ខេត្តស្ទឹងត្រែង ៖ស្ត្រីម្នាក់បានដឹកដៃកូនតូចរបស់ខ្លួនទៅដាក់ពាក្យបណ្តឹងនៅនគរបាលព្រហ្មទណ្ឌ ដោយប្តឹងចោទបុរសជាប្តីថា បានពង្រត់នារីវ័យក្មេងម្នាក់ទៅរស់នៅរួមស្នេហ៍យ៉ាងមានក្តីសុខនៅក្នុងភូមិស្រែសាមី ឃុំតាឡាត ស្រុកសេសាន ។ ពេលទទួលបានព័ត៌មាននេះ នគរបាលក៏បានឃាត់ខ្លួនបុរសជាប្តីជាមួយនារីវ័យក្មេងនោះនាំមកស្នងការដ្ឋាននគរបាលខេត្ត ។
ខេត្តស្ទឹងត្រែង ៖ស្ត្រីម្នាក់បានដឹកដៃកូនតូចរបស់ខ្លួនទៅដាក់ពាក្យបណ្តឹងនៅនគរបាលព្រហ្មទណ្ឌ ដោយប្តឹងចោទបុរសជាប្តីថា បានពង្រត់នារីវ័យក្មេងម្នាក់ទៅរស់នៅរួមស្នេហ៍យ៉ាងមានក្តីសុខនៅក្នុងភូមិស្រែសាមី ឃុំតាឡាត ស្រុកសេសាន ។ ពេលទទួលបានព័ត៌មាននេះ នគរបាលក៏បានឃាត់ខ្លួនបុរសជាប្តីជាមួយនារីវ័យក្មេងនោះនាំមកស្នងការដ្ឋាននគរបាលខេត្ត ។
ស្ត្រីជាប្រពន្ធបានរៀបរាប់ថា គាត់ឈ្មោះភុំ សាវ៉ាន់ អាយុ៤៨ឆ្នាំ ជាជនជាតិព្នងបានរៀបការស្របច្បាប់ជាមួយបុរសជាប្តីឈ្មោះកែ សាវ៉ាត អាយុ៣៩ឆ្នាំ កាលពីឆ្នាំ១៩៩៨ ។ ការរួមរស់ជាមួយគ្នាជាប្តី-ប្រពន្ធអស់រយៈពេល១៦ឆ្នាំមក មានកូន៤នាក់ កូនប្រុសច្បង បច្ចុប្បន្នអាយុ១៦ឆ្នាំ និងកូនស្រីតូចអាយុ៤ឆ្នាំ ។ ស្ត្រីជាប្រពន្ធនិងជាដើមបណ្តឹងបន្តថា ក្នុងការរួមរស់ជាមួយគ្នា មិនដែលមានបញ្ហាអ្វីទេ តែនៅថ្ងៃទី២៣ មករា ២០១៤ ស្រាប់តែប្តីរបស់គាត់ចុះចេញពីផ្ទះដោយនាំស្រី្តម្នាក់ឈ្មោះញុង សុខា ហៅស្រី អិត អាយុ២៣ឆ្នាំ ជាអ្នករស់នៅក្នុងភូមិសង្គម ឃុំសណ្តាន់ ស្រុកសំបូរ ខេត្តក្រចេះ ជាមួយគ្នាទៅបាត់សូន្យឈឹង ។
ក្រោយមកក៏ទទួលដំណឹងពីអ្នកស្រុកភូមិជាមួយគ្នាប្រាប់ថា គេបានឃើញប្តីគាត់រស់នៅជាមួយនារីនោះនៅក្នុងភូមិស្រែសាមី ឃុំតាឡាត ស្រុកសេសាន ខេត្តស្ទឹងត្រែង ទើបគាត់សម្រេចចិត្តធ្វើដំណើរពីខេត្តក្រចេះមកដល់ខេត្តស្ទឹងត្រែង និងបានជួបប្តីនិងស្រីនោះមែន ។ ពេលនោះ គាត់បានសុំឱ្យប្តីទៅរួមរស់ជាប្រពន្ធ-ប្តីដូចគ្រាមុន និងមិនប្រកាន់រឿងដែលបានកើតឡើងនេះឡើយ តែបុរសជាប្តីបានឆ្លើយថាមិនព្រមទៅនៅជាមួយគ្នាវិញទេ ដោយសុំសម្រុះសម្រួលគ្នា ។ គាត់បានសុំឱ្យប្តីចំណាយលុយជួយចិញ្ចឹមកូនក្នុងមួយខែមួយរយដុល្លារ តែបុរសជាប្តីឆ្លើយតបវិញថា ពុំមានលទ្ធភាពទេ បើមួយខែ២០ម៉ឺនរៀលអាចបាន ។ ដោយការដោះស្រាយរវាងប្តីនិងប្រពន្ធមិនត្រូវគ្នា ស្ត្រីជាប្រពន្ធក៏សម្រេចចិត្តដាក់ពាក្យប្តឹង ដើម្បីឱ្យច្បាប់ជាអ្នកវិនិច្ឆ័យ ។ ក្រោយពីទទួលបានពាក្យបណ្តឹង សមត្ថកិច្ចឃាត់ខ្លួនបុរសជាប្តីមកស្នងការដ្ឋាន និងធ្វើការសម្រុះសម្រួលជាថ្មី តែបុរសជាប្តីប្រកាន់ជំហររស់នៅស្ម័គ្រស្មោះជាមួយនារីក្មេងមិនត្រឡប់ក្រោយឡើយ បើទោះបីជាច្បាប់កំណត់ឱ្យជាប់ទោសក៏ដោយ ។
បុរសជាប្តីរៀបរាប់ថា គាត់មិនចង់បែកពីប្រពន្ធទេ តែដោយសាររស់នៅជាមួយគ្នារយៈពេលជាង១០ឆ្នាំ កន្លងមកនេះប្រពន្ធមិនដែលយកកាតព្វកិច្ចជាភរិយាមកនៅក្នុងគ្រួសារឱ្យមានសេចក្តីសុខនោះឡើយ ។ ការរួមរស់ជាមួយគ្នារហូតមានកូនប្រុស-ស្រី៤នាក់ ស្ត្រីជាប្រពន្ធថ្ងៃណាក៏ជេរប្រមាថ ដៀលច្រាសឆ្អេះ ចោទថាគាត់គ្មានកំណើតរកស៊ីមិនដែលបានលុយកាក់ចូលផ្ទះទេ ក្រៅពីធ្វើស្រែ ។ នៅថ្ងៃមួយ នារីដែលស្រឡាញ់គ្នាបានទូរស័ព្ទហៅគាត់ឱ្យយកប្រេងសាំង ព្រោះម៉ូតូគាត់អស់សាំង ស្រាប់តែប្រពន្ធដើមដឹងក៏កើតជាការប្រចណ្ឌរហូតជេរប្រមាថ និងគំរាមយកទឹកអាស៊ីតទៅជះលើនារីរូបនេះទៀត ។ ដោយនឹកឃើញថាខ្លាចមានរឿង ខ្លួនក៏នាំនារីម្នាក់នោះចាកចេញពីភូមិទៅរស់នៅដោយយកគ្នាជាប្តី-ប្រពន្ធក្រោមការព្រមព្រៀងគ្នាដោយចិត្តនិងចិត្តតែម្តងទៅ ។ ក្រោយមក ស្ត្រីជាប្រពន្ធដើមតាមរកឃើញ ហើយហៅឱ្យទៅនៅជាមួយគ្នាវិញ តែទោះបីជាយ៉ាងណាគាត់មិនអាចទៅវិញជាដាច់ខាត គឺសុខចិត្តរស់នៅភ្ជាប់និស្ស័យជាមួយប្រពន្ធក្រោយ ដែលមិនចេះជេរប្រមាថវិញ ។
ចំណែកនារីវ័យក្មេងអាយុ២៣ឆ្នាំ ជាជនជាតិព្នង និងជាប់ឈ្មោះលួចសហាយស្មន់ជាមួយប្តីគេនិយាយថា នាងមិនមានអ្វីប្រកែកនោះទេ បើសិនជាប្តីទៅប្រពន្ធដើមវិញនោះ នាងក៏មិនមានសិទ្ធិឃាត់ឃាំងដែរ ព្រោះនាងជាប្រពន្ធក្រោយ ។ ប៉ុន្តែបើគាត់មិនទៅទេ គឺនាងនៅតែត្រូវការប្តីម្នាក់នេះដដែល ឱ្យតែគាត់ចេះនៅថ្នាក់ថ្នមដូចរាល់ថ្ងៃ គឺមានសុភមង្គលណាស់ហើយ ។
លោកវរសេនីយ៍ទោ ហោ វុទ្ធី នាយការិយាល័យនគរបាលព្រហ្មទណ្ឌកម្រិតស្រាលឱ្យដឹងថា តាមច្បាប់ឯកព័ន្ធភាព ក្រោយពីសម្រុះសម្រួលភាគីទាំងសងខាងមិនត្រូវរ៉ូវគ្នា ហើយដើមបណ្តឹងមិនព្រមដកពាក្យបណ្តឹងសមត្ថកិច្ចមានតែកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ