ទន្ទឹមនឹងការនាំមុខរបស់កីឡាករអុីតាលី Vincenzo Nibali លើតារាងថិរវេលាសរុបចេះតែបន្តជាច្រើនដំណាក់ Rafal Majka ក៏បានបង្កើតប្រវត្តិសាស្ត្រថ្មីមួយសម្រាប់ខ្លួនឯងផងដែរខណៈកាលពីថ្ងៃពុធ ទី២៣ កក្កដា គេបានយកឈ្នះជើងឯកក្នុងដំណាក់នៃព្រឹត្តិការណ៍ Tour de France ជាលើកទី២ ។
ទន្ទឹមនឹងការនាំមុខរបស់កីឡាករអុីតាលី Vincenzo Nibali លើតារាងថិរវេលាសរុបចេះតែបន្តជាច្រើនដំណាក់ Rafal Majka ក៏បានបង្កើតប្រវត្តិសាស្ត្រថ្មីមួយសម្រាប់ខ្លួនឯងផងដែរខណៈកាលពីថ្ងៃពុធ ទី២៣ កក្កដា គេបានយកឈ្នះជើងឯកក្នុងដំណាក់នៃព្រឹត្តិការណ៍ Tour de France ជាលើកទី២ ។
អ្នកជិះកង់ឱ្យក្រុម Tinkoff-Saxo វ័យក្មេងរូបនេះបានបញ្ចប់ដំណាក់មានចម្ងាយផ្លូវ១២៤,៥គីឡូម៉ែត្រ ចេញដំណើរពីទីប្រជុំជន Saint-Gaudens ឆ្ពោះទៅកាន់ទីប្រជុំជន Saint-Lary-Soulan Pla d’Adet ប្រទេសបារាំង ដោយប្រើអស់ថិរវេលា៣ម៉ោង៣៥នាទីនិង២៣វិនាទី នាំមុខកីឡាករអុីតាលី Giovanni Visconti ជិះឱ្យក្រុម Movistar Team ដែលបានប្រើថិរវេលាច្រើនជាង២៩វិនាទី និងនាំមុខកីឡាករ Vincenzo Nibali ដែលកំពុងនាំមុខលើតារាងថិរវេលារួម ។
ថ្លែងបន្ទាប់ពីទទួលបានជ័យជម្នះ ៖ «ខ្ញុំសប្បាយចិត្តខ្លាំងណាស់ចំពោះលទ្ធផលឆ្នាំនេះ ។ ជ័យជម្នះទាំងនេះបានកើតចេញពីការខិតខំប្រឹងប្រែងរវាងខ្ញុំ និងមិត្តក្នុងក្រុម ជាពិសេសគឺកីឡាករ Nico ។ បើគ្មានរូបគេទេ ខ្ញុំពិតជាមិនអាចចេញផុតពីហ្វូងអ្នកជិះកង់ដ៏ធំនោះឡើយ» ។ដោយឡែកនៅលើតារាងថិរវេលាសរុបវិញ Nibali នៅតែបន្តការនាំមុខជាដដែល ។
ឆ្លងកាត់ការប្រណាំងអស់១៧ដំណាក់មកនេះ រូបគេបានប្រើអស់ថិរវេលាតិចជាងគេបំផុតគឺ៧៦ម៉ោង៤១នាទីនិង២៨វិនាទី នាំមុខកីឡាករអេស្ប៉ាញ Alejandro Valverde ជិះឱ្យក្រុម Movistar Team ដែលបានប្រើពេលច្រើនជាង៥នាទីនិង២៦វិនាទី ។ ចំណែកកីឡាករបារាំង Thibaut Pinot របស់ក្រុម FDJ.fr ស្ថិតនៅលំដាប់ទី៣ បន្ទាប់ពីបានប្រើថិរវេលាច្រើនជាង Nibali ៦នាទី។
សូមបញ្ជាក់ថា ការប្រណាំងកម្មវិធី Tour de France ឆ្នាំនេះមាន២១ដំណាក់ និងមានចម្ងាយផ្លូវសរុប៣៦៦៣,៥គីឡូម៉ែត្រ ។ ចំពោះដំណាក់ទី១៨ ដែលជាដំណាក់បន្តមានចម្ងាយផ្លូវ១៤៥,៥គីឡូម៉ែត្រ ដោយការប្រណាំងចាប់ចេញដំណើរពីទីប្រជុំជន Pau ឆ្ពោះទៅកាន់ទីប្រជុំជន Hautacam ប្រទេសបារាំង ៕
ចែករំលែកព័តមាននេះ