ខេត្តកណ្តាល ៖ គ្រាប់បែកយក្សប្រភេទ MK82 មានទម្ងន់ជាង២០០គីឡូក្រាម ដែលបន្សល់ទុកតាំងពីសម័យសង្គ្រាមក្នុងទសវត្សឆ្នាំ៧០ ត្រូវបានប្រជាពលរដ្ឋប្រទះឃើញនៅមាត់ទន្លេមេគង្គ ខណៈពេលដីមាត់ច្រាំងបាក់ស្រុតជម្រៅជិត៤ម៉ែត្រ កាលពីរសៀលថ្ងៃទី២៣ កក្កដា ស្ថិតក្នុងភូមិបឹងកណ្តាល ឃុំខ្ពបអាទាវ ស្រុកលើកដែក ។
បន្ទាប់ពីប្រទះឃើញគ្រាប់នេះភ្លាម ប្រជាពលរដ្ឋបានរាយការណ៍ទៅសមត្ថកិច្ចមូលដ្ឋាន ហើយសមត្ថកិច្ចមូលដ្ឋានក៏រាយការណ៍បន្តប្រាប់មន្ត្រីជំនាញខេត្ត ទាក់ទងទៅមន្ត្រីនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) ដើម្បីមកធ្វើការត្រួតពិនិត្យ ។ មន្ត្រីជំនាញនិយាយថា គ្រាប់នេះគឺជាប្រភេទគ្រាប់ទម្លាក់ពីយន្តហោះក្នុងសម័យសង្គ្រាមទសវត្សឆ្នាំ១៩៧០ ធុន MK82 មានទម្ងន់២៤១គីឡូក្រាម ប្រវែង១,៥៦ម៉ែត្រ មានមុខកាត់២៧៤មីលី្លម៉ែត្រ ហើយនៅមានគុណភាពនៅឡើយ ។ ក្រោយពីពិនិត្យរួចរាល់ហើយនោះ គ្រាប់ MK82 នេះ ត្រូវបានក្រុមមន្ត្រីជំនាញដឹកយកទៅរក្សាទុកនៅអង្គការហ្គោលឌិនវ៉េសដែលមានទីតាំងស្ថិតនៅក្នុងខេត្តកំពង់ឆ្នាំង ។
សូមរំឭកថា កាលពីថ្ងៃទី៥ កក្កដា កន្លងមក គ្រាប់បែកប្រភេទដូចគ្នានេះត្រូវបានប្រទះឃើញនៅបាតបឹងក្រសាំង ដែលមានភូមិសាស្ត្រក្នុងឃុំឈើទាល ស្រុកកៀនស្វាយ ខណៈក្រុមកម្មករជីកដីក្នុងការដ្ឋានរបស់ខ្លួន ។ គ្រាប់បែកយក្សនោះ ត្រូវបានមន្ត្រីស៊ីម៉ាក់ចុះទៅពិនិត្យដល់ទីកន្លែង ហើយសម្រេចអារផ្តាច់ជាពីរ រួចដឹកទៅកាន់មូលដ្ឋានរបស់ស៊ីម៉ាក់នៅក្នុងខេត្តកំពង់ឆ្នាំង កាលពីថ្ងៃទី៩ កក្កដា ផងដែរ ។ មន្ត្រីនគរបាលស្រុកកៀនស្វាយឱ្យដឹងថា ក្រោយពីប្រទះឃើញគ្រាប់បែកដ៏ធំនេះ ក៏បានរាយការណ៍ប្រាប់សមត្ថកិច្ច ហើយនៅថ្ងៃទី៨ កក្កដា កម្លាំងរបស់ស្នងការដ្ឋាននគរបាលខេត្ត សហការជាមួយនគរបាលស្រុកកៀនស្វាយ បានយកគ្រឿងចក្រស្ទូចចេញពីកន្លែងប្រទះឃើញទាំងប្រថុយប្រថាន ដោយមានការប្រុងប្រយ័ត្នខ្ពស់បំផុត ដើម្បីយកទៅរក្សាទុកនៅកន្លែងមានសុវត្ថិភាពសម្រាប់ឱ្យមន្ត្រីអង្គការស៊ីម៉ាក់ចាត់ការបន្តតាមជំនាញ ។
តាមមន្ត្រីស៊ីម៉ាក់ឱ្យដឹងថា គ្រាប់បែកប្រភេទ MK82 នេះ ជាប្រភេទគ្រាប់ទម្លាក់ពីលើយន្តហោះ B52 ក្នុងសម័យសង្គ្រាមទសវត្សឆ្នាំ៧០ ។ គ្រាប់នេះនឹងបង្កគ្រោះថ្នាក់ជាយថាហេតុ ប្រសិនបើរក្សាហើយគ្មានការប្រុងប្រយ័ត្ននោះ ។ ការអារផ្តាច់ជាពីរនេះ គឺផ្អែកលើការសិក្សាពីគ្រាប់ប្រភេទនេះជាមុន និងបានអារដោយបញ្ចៀសពីគន្លឹះគ្រាប់បែកនេះ ។ មូលហេតុបានជាត្រូវអារផ្តាច់ជាពីរ ដោយសារតែមិនអាចរក្សាសុវត្ថិភាពបាន បើសិនជាគ្រាប់នេះនៅទាំងមូលនោះ ។
ក្នុងសម័យសង្គ្រាមនាដើមទសវត្សឆ្នាំ៧០ ភូមិសាស្ត្រស្រុកកៀនស្វាយ និងស្រុកលើកដែក បានទទួលរងនូវការទម្លាក់គ្រាប់បែកពីយន្តហោះយក្ស B52 របស់អាមេរិករាប់តោននៅក្នុងឆ្នាំ១៩៧៣ ធ្វើឱ្យដីក្នុងតំបន់នោះមានស្ថានភាពដូចរន្ធបាយខុំ ។ ជាមួយនឹងការទម្លាក់គ្រាប់បែកយក្សទាំងនោះ ក៏មានគ្រាប់ខ្លះមិនផ្ទុះដែរ ទើបមានការប្រទះឃើញជាបន្តបន្ទាប់នាពេលនេះ ៕
ចែករំលែកព័តមាននេះ