រាជធានីភ្នំពេញ ៖ ប្រជាពលរដ្ឋប្រមាណជិត១០០នាក់ បាននាំគ្នាឡោមព័ទ្ធចាប់ខ្លួនស្ត្រីអ្នកលក់នំម្នាក់ ដែលមានចិត្តសាហាវដូចខ្លា ខណៈឃើញកម្មការិនីរោងចក្រកាត់ដេរម្នាក់ ពាក់គ្រឿងអលង្ការនៅជាប់ខ្លួន ក៏មានចិត្តចង់បាន និងស្ទុះចូលទៅចាប់ក្រៀកជាប់ រួចយកកូនកាំបិតចិតបន្លែចុងស្រួចមួយ ទៅភ្ជង់ និងប៉ុនប៉ងសម្លាប់ដោយអារផ្ដាច់បំពង់.ក ក្នុងបំណងប្លន់យកគ្រឿងអលង្ការនោះ ។
ប៉ុន្តែខណៈនោះ ស្ត្រីរងគ្រោះនៅមានស្មារតីរឹងប៉ឹង ក៏ប្រវាយប្រតប់ ដណ្តើមយកកូនកាំបិតពីដៃស្ត្រីខាងលើបាន ហើយស្រែកឆោឡោឱ្យប្រជាពលរដ្ឋដែលនៅជិតខាងជួយ បង្កឱ្យមានការភ្ញាក់ផ្អើលយ៉ាងខ្លាំង ។ ខណៈនោះ ប្រជាពលរដ្ឋក៏នាំគ្នាមកឡោមព័ទ្ធចាប់ស្ត្រីកំណាចម្នាក់នេះបានភ្លាមៗ តែដោយយល់ថាជាស្ត្រីភេទ មហាជនមិនបានវាយដំច្រំធាក់ឡើយ គឺនាំយកទៅប្រគល់ឱ្យនគរបាលប៉ុស្ដិ៍ចោមចៅ ដើម្បីសាកសួរ និងកសាងសំណុំរឿងបញ្ជូនទៅសាលាដំបូង ចាត់ការតាមផ្លូវច្បាប់ ។
ហេតុការណ៍នេះបង្កឱ្យមានការភ្ញាក់ផ្អើលឡើង កាលពីវេលាម៉ោង៥និង១០នាទីល្ងាច ថ្ងៃទី២២ កក្កដា នៅផ្ទះជួលមួយកន្លែង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ស្ត្រីជាជនសង្ស័យប្លន់ខាងលើឈ្មោះ ផុន លីនដា អាយុ៣៤ឆ្នាំ ជាអ្នកលក់នំនៅក្នុងផ្សារត្រពាំងថ្លឹង (ហៅផ្សារយាយម៉េវ) និងមានស្រុកកំណើតនៅខេត្តបាត់ដំបង ហើយសព្វថ្ងៃស្នាក់នៅផ្ទះជួល ក្នុងភូមិថ្មគោល សង្កាត់ចោមចៅ ។ ដោយឡែក ស្ត្រីរងគ្រោះឈ្មោះ ចេង ស្រីនី អាយុ២៤ឆ្នាំ ជាកម្មការិនីរោងចក្រកាត់ដេរ មានស្រុកកំណើតនៅភូមិត្រពាំងសោម ឃុំត្រពាំងគ្រញូង ស្រុកត្រាំកក់ ខេត្តតាកែវ និងស្នាក់នៅផ្ទះជួលក្នុងភូមិកើតហេតុខាងលើ រងរបួសស្រាលត្រង់បំពង់.ក ដោយសារមុតនឹងកាំបិត ពេលមានការប្រវាយប្រតប់ជាមួយនឹងស្ត្រីជាជនសង្ស័យ ។
តាមប្រភពព័ត៌មានពីប្រជាពលរដ្ឋបានឱ្យដឹងថា ស្ត្រីរងគ្រោះពាក់គ្រឿងអលង្ការប្លាទីនមួយចំនួននៅជាប់ខ្លួន ដូចជាខ្សែ.ក កងដៃ និងក្រវិល ជាដើម ជាការលម្អខ្លួនប្រាណជារៀងរាល់ថ្ងៃ ដោយមិនបានគិតថា នឹងមានរឿងបែបនេះឡើយ ។ មុនពេលកើតហេតុ ស្ត្រីជាជនសង្ស័យ បានទៅសម្ងំលាក់ខ្លួននៅក្បែរផ្ទះជួលដែលកម្មការិនីរូបនេះស្នាក់នៅ ។ លុះពេលនារីរងគ្រោះចេញពីធ្វើការនៅរោងចក្រវិញ ដើរត្រឡប់ចូលក្នុងបន្ទប់ជួល ស្រាប់តែស្ត្រីជាជនល្មើសស្ទុះចូលទៅចាប់ឱបពីក្រោយជាប់ ហើយយកកូនកាំបិតចិតបន្លែចុងស្រួចភ្ជង់គំរាមឱ្យដោះគ្រឿងអលង្ការដែលពាក់ជាប់នឹងខ្លួន ប៉ុន្តែនារីរងគ្រោះមិនព្រមដោះឱ្យឡើយ ជាហេតុធ្វើឱ្យស្ត្រីជាជនល្មើសខឹងជាខ្លាំង ក៏ប៉ុនប៉ងអារ.ក សម្លាប់ ។
ប្រភពព័ត៌មានបន្តទៀតថា ប៉ុន្តែពេលនោះជនរងគ្រោះខំប្រឹងប្រវាយប្រតប់តដៃវិញ រហូតដណ្ដើមយកកូនកាំបិតពីដៃស្ត្រីជនល្មើសបានទៀត ក៏ស្រែកឱ្យអ្នកជិតខាងជួយ ទើបបង្កឱ្យមានការឆោឡោដល់មហាជនដែលនៅក្បែរនោះ នាំគ្នាចេញមកព័ទ្ធចាប់ជនល្មើសបានភ្លាមៗ ។ មហាជន មានការខឹងសម្បាខ្លាំងណាស់ចំពោះស្ត្រីល្មើសរូបនោះ ប៉ុន្តែដោយយល់ថាជាស្ត្រីភេទ ទើបមិនមាននរណាវាយដំអ្វីឡើយ និងបាននាំទៅឱ្យនគរបាលប៉ុស្ដិ៍ចោមចៅ ដើម្បីសាកសួរ និងកសាងសំណុំរឿងចាត់ការតាមច្បាប់ ចំណែកនារីរងគ្រោះ រងរបួសស្រាលត្រង់បំពង់.ក ។
ក្រោយពេលនាំខ្លួនយកទៅសាកសួរ ស្ត្រីជាជនសង្ស័យ បានសារភាពប្រាប់នគរបាលថា ខ្លួនពិតជាធ្វើសកម្មភាពបែបនេះមែន ព្រោះលក់នំមិនចំណេញគ្រប់គ្រាន់សម្រាប់ការចាយវាយ ហើយដោយឃើញជនរងគ្រោះពាក់គ្រឿងអលង្ការបែបនេះផង ក៏បែកគំនិតប្លន់តែម្តង ៕
ចែករំលែកព័តមាននេះ