រាជធានីភ្នំពេញ ៖ យុវជនខ្មែរអ៊ិស្លាមម្នាក់ បានរត់ទៅដាក់ពាក្យប្តឹងនៅនគរបាលប៉ុស្តិ៍ច្រាំងចំរេះទី២ ដោយប្រាប់ថាចោរប្លន់ម៉ូតូទៅបាត់ហើយ តែការពិតក្រោយពីសមត្ថកិច្ចស៊ើបសួរទើបដឹងថាចាញ់បោកគេសោះ ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៤និង៣០នាទីរសៀលថ្ងៃទី២៣ កក្តដា នៅភូមិខ១ សង្កាត់ច្រាំងទី២ ខណ្ឌប្ញស្សីកែវ ។
យុវជនរងគ្រោះឈ្មោះ ម៉ាន សាហ្វីយ៉ា អាយុ២៣ឆ្នាំ មានលំនៅភូមិខ៣ សង្កាត់ច្រាំងចំរេះ២ ខណ្ឌប្ញស្សីកែវ ចំណែកម៉ូតូម៉ាកឌ្រីមសេ១២៥ ស៊េរី២០១៤ ពាក់ស្លាកលេខភ្នំពេញ 1CE-1348 ។
ប្រភពព័ត៌មានឱ្យដឹងថា ដំបូងជនរងគ្រោះបានជិះម៉ូតូចេញពីផ្ទះទៅយកត្រី ពេលនោះសា្រប់តែមានជនសង្ស័យម្នាក់ហៅឱ្យឈប់ និងសុំដោយសារទៅជាមួយ លុះជិះបាន១គីឡូដី (ចំណុចកើតហេតុ) ជនសង្ស័យបានប្រាប់ឱ្យជនរងគ្រោះឈប់ ដោយប្រាប់ថាដល់ផ្ទះគេហើយ ។ ប្រភពបន្តថា ខណៈចុះពីលើម៉ូតូជនសង្ស័យក៏បានលើកទូរស័ព្ទនិយាយដើរចុះឡើង រួចក៏សុំខ្ចីម៉ូតូជនរងគ្រោះជិះទៅមុខមួយភ្លែត ក៏ទៅបាត់រហូតតែម្តង ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ