិ៍សែនជ័យ ក៏បានប្រាប់សន្តិសុខខណ្ឌឱ្យជួយ ព្រមទាំងបានឱ្យលេខទូរស័ព្ទឪពុករបស់នាងទៅសមត្ថកិច្ចដើម្បីទាក់ទងឱ្យឪពុករបស់នាងមកទទួលយកនាងទៅផ្ទះ ។
ចែករំលែកព័តមាននេះ