ខេត្តកំពង់ឆ្នាំង ៖ មនុស្ស២នាក់ជាប់ចោទជាមេខ្លោង ក្នុងចំណោមជាច្រើននាក់ ដែលបានប្រើអំពើហិង្សាដោយចេតនា បង្កឱ្យកម្មករធ្វើរបងរបស់ក្រុមហ៊ុន KDC រងរបួសជាង១០នាក់ និងរបងរបស់ក្រុមហ៊ុនបានរងការខូចខាតជាច្រើនកន្លែង កាលពីរសៀលថ្ងៃទី១៧ ខែកក្កដា ឆ្នាំ២០១៤ កន្លងមក ត្រូវបានកម្លាំងនគរបាលខេត្ត ចាប់ឃាត់ខ្លួនបានយ៉ាងលំបាកនៅថ្ងៃទី២១ ខែកក្កដា ឆ្នាំ២០១៤ និងកសាងសំណុំរឿងបញ្ជូនទៅសាលាដំបូង តាមនីតិវិធីរួចរាល់ហើយ ព្រមទាំងត្រូវតុលាការសម្រេចឃុំខ្លួននៅពន្ធនាគារកាលពីល្ងាចថ្ងៃទី២២ កក្កដា ផងដែរ។
មន្ត្រីនគរបាលខេត្តបាននិយាយថា ជនទាំង២នាក់ម្នាក់ឈ្មោះ សៀង ហេង អាយុ៣៤ឆ្នាំ មានទីលំនៅភូមិបឹងកក់ និងម្នាក់ទៀតឈ្មោះ មា៉ង យា៉វ អាយុ២៣ឆ្នាំ រស់នៅភូមិសំរោង ឃុំតាជេស ស្រុកកំពង់ត្រឡាច ។ ប្រភពដដែលបានបន្តថា ជនត្រូវចោទទាំង២នាក់ កាលពីថ្ងៃទី១៧ ខែកក្កដា បានមកជួបជុំគ្នា នៅផ្ទះមេខ្លោងធំឈ្មោះ ស្ងួន ញឿន មានប្រពន្ធឈ្មោះ អុំ សុភី ដែលជាជនពាល ប្រចាំភូមិ ហើយបានបង្កហិង្សា ប្រើដំបង កាំបិត ពូថៅ ចំពាមកៅស៊ូ ញញួរ មានទាំងកាំភ្លើងខ្យល់ផងបាញ់ប្រហារមកលើកម្មករដែលកំពុងធ្វើរបងលើព្រុំដីរបស់ក្រុមហ៊ុន បណ្តាលឱ្យរងរបួសធ្ងន់ស្រាលជាង១០នាក់ ព្រមទាំងចូលវាយបំផ្លាញរបង បណ្តាលឱ្យបាក់បែកជាច្រើនកន្លែងទៀតផង ។
ក្រោយមកក្រុមហ៊ុនបានដាក់ពាក្យប្តឹង ជនបង្កទាំងនោះដែលមានមេខ្លោងធំគឺ ស្ងួន ញឿន និងប្រពន្ធ អុំ សុភី ។ ចំណែកមេខ្លោងបន្ទាប់ទៀតមានឈ្មោះ២នាក់ ដែលបានចាប់ខ្លួនខាងលើនេះ ព្រមទាំងនៅសេសសល់មួយចំនួនទៀត ដែលសំណុំរឿងនេះនៅក្នុងដៃអ្នកច្បាប់កំពុងចាត់ការ បន្ត ។
តាមចម្លើយសារភាពរបស់ជនសង្ស័យទាំង២នាក់បានប្រាប់ថា នៅថ្ងៃទី១៧ កក្កដា ពួកខ្លួនមានគ្នាប្រមាណជាង៨០នាក់ បានមកជួបជុំគ្នានៅផ្ទះឈ្មោះស្ងួន ញឿន នៅភូមិឡពាង ឃុំតាជេស ដោយមានកាំបិត ពូថៅ ចម្ពាមកៅស៊ូ ចបជីក ចបកាប់ កំពួច ដើម្បីធ្វើសកម្មភាពសម្រុកចូលវាយកម្ទេចរបងរបស់ក្រុមហ៊ុនដោយមានអង្គការ UN ធ្វើខ្នង ។
នៅរសៀលថ្ងៃនោះ ពេលធ្វើសកម្មភាពបានបាញ់គ្រាប់ជម្ពាមកៅស៊ូនិងដំបងវាយកម្ទេចរបង ពួកខ្លួនមិនដឹងថា បាញ់ចំអ្នកណាខ្លះទេ គឺពួកខ្លួនពិតជាបានប្រើហិង្សាប្រាកដមែន ព្រោះចាញ់បោកអង្គការ ។ ក្នុងចម្លើយសារភាពដដែលបានបញ្ជាក់ថា កន្លងមកសកម្មភាពតវ៉ា និងធ្វើសកម្មភាពដោយហិង្សាគឺមានខាងអង្គការUN មានលោក ដួង ចិត្រា ដំណាងគណបក្សសង្គ្រោះជាតិ មន្ត្រីសិទ្ធិមនុស្ស និងតំណាងសមាគមមកពីខេត្តពោធិ៍សាត់ ជាអ្នកមកឃ្លាំមើលនិងជួយលើកទឹកចិត្តទិញស្រាឱ្យផឹក ចែកប្រាក់ ចែកអង្ករ ។ តំណាងក្រុមហ៊ុនK.D.C បាននិយាយថា គ្មានទំនាស់រឿងដីធ្លីជាមួយអ្នកទាំងនោះទេ ព្រោះដីរបស់ក្រុមហ៊ុនបានទិញដោយស្របច្បាប់នៅឆ្នាំ២០០៧ ខណៈដែលដីរបស់ម្ចាស់មុនបានធ្វើប្លង់កម្មសិទ្ធិត្រឹមត្រូវនៅឆ្នាំ១៩៩៧ ។ ក្នុងរយៈពេល១០ឆ្នាំ ដែលម្ចាស់មុនបានធ្វើកម្មសិទ្ធិនិងកាន់កាប់ហេតុម្ដេចក៏គ្មានការតវ៉ា ។
លុះពេលក្រុមហ៊ុនបានទិញដីនោះនៅឆ្នាំ២០០៧ ស្រាប់តែអ្នកមកតវ៉ាតាមផ្លូវច្បាប់របស់ភូមិបាល ក្នុងរយៈពេល១០ឆ្នាំ គឺផុតអាយុកាលនៃការតវ៉ាហើយ ។ ប៉ុន្តែក្រោយមកដោយសារតែក្រុមហ៊ុនមានសណ្ដានចិត្តមុនចូលឆ្នាំខ្មែរនៅឆ្នាំ២០១៤ នេះ ក្រុមហ៊ុនបានសុខចិត្តជួយឧបត្ថម្ភប្រាក់គោលនយោបាយឱ្យអ្នកភូមិឡពាងចំនួន៥២គ្រួសារនៅសល់បច្ចុប្បន្នចំនួនតែ១៥គ្រួសារប៉ុណ្ណោះ ដែលមេក្លោងឈ្មោះស្ងួន ញឿន និងប្រពន្ធឈ្មោះអុំ សុភី ដែលជាមនុស្សអត់មានដីសោះបានតវ៉ាដោយអត់អៀនខ្មាសសោះបានជាដោះស្រាយមិនចេញ ព្រោះពួកគេប្រមូលមកទាំងបងប្អូនជិតឆ្ងាយ ។
តំណាងក្រុមហ៊ុនបានបន្តថា ក្រោយពីដោះស្រាយគោលនយោបាយអ្នកភូមិឡពាងជិតអស់ទៅហើយ ស្រាប់តែឈ្មោះ ស្ងួន ញឿន និងប្រពន្ធ បានកែនកម្លាំងបន្ថែមទៀតពីភូមិបឹងកក់ និងភូមិសំរោង មកជាកម្លាំងតវ៉ាប្រឆាំងក្រុមហ៊ុនបន្ថែមទៀតឡើងដល់៨២គ្រួសារ ក្នុងនោះអ្នកភូមិបឹងកក់មានឈ្មោះ សៀង ហេង ជាមេខ្លោង ព្រោះសំអាងថា អ្នកភូមិឡពាងបានគោលនយោបាយដូច្នេះត្រូវតែដោះស្រាយគោលនយោបាយខ្លះដូចអ្នកភូមិឡពាងដែរ ។
ក្រោយពីបានកម្លាំងច្រើនឡើងវិញ ក្រុមនេះបានធ្វើសកម្មភាពតវ៉ាបិទផ្លូវជាតិ មកស្នងការដ្ឋាន មកសាលាខេត្តជាដើម រហូតមកដល់ក្រុងភ្នំពេញប្តឹងលោក ស៊ូ បេឌី ឱ្យជួយទៀត ដូចឱ្យលោកឌី ជួយកាន់អ្វីៗឱ្យពួកគេ… ដូច្នេះដែរ ។ ប៉ុន្តែក្រុមហ៊ុនបានប្រកាសហើយថា គឺមិនដោះស្រាយប្រាក់គោលនយោបាយឱ្យអ្នកភូមិបឹងកក់ និងអ្នកភូមិឯទៀតទេ ដែលឃើញគេបានប្រាក់ មកចង់បាននឹងគេដែរ ។ មកដល់ពេលនេះ ថ្វីបើក្រុមហ៊ុនបានទទួលសិទ្ធិពីរាជរដ្ឋាភិបាលក្នុងការអភិវឌ្ឍតំបន់សេដ្ឋកិច្ចពិសេសក៏ពិតមែន បុ៉ន្តែក្រុមហ៊ុននៅតែមានជំហរដោះស្រាយប្រាក់គោលនយោបាយឱ្យ១៥គ្រួសារក្នុងភូមិឡពាងដដែល កុំឱ្យច្រណែនគ្នា ។
តំណាងក្រុមហ៊ុនបញ្ជាក់ថា ឈ្មោះ សៀង ហេង និងឈ្មោះ ម៉ាង យ៉ាវ នៅភូមិបឹងកក់ និងភូមិសំរោង ឆ្ងាយពីភូមិឡពាង តែបានមកធ្វើសកម្មភាពនៅផ្ទះរបស់ ស្ងួន ញឿន នៅភូមិឡពាង គឺឆ្ងាយពីគ្នាជាង២គីឡូម៉ែត្រ ។ ទាំង២នាក់ជាមេខ្លោងបានដឹកនាំកម្លាំងពីភូមិបឹងកក់ មករួមជាមួយអ្នកភូមិឡពាង ១៥គ្រួសារ បានធ្វើសកម្មភាពអនាធិបតេយ្យលើថ្នល់ជាតិ និងធ្លាប់បានដុតគប់ដបសាំងមកលើសមត្ថកិច្ចទៀតផង។ មន្ត្រីនគរបាលនិយាយថា ក្នុងសំណុំរឿងជនសង្ស័យខាងលើនេះត្រូវបានចោទប្រកាន់២ករណីផ្សេងគ្នា គឺបទបង្កហិង្សាដោយចេតនា និងបទប្រើហិង្សាធ្វើឱ្យខូចខាតទ្រព្យសម្បត្តិអ្នកដទៃដោយចេតនា ។ ចំណែកបក្សពួកមួយចំនួន ក៏ត្រូវចោទប្រកាន់ដូចគ្នាដែរ បុ៉ន្តែពេលនេះពួកគេកំពុងលាក់ខ្លួនសម្ងំមិនហ៊ានចេញ ដែលមនុស្សទាំងនោះគេចពីចូលពន្ធនាគារមិនរួចឡើយ ។
គួរបញ្ជាក់ថា អ្នកភូមិឡពាងមិនមែនសុទ្ធតែអាក្រក់ទាំងអស់ទេ ។ មនុស្សអាក្រក់បំផុតមានតែក្រុមគ្រួសារសាច់ញាតិឈ្មោះ ស្ងួន ញឿន និងប្រពន្ធឈ្មោះ អុំ សុភី តែបុ៉ណ្ណោះ ដែលអ្នកភូមិ។ ក្រោយពេលប្រើអំពើហិង្សាទាំងកំរោលមកលើកម្មករសំណង់របស់ក្រុមហ៊ុន ដែលមានការអះអាងថា មានអង្គការមួយពាក់ស្លាក UN ជិះរថយន្តទៅជួយជំរុញផងនោះ ឈ្មោះ ស្ងួន ញឿន និងប្រពន្ធ បានសម្ងំលាក់ខ្លួនបាត់ឈឹងដូចចូលរូងកណ្តុរ ។ ប៉ូលិសកំពុងតាមស្វែងរកមេខ្លោងសាហាវ២នាក់ប្តីប្រពន្ធនេះថា ឱ្យតែហ៊ានអើតចេញមកឱ្យឃើញ ប្រាកដជាត្រូវចាប់វ៉ៃខ្នោះមិនខានតាមដីការបស់តុលាការ ៕
ចែករំលែកព័តមាននេះ