រាជធានីភ្នំពេញ ៖ ប្រហិតដែលគេអះអាងថា ធ្វើអំពីសាច់ត្រីមានទំងន់៣តោន ដែលឈ្មួញដឹកចូលពីប្រទេសវៀតណាមដោយខុសច្បាប់និងបម្រុងយកទៅលក់និងចែកចាយនៅទីផ្សារខេត្តបាត់ដំបង ត្រូវបានសមត្ថកិច្ចនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ ចាប់ឃាត់ទុករួមជាមួយស្ត្រីម្ចាស់ប្រហិតនោះផង កាលពីវេលាម៉ោង១១យប់ថ្ងៃទី២២ កក្កដា ។
ស្ត្រីម្ចាស់ទំនិញឈ្មោះ ចាន់ ធា អាយុ ៣២ឆ្នាំ រស់នៅផ្ទះគ្មានលេខ ផ្លូវជាតិលេខ២១ ភូមិព្រែករុន ឃុំព្រែកគយ ស្រុកស្អាង ខេត្តកណ្តាល ។ ទាក់ទិននឹងករណីបង្ក្រាបបទល្មើសនាំចូលប្រហិតសាច់ត្រីខុសច្បាប់នេះ ត្រូវបានលោកឧត្តមសេនីយ៍ត្រី ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ឲ្យដឹងថា រាល់កិច្ចប្រជុំរបស់នាយកដ្ឋាននគរបាលប្រឆាំងបទល្មើសសេដ្ឋកិច្ចលោកឧត្តមសេនីយ៍ឯក ជា សុមេធី អគ្គស្នងការរង និងជាប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច តែងតែដាស់តឿនក្រើនរំលឹកដល់មន្ត្រីជំនាញក្រោមឱវាទ ឲ្យយកចិត្តទុកដាក់ចុះស្រាវជ្រាវ និងបង្ក្រាបរាល់បទល្មើសដែលកើតមានឡើង ព្រមទាំងទប់ស្កាត់មិនឲ្យឈ្មួញទុច្ចរិតប្រព្រឹត្តបទល្មើសបាន ។
លោកឧត្តមសេនីយ៍ត្រី ឡុង ស្រេង បន្តថា ជាក់ស្តែងដូចករណីខាងលើនេះ ត្រូវបានកម្លាំងជំនាញដែលដឹកនាំដោយរូបលោកផ្ទាល់ស្ទាក់ចាប់បាននៅចំណុចភ្លើងស្តុបចំការមន ក្នុងសង្កាត់ទន្លេបាសាក់ ខណ្ឌចំការមន ។ មុនបង្ក្រាបបទល្មើសជាក់ស្តែងនេះ កាលពីព្រលប់ថ្ងៃទី២២ កក្កដា កម្លាំងនគរបាលជំនាញនៃនាយកដ្ឋានប្រឆាំងបទល្មើសសេដ្ឋកិច្ច បានរាយការណ៍មកថា មានឈ្មួញនាំចូលទំនិញខុសច្បាប់(ប្រហិតសាច់ត្រី) ១រថយន្តទួរីសពីប្រទេសវៀតណាមឆ្លងកាត់ច្រកទ្វារជ្រៃធំបំណងយកទៅលក់និងចែកចាយតាមទីផ្សារក្នុងខេត្តបាត់ដំបង ។
ពេលទទួលបានព័ត៌មាននោះ លោកបានត្រៀមកម្លាំងស្ទាក់ចាំចាប់ឈ្មួញដឹកប្រហិតសាច់ត្រីនៅរាជធានីភ្នំពេញព្រោះថា គេមិនអាចគេចចេញតាមច្រកណាបានទេ ហើយជាក់ស្តែងយើងចាប់បានមែន ។ លោកឧត្តមសេនីយ៍ ឡុង ស្រេង បន្តថា ប្រហិតសាច់ត្រីដែលយើងចាប់បាននោះ មានចំនួន៦០ការុងស្មើនឹងទម្ងន់៣តោន ជាប្រហិតនាំចូលគ្មានច្បាប់អនុញ្ញាតនិងជាទំនិញខូចគុណភាព ។ បានជាអះអាងយ៉ាងដូច្នេះ ព្រោះម្ចាស់ទំនិញពុំមានលិខិតស្របច្បាប់ពីការនាំចូលបង្ហាញជួនសមត្តកិច្ចទ្បើយ ហើយទំនិញនោះទៀតសោត អាចពាក់ព័ន្ធនឹងការប្រើប្រាស់ដាក់ថ្នាំជាតិបារ៉ត ដើម្បីទុកបានយូរថ្ងៃកុំឱ្យស្អុយដែលអ្នកបរិភោគប្រឈមការប៉ះពាល់សុខភាព។
លោក ទ្បុង ស្រេង បញ្ជាក់ថា ជាតិបារ៉តជាថ្នាំដែលគេដាក់ការពារកុំឲ្យទំនិញឆាប់ខូច និងទុកបានយូរមែន តែវាប៉ះពាល់ដល់សុខភាពប្រជាពលរដ្ឋដែលយកមកទទួលទាន ដោយគ្មានការត្រួតពិនិត្យ ។ លោកសូមសំណូមពរដល់អ្នកធ្វើអាជីវកម្មផ្សេងទៀត ត្រូវបញ្ឍប់ជាបន្ទាន់និងបានទទូចដល់ប្រជាពលរដ្ឋទូទាំងប្រទេស សុំឲ្យមានការប្រុងប្រយត្ន័នៅពេលទទួលទានម្ហូបអាហារទាំងឡាយណា ដែលនាំចូលដោយខុសច្បាប់ ព្រោះម្អូបអាហារទាំងនោះភាគច្រើនត្រូវឈ្មួញកែច្នៃវា ដើម្បីបានប្រយោជន៍ចូលហោប៉ៅគេតែប៉ុណ្ណោះ ដោយមិនបានគិតពីសុខភាពអ្នកទិញយកទៅទទួលទាននោះទេ ។
ស្ត្រីជាម្ចាស់ទំនិញ ត្រូវបានសមត្ថកិច្ចកសាងសំណុំរឿងបញ្ជួនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ រីឯប្រហិតសាច់ត្រីចំនួន៣តោននោះ នឹងត្រូវយកទៅកម្ទេចចោលក្រោយពីមន្ត្រីកាំកុងត្រូលត្រួតពិនិត្យជាផ្លូវការរួច ៕
ចែករំលែកព័តមាននេះ