រាជធានីភ្នំពេញ ៖ បុរសម្នាក់បានបើករថយន្តឡិចស៊ីស ៤៦០ មួយគ្រឿងជ្រុលចង្កូតទៅបុកសញ្ញាព្រួញនិងរបាំងថ្មពុុះចែកទ្រូងផ្លូវបណ្តាលឱ្យបាក់អស់ចំនួន១៥កង់ ចំណែករថយន្តរងការខូចខាតតិចតួច សំណាងល្អអ្នកបើកបរពុំមានរងរបួស ។ ហេតុការណ៍នេះកើតឡើងកាលពីវេលាម៉ោង ១២ និង៤៥នាទីរំលងអាធ្រាត្រ ឈានចូលថ្ងៃទី ២៤ កក្កដា ២០១៤ នៅចំណុចមុខវិទ្យាល័យបឹងត្របែក ស្ថិតតាមបណ្តោយផ្លូវព្រះមុនីវង្ស ស្ថិតនៅក្នុងសង្កាត់បឹងត្របែក ខណ្ឌចំការមន ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញបុរសម្នាក់បើករថយន្តឡិចស៊ីស៤៦០ មួយគ្រឿងពណ៌ខ្មៅ ពាក់ស្លាកលេខនគរបាល ២.១៦៥៥ ធ្វើដំណើរតាមផ្លូវព្រះមុនីវង្ស យ៉ាងលឿនក្នុងទិសដៅ ពីជើងមកត្បូងមកដល់ចំណុចកើតហេតុរថយន្តបានជ្រុលចង្កូតមកបុកសញ្ញាព្រួញចរាចរនិងរបាំងថ្មពុះចែកទ្រូងផ្លូវអស់ចំនួន១៥ផ្ទាំង ហើយសំណាងល្អអ្នកបើកបរពុំមានរងគ្រោះថ្នាក់ រថយន្តរងការខួចខាតតិចតួច។
ក្រោយពេលកើតហេតុសមត្ថកិច្ចបានចុះមកវាស់វែង និងយករថយន្តខាងលើទៅកាន់ការិយាល័យចរាចរផ្លូវគោកនៃអធិការដ្ឋាននគរបាលរាជធានីភ្នំពេញ ដើម្បីដោះស្រាយគ្នាតាមផ្លូវច្បាប់ ។
ចែករំលែកព័តមាននេះ