រាជធានីភ្នំពេញ ៖ សកម្មភាពបូមខ្សាច់របស់ក្រុមហ៊ុនជាច្រើនបូករួមជាមួយនឹងការដ្ឋានស្ថាបនាផ្លូវ និងលូនៅតំបន់អភិវឌ្ឍន៍អតីតបឹងទំពុនបច្ចុប្បន្នបាននិងកំពុងបង្កការក្តៅក្រហាយដល់អ្នកស្រុកក៏ដូចជាកម្មករ-កម្មការិនីរោងចក្រកាត់ដេរ ។ នៅល្ងាចថ្ងៃទី២២ កក្កដា ក្រុមហ៊ុនធ្វើអាជីវកម្មទាំងនោះបានបូមខ្សាច់ធ្វើឱ្យទឹកលិចលង់ហៀរហូរចូលដល់បរិវេណរោងចក្រកាត់ដេរ បង្កជាបញ្ហាថ្នាំងថ្នាក់ដល់កម្មករ-កម្មការិនីយ៉ាងខ្លាំង ។
ចំពោះការអភិវឌ្ឍ ហើយបង្កជាបញ្ហាដល់អ្នកស្រុកពាក់ព័ន្ធនឹងការបូមខ្សាច់ពន្លិចលំនៅឋាន ក៏ដូចជារោងចក្រនេះ គឺអ្នកស្រុកតែងតែប្តឹងតវ៉ាជាញឹកញាប់មកហើយ តែអាជ្ញាធរមូលដ្ឋានហាក់បីដូចជាមិនសូវអើពើចំពោះទុក្ខលំបាករបស់អ្នកស្រុកឡើយ ដោយបណ្តោយឱ្យក្រុមហ៊ុនធ្វើព្យុះ ធ្វើភ្លៀង តាមទំនើងចិត្តមិនខ្វល់ពីអ្វីទាំងអស់ឱ្យតែបំពេញផលប្រយោជន៍របស់ខ្លួន ។
ទាក់ទិននឹងបាតុភាពខាងលើនេះ លោកពេជ្រ កែវមុនី អភិបាលខណ្ឌមានជ័យបកស្រាយថា លោកក៏បានឃើញពីបញ្ហានេះដែរ និងកំពុងឱ្យមន្ត្រីជំនាញចាត់វិធានការចំពោះក្រុមហ៊ុនអភិវឌ្ឍន៍ទាំងនោះ ធ្វើយ៉ាងណាកុំឱ្យប៉ះពាល់បង្កការលំបាកដល់អ្នកស្រុក ។ ផ្ទុយទៅវិញ មួយរយៈកន្លងមកនេះ គេកត់សម្គាល់ឃើញថា មេឈ្មួញធំៗ ដែលរកស៊ីបូមខ្សាច់លុបផ្ទៃបឹងតំបន់ខាងលើបាននិងកំពុងធ្វើអាជីវកម្មយ៉ាងសម្រុកដោយមិនខ្វល់អំពីផលប៉ះពាល់អ្វីសោះ ។
ចំពោះបាតុភាពអាក្រក់បែបនេះ អ្នកស្រុកសំណូមពរទៅសាលារាជធានីភ្នំពេញ សូមមានវិធានការធ្វើយ៉ាងណាកុំឱ្យក្រុមហ៊ុនទាំងនោះធ្វើព្យុះ ធ្វើភ្លៀងបំផ្លាញសេចក្តីសុខរបស់អ្នកស្រុក ដែលរស់នៅជុំវិញតំបន់នេះរាប់សិបឆ្នាំមកហើយ ៕
ចែករំលែកព័តមាននេះ