រាជធានីភ្នំពេញ ៖ ក្រុមចោរប្រដាប់អាវុធ២នាក់ជិះម៉ូតូតាមប្លន់ដល់មុខផ្ទះ និងបាញ់២គ្រាប់ក្នុងចេតនាប្លន់យកម៉ូតូពីនារី៣នាក់ តែមិនបានសម្រេច ទីបំផុតជនសង្ស័យម្នាក់ត្រូវបានចាប់ខ្លួន ចំណែកម្នាក់ទៀតរត់គេចខ្លួនរួច ។ អំពើប្លន់នេះ បានកើតទ្បើងកាលពីវេលាម៉ោង១១យប់ថ្ងៃទី២៣ កក្កដា នៅមុខផ្ទះលេខ18Eo ផ្លូវលំ១០ម៉ែត្រ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានពីនារីរងគ្រោះឈ្មោះ ចាន់ ដានី អាយុ២១ឆ្នាំ ជាបុគ្គលិកសណ្ឋាគារណាហ្គាវើល ស្នាក់នៅផ្ទះកើតហេតុខាងលើ បានឱ្យដឹងថា មុនពេលកើតហេតុ ស្រីនាង អាយុ២០ឆ្នាំ ជាមិត្តភក្តិ ស្នាក់នៅជិតគ្នាបានដឹកប្អូនស្រីឈ្មោះ ចាន់ ដាណែត អាយុ១៩ឆ្នាំ មកទទួលនាងជាបង ដែលទើបចេញពីធ្វើការក្នុងគោលបំណងត្រទ្បប់មកផ្ទះវិញ ដោយជិះម៉ូតូម៉ាកស្គូពី ពណ៌ខ្មៅ ពាក់ស្លាកលេខភ្នំពេញ 1BH-4380 ។ ពេលជិះឌុបគ្នាដល់មុខវត្តចាក់អង្រែក្រោម ស្រាប់តែមានជន២នាក់ ជិះម៉ូតូហុងដាឌ្រីម ស៊េរី២០១៤ ពណ៌ខ្មៅ ពាក់ស្លាកលេខភ្នំពេញ 1CK-6647 ដែលអ្នកបើកម៉ូតូពាក់មួកការពារសុវត្ថិភាព ប្រដាប់ដោយកាំភ្លើងខ្លីមួយដើម ជិះដេញតាមម៉ូតូពួកនាងពីក្រោយ ។
នាង ចាន់ ដានី រៀបរាប់ទៀតថា ពេលដឹងថាមានគេជិះតាមបែបនេះ ពួកនាងបានបន្ថែមល្បឿនយ៉ាងលឿន លុះពេលដល់មុខផ្ទះ ស្រាប់តែជនសង្ស័យតាមដល់មុខផ្ទះដែរ ហើយជនសង្ស័យដែលជិះខាងក្រោយបានដកកាំភ្លើងខ្លីភ្ជង់កញ្ចឹងកប្អូនស្រីនាងឈ្មោះ ចាន់ ដាណែត ឱ្យចុះពីលើម៉ូតូតែនាងមិនព្រមចុះ ចំណែកពួកនាង២នាក់ទៀតបានចុះពីលើម៉ូតូ ។ ភ្លាមនោះ ស្រីនាង ជាអ្នកបើកម៉ូតូបានស្រែកហៅអ្នកក្នុងផ្ទះឱ្យចេញមកជួយ ក៏ត្រូវក្រុមចោរគំរាមមិនឱ្យស្រែក បន្ទាប់មក ស្រីនាងរត់ទៅចាប់បោចសក់ជនសង្ស័យដែលកំពុងដកកាំភ្លើងភ្ជង់ក៏មានការប្រវាយប្រតប់គ្នាយកកាំភ្លើងម៉ាកកា៥៩ និងត្រូវចោរបាញ់ទ្បើងលើ១គ្រាប់ ។
បើតាមសាក្សីឈ្មោះ អ៊ុំ រដ្ឋា ភេទប្រុស អាយុ៣០ឆ្នាំ មុខរបរលក់ដូរ ស្នាក់នៅជិតកន្លែងកើតហេតុ និយាយថា ពេលឃើញទិដ្ឋភាពបែបនេះ គាត់បានចេញពីក្នុងផ្ទះទៅជួយប្រវាយប្រតប់ដណ្តើមយកកាំភ្លើងដែរ ក៏ត្រូវក្រុមចោរបាញ់ផ្ញុចដីមួយគ្រាប់ទៀត ហើយនារីរងគ្រោះស្រែកថា ចោរៗ ធ្វើឱ្យប្រជាពលរដ្ឋរត់ចេញមកជួយព្រួតចាប់បានជនម្នាក់ រួចវាយម្នាក់មួយដៃម្នាក់មួយជើងរហូតជននោះ សល់តែដង្ហើមចង្រិតនិងដណ្តើមបានកាំភ្លើងយកទៅប្រគល់ឱ្យនគរបាលប៉ុស្តិ៍ចាក់អង្រែក្រោម ដែលចុះមកដល់កន្លែងកើតហេតុភ្លាមៗដែរ ។ ចំណែកបក្សពួកម្នាក់ទៀត បានរត់ចោលម៉ូតូគេចខ្លួនទៅបាត់ទាំងពាក់មួកការពារសុវត្ថិភាព ។
ប្រជាពលរដ្ឋបានបញ្ជាក់ថា ដោយសារតែពួកគាត់មានកំហឹង ព្រោះទើបតែកន្លងមកកន្លះខែប៉ុណ្ណោះនៅក្នុងភូមិបាត់រថយន្តសាំយ៉ុងមួយគ្រឿង ព្រមទាំងបាត់ជាហូរហែ សូម្បីតែទូរទស្សន៍ និងទូទឹកកកទុកនៅមុខផ្ទះក៏ត្រូវចោរលួចយកទៅបាត់ដែរ ពេលចាប់ជនសង្ស័យបានបែបនេះ ទោះបីជាប្លន់មិនបានសម្រេចក៏ពួកគាត់បញ្ចេញកំហឹងដែរ ។ ពេលសមត្ថកិច្ចចុះទៅដល់មានតែម្នាក់ឯងមិនអាចឃាត់ប្រជាពលរដ្ឋឈ្នះទេ ។ ក្រោយពេលកើតហេតុ នារីរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលចាក់អង្រែក្រោម ចំណែកជនសង្ស័យដែលរងរបួសធ្ងន់ត្រូវបានដាក់ខ្នោះបញ្ចូនទៅព្យាបាលរបួសនៅមន្ទីរពេទ្យបង្អែកមានជ័យ ពេលណាបានធូរស្រាល នឹងបញ្ជូនទៅអធិការដ្ឋាននគរបាលខណ្ឌមានជ័យចាត់ការបន្ត ៕
ចែករំលែកព័តមាននេះ