យោងតាមភ្នាក់ងារសង្គ្រោះប៉ាឡេស្ទីនថា ជនប៉ាឡេស្ទីន១៨នាក់ ក្នុងនោះមានកុមារជាច្រើននាក់បានត្រូវស្លាប់កាលពីព្រឹកថ្ងៃទី២៤ កក្កដា ដោយសារការបាញ់ផ្លោងដោយកងរថក្រោះអុីស្រាអែលលើហ្គាហ្សា ។ចំណែករដ្ឋមន្ត្រីការបរទេសអាមេរិក លោកចន គ័ររី អះអាងកាលពីថ្ងៃទី២៣ កក្កដា នៅអុីស្រាអែលពីការរីកចម្រើននានាក្នុងការខិតខំប្រឹងប្រែងឱ្យមានបទឈប់បាញ់គ្នាមួយដើម្បីបញ្ចប់ការបង្ហូរឈាមនៅហ្គាហ្សា ខណៈការផ្អាកការហោះហើររបស់យន្តហោះពាណិជ្ជកម្មមកកាន់ក្រុងតែលអាវីវ ត្រូវពន្យារពេលដោយសារខ្លាចការបាញ់គ្រាប់រុ៉ក្កែតរបស់ពួកប៉ាឡេស្ទីន ។
មកដល់ថ្ងៃទី១៧ នៃការប្រយុទ្ធគ្នាហាក់ពុំទាន់មានបទឈប់បាញ់គ្នាណាមួយនៅឡើយ ក៏បុ៉ន្តែមនុស្សមួយចំនួនសង្ឃឹមថា អាចមានបទឈប់បាញ់មានកម្រិតមួយ ។លោកចន គ័ររី កាលពីយប់ថ្ងៃទី២៣ កក្កដា បានវិលត្រឡប់ពីអុីស្រាអែលទៅកាន់អេហ្ស៊ីប ក្រោយការជួបនៅទីក្រុងហ្សេរុយសាឡឹម និងនៅតំបន់ស៊ីសហ្ស៊កដានី ជាមួយប្រធានាធិបតីប៉ាឡេស្ទីន លោកម៉ាមូដអាប់បាស់ អគ្គលេខាធិការ អ.ស.ប លោកបាន គីមូន និងនាយកដ្ឋមន្ត្រីអុីស្រាអែល លោកបេនចាមីននេតាន់យ៉ាហ៊ូ។
យោងតាមអ្នកទទួលខុសត្រូវអេហ្ស៊ីបម្នាក់ថា បទឈប់បាញ់មនុស្សធម៌មួយអាចមានជាធរមាននាចុងសប្តាហ៍នេះនាឱកាសបុណ្យធំរបស់អ៊ិស្លាម គឺបុណ្យស្រាយបួស AID EL FITR ដែលកំណត់ពីការបញ្ចប់ខែរ៉ាម៉ាដាន ។គណៈរដ្ឋមន្ត្រីអុីស្រាអែល ពុំបានចេញផ្សាយសេចក្តីសម្រេចចិត្តណាមួយឡើយ ក្រោយកិច្ចប្រជុំកាលពីយប់ថ្ងៃទី២៣ កក្កដា លើសំណើបទឈប់បាញ់មនុស្សធម៌នោះ ដែលគ្រោងឱ្យបញ្ឈប់ការប្រយុទ្ធគ្នាជាបន្ទាន់ រួចខ្លឹមសារច្បាស់លាស់នឹងត្រូវសម្រេចក្នុងការចរចាគ្នានាថ្ងៃបន្ទាប់ ។
ចំណែកមេដឹកនាំរបស់ក្រុមហាម៉ាស់ លោកខាលីដ មីចាអុីល ថ្លែងនៅប្រទេសកាតាថា លោកត្រៀមសម្រាប់បទឈប់បាញ់មនុស្សធម៌មួយ តែបដិសេធបទឈប់បាញ់គ្នាដ៏ស្ថិតស្ថេរមួយ បើដរាបណាអុីស្រាអែលពុំលុបចោលការឡោមព័ទ្ធជ្រោយហ្គាហ្សាទេនោះ។
រីឯរដ្ឋាភិបាលអុីស្រាអែលវិញចង់បន្តការវាយលុកខាងជើងគោករបស់ខ្លួនដើម្បីកម្ទេចទីតាំងស្តុកគ្រាប់រុ៉ក្កែត និងរូងក្រោមដីទាំងឡាយរបស់ពួកប៉ាឡេស្ទីន ។ ទោះបីយ៉ាងណា អុីស្រាអែលស្ថិតក្រោមការគាបសង្កត់របស់អន្តរជាតិឱ្យកាត់បន្ថយទំហំនៃការប្រយុទ្ធ ពិសេសចាប់តាំងពីអាជ្ញាធរអាមេរិកហាមឃាត់ការហោះហើររបស់បណ្តាយន្តហោះមកកាន់ក្រុងតែលអាវីវដោយសារការបាញ់គ្រាប់រុ៉ក្កែត ពីជ្រោយហ្គាហ្សាដាក់អុីស្រាអែល ។ ក្រុមហ៊ុនអាកាសចរណ៍ជាច្រើនទៀត ក្រោយឃើញការកម្ទេចយន្តហោះម៉ាឡេស៊ីនៅភាគខាងកើតអ៊ុយក្រែន ក៏ធ្វើដូចអាមេរិកដែរ ។
អ្នកនាំពាក្យម្នាក់របស់ក្រុមហាម៉ាស់ លោកអាប៊ូហ្សូរី វាយតម្លៃថា ការហាមឃាត់ការហោះហើរទាំងនេះ គឺជាជ័យជម្នះធំមួយសម្រាប់ក្រុមអ៊ិស្លាមនិយមនោះ ។អុីស្រាអែលក៏ស្ថិតក្រោមការគាបសង្កត់របស់ អ.ស.ប ផងដែរ ។ លោក NAVI PILLAY នាយស្នងការជាន់ខ្ពស់ អ.ស.ប ខាងសិទ្ធិមនុស្ស ថ្លែងកាលពីថ្ងៃទី២៣ កក្កថា ថាមានលទ្ធភាពខ្ពស់មួយដែលអុីស្រាអែលប្រព្រឹត្តឧក្រិដ្ឋកម្មសង្គ្រាមនៅហ្គាហ្សា ហើយក្រុមប្រឹក្សាសិទ្ធិមនុស្ស អ.ស.ប បានអនុម័តយល់ស្របឱ្យបើកការសើុបអង្កេតជាអន្តរជាតិមួយ ។
ដោយខឹងសម្បា លោកបេនចាមីននេតាន់យ៉ាហ៊ូ ថ្លែងថា ក្រុមប្រឹក្សាសិទ្ធិមនុស្ស អ.ស.ប យកល្អត្រូវធ្វើការសើុបអង្កេតលើការសម្រេចរបស់ក្រុមហាម៉ាស់ ប្រែក្លាយមន្ទីរពេទ្យជាទីតាំងបញ្ជាការយោធា ប្រើប្រាស់បណ្តាសាលារៀនជាកន្លែងស្តុកអាវុធ ហើយដាក់ទីតាំងបាញ់មីស៊ីលនៅក្បែរកន្លែងលេងកីឡា និងបណ្តាអគារឯកជន ព្រមទាំងបណ្តាព្រះវិហារអ៊ិស្លាម ។
ចំនួនជនប៉ាឡេស្ទីនស្លាប់នៅជ្រោយហ្គាហ្សា គិតមកដល់ព្រឹកថ្ងៃទី២៤ កក្កដា ឡើងដល់៧០៣នាក់ក្រោយការស្លាប់មនុស្ស១៨នាក់ដោយសារការបាញ់ផ្លោងរបស់កងរថក្រោះអុីស្រាអែល ។ ក្នុងចំណោមអ្នកស្លាប់ទាំងនេះ៦នាក់ជាសមាជិកគ្រួសារតែមួយ ។
កាលពីថ្ងៃទី២៣ កក្កដា ទាហានអុីស្រាអែល៣នាក់បានត្រូវស្លាប់ ធ្វើឱ្យចំនួនទាហានអុីស្រាអែលស្លាប់ក្នុងការប្រយុទ្ធគ្នាឡើងដល់៣២នាក់ហើយ ។ ចំណែកជនស៊ីវិលអុីស្រាអែល៣នាក់ ក៏ត្រូវស្លាប់ដែរ ដោយសារការបាញ់គ្រាប់រុ៉ក្កែតពីជ្រោយហ្គាហ្សា ។
ការបាញ់គ្រាប់រុ៉ក្កែតរបស់ពួកប៉ាឡេស្ទីនមានការចុះថយបន្តិចកាលពីថ្ងៃទី២៣ កក្កដា ដោយគ្រាប់រ៉ុក្កែតតែ៩៨គ្រាប់ត្រូវបាញ់ដាក់អុីស្រាអែល ក្នុងនោះ៧០គ្រាប់ផ្ទុះលើដែនដីអុីស្រាអែល ហើយ២៥គ្រាប់ត្រូវស្ទាក់កម្ទេចដោយប្រព័ន្ធការពារ IRON DôME ។ តាមធម្មតាគ្រាប់រ៉ុក្កែតដល់ទៅជាង១១០គ្រាប់ត្រូវបានបាញ់ចេញក្នុងមួយថ្ងៃៗប្រឆាំងអុីស្រាអែល។អាជ្ញាធរជ្រោយហ្គាហ្សារៀបរាប់ថា រយៈពេល១៦ថ្ងៃនៃជម្លោះ ផ្ទះប៉ាឡេស្ទីន ៤៧៥ខ្នងរងការកម្ទេច និង២.៦៤៤ខ្នងរងការខូចខាតធ្ងន់ ឬស្រាល ។ សាលារៀន៤៦កន្លែង ព្រះវិហារ៥៦កន្លែង ព្រមទាំងមន្ទីរពេទ្យ៧កន្លែង ក៏រងការវាយប្រហារដែរ ៕
ចែករំលែកព័តមាននេះ