រាជធានីភ្នំពេញ ៖ អ្នកមានដីនៅក្នុងតំបន់អភិវឌ្ឍន៍ទីក្រុងរណបជ្រោយចង្វា ប្រមាណ៣០នាក់ជាតំណាងគ្រួសារច្រើនទៀតមិនបានមកប្រជុំ បានអះអាងថា រងការបូមដីចាក់រំលោភពីសំណាក់ក្រុមហ៊ុនវិនិយោគទុនអនិកជនកម្ពុជា (OCIC) អភិវឌ្ឍន៍ជ្រោយចង្វា មិនទាន់មានដំណោះស្រាយនោះ បានមកជួបជុំគ្នាបោះឆ្នោតជ្រើសរើសតំណាងរបស់ខ្លួនដើម្បីតវា៉ជាមួយក្រុមហ៊ុន ក្រោមការចូលរួមពីមន្ត្រីអង្គការក្រៅរដ្ឋាភិបាលមួយ ទទួលបន្ទុកផ្នែកច្បាប់នៃលេខាធិការដ្ឋានក្រុមការងារពិសេសសិទ្ធិលំនៅឋានផងដែរ ។
ការប្រមូលផ្តុំគ្នានេះ នៅវេលាម៉ោង៩និង៣០នាទីព្រឹក ថ្ងៃទី២២ កក្កដា នៅក្នុងភូមិដើមគរ សង្កាត់ជ្រោយចង្វា ខណ្ឌជ្រោយចង្វា ដោយពួកគាត់ប្រកាន់នូវជំហរដាច់ខាតមិនទទួលយកនូវការដោះស្រាយដោយមានគំនាប និងកំណត់ដោយសាលារាជធានីភ្នំពេញឡើយ គឺត្រូវតែដោះស្រាយឱ្យស្របទៅតាមទីផ្សារសេរី ទើបពួកគាត់ទទួលយកបាន ។ ទោះបីជាយ៉ាងណា ដីរាប់រយហិកតាដែលខ្លះមានប័ណ្ណកម្មសិទ្ធិ (ប្លង់រឹង) ទៅហើយនោះ ត្រូវបានក្រុមហ៊ុនបូមខ្សាច់លុបដែលខ្លះពុំទាន់បានដោះស្រាយនៅឡើយទេ ដោយចោទប្រកាន់ថាក្រុមហ៊ុនរំលោភយកឆៅតែម្តង ។
លោក ណន អូនី មន្ត្រីអង្គការមួយទទួលបន្ទុកផ្នែកច្បាប់នៃលេខាធិការដ្ឋាន ក្រុមការងារ ពិសេសសិទ្ធិលំនៅឋានបានឱ្យដឹងថា ការជួបជុំគ្នាថ្ងៃនេះដើម្បីបោះឆ្នោតជ្រើសរើសតំណាងស្របច្បាប់ ហើយតំណាងនោះមានភារកិច្ចធ្វើការតវា៉ជាមួយអាជ្ញាធរ និងក្រុមហ៊ុន ។ នៅពេលខាងមុខនេះអ្នកមានដីទាំង៣សង្កាត់ គឺសង្កាត់ជ្រោយចង្វា ព្រែកតាសេក និងព្រែកលៀប នឹងធ្វើពាក្យបណ្តឹងរួមគ្នាមួយទៅអាជ្ញាធរជាតិដោះស្រាយវិវាទដីធ្លីជាមួយក្រសួងពាក់ព័ន្ធផ្សេងៗទៀត ដើម្បីឱ្យមានការដោះស្រាយមួយសមរម្យ ។
មន្ត្រីរូបនោះបានបន្តទៀតថា ការបូមដីចាក់លុបពីសំណាក់ក្រុមហ៊ុនគឺជាការរំលោភបំពានទៅលើសិទ្ធិលំនៅឋានប្រជាពលរដ្ឋដែលមានចែងក្នុងច្បាប់រដ្ឋធម្មនុញ្ញ និងច្បាប់ដីធ្លី ។ លោកនិយាយថា ប្រជាពលរដ្ឋមានសិទ្ធិលើអចលនទ្រព្យរបស់ខ្លួន ដីលំនៅឋាននិងដីស្រែចម្ការ ។ បើសិនជាប្រជាពលរដ្ឋមិនបានលក់ទេ ក្រុមហ៊ុនគ្មានសិទ្ធិរំលោភបំពានយកនោះទេ ។ លោក ណន អូនី បានប្រកាសទៀតថា សកម្មភាពបូមខ្សាច់របស់ក្រុមហ៊ុនវិនិយោគទុនអនិកជនកម្ពុជា (OCIC) គឺជាការរំលោភសិទ្ធិឯកជនលើបុគ្គល ព្រោះមានតែរដ្ឋទេដែលអាចដកសិទ្ធិឯកជនដើម្បីយកធ្វើជាប្រយោជន៍សាធារណៈ និងបានផ្តល់សំណងជាមុន ។ ទន្ទឹមនោះលោក ណន អូនី ក៏បានសំណូមពរដល់អាជ្ញាធរ និងក្រុមហ៊ុនថា ការអភិវឌ្ឍន៍ឈរលើគោលការណ៍គោរពច្បាប់ជាមុន និងកាត់ដីភូមិចេញពីគម្រោងអភិវឌ្ឍន៍ ។
លោកថ្លែងថា ចំពោះដីស្រែចម្ការដែលបូមខ្សាច់ដាក់ ត្រូវដោះស្រាយទៅតាមទីផ្សារសេរី និងកុំឱ្យមានការប្រើហិង្សាបណ្តេញប្រជាពលរដ្ឋចេញពីលំនៅឋាន ។ ចំណែកលោក ជា សុផាត ត្រូវបានបោះឆ្នោតជាប់ដោយសម្លេងភាគច្រើនជ្រើសរើសជាប្រធានតំណាងតវា៉ បានឱ្យដឹងថា ការបោះឆ្នោតជ្រើសរើសតំណាងសហគមន៍នេះដើម្បីតវា៉ជាមួយក្រុមហ៊ុន ។ ដីរបស់គាត់មានទំហំ៥០ម៉ែត្រគុណ៨០ម៉ែត្រ ស្ថិតនៅភូមិដើមគរ សង្កាត់ជ្រោយចង្វា ដែលគាត់ទិញស្របច្បាប់នៅឆ្នាំ១៩៩២ តាំងពីស្ពានជ្រោយចង្វាមិនទាន់បានតភ្ជាប់មកម៉្លេះ ។ គាត់និយាយថា កាលដែលក្រុមហ៊ុនដោះស្រាយឱ្យ១ម៉ែត្រការ៉េ១៥ដុល្លារបែបនេះរូបគាត់ក៏ដូចអ្នកដទៃទៀតមិនអាចទទួលយកបាននោះទេ ត្រូវដោះស្រាយទៅតាមទីផ្សារសេរី ទើបពួកគេយល់ព្រម ព្រោះពេលនេះទីផ្សារសេរីក្នុង១ម៉ែត្រការ៉េមានតម្លៃ៥០០ដុល្លារ សម្រាប់ដីភូមិ និងជាង១០០ដុល្លារសម្រាប់ដីទំនាបនៅខាងក្នុងដែលជាដីស្រែចម្ការ ។
តាមការកត់សម្គាល់ អ្នកភូមិដែលបានមកជួបជុំគ្នាបោះឆ្នោតរើសប្រធាននេះ សំដែងទឹកមុខខឹងសម្បារយា៉ងខ្លាំងចំពោះការដោះស្រាយគ្មានតម្លាភាពកន្លងមក ហើយស្រាប់តែស្ងាត់ទៅវិញ ។
គួរបញ្ជាក់ថា តំបន់អភិវឌ្ឍន៍ជ្រោយចង្វា មានផ្ទៃដី៣៨៧ហិកតា ស្ថិតនៅសង្កាត់ជ្រោយចង្វា សង្កាត់ព្រែកលៀប និងសង្កាត់ព្រែកតាសេក ត្រូវបានរាជរដ្ឋាភិបាលប្រគល់សិទ្ធិឱ្យក្រុមហ៊ុនវិនិយោគទុនអនិកជនកម្ពុជា (OCIC) អភិវឌ្ឍន៍ក្រុងរណបជ្រោយចង្វា ។ នៅក្នុងការអភិវឌ្ឍន៍ទៀតសោត រាជរដ្ឋាភិបាលតម្រូវឱ្យសាលារាជធានីភ្នំពេញចេញមុខដោះស្រាយ ដោយកំណត់តម្លៃឱ្យគ្រាដំបូង១ម៉ែត្រការ៉េ៣ដុល្លារ ។ លុះក្រោយមកបានឡើងដល់១៥ដុល្លារ ជាហេតុធ្វើឱ្យម្ចាស់ដីរាប់រយគ្រួសារពុំអាចទទួលយកបាន ហើយមួយចំនួនក៏បានប្តឹងតវា៉ និងស្វែងរកកិច្ចអន្តរាគមន៍គ្រប់ច្រកទាំងអស់ ហើយលើកនេះបានជួបជុំគ្នាបោះឆ្នោតជ្រើសតំណាងដើម្បីចេញតវា៉ដោយស្របច្បាប់តតាំងជាមួយក្រុមហ៊ុនដែលបានបូមខ្សាច់រំលោភយក ។
ជួបជាមួយតំណាងក្រុមហ៊ុនតាមរយៈទូរស័ព្ទម្សិលមិញនេះបានប្រាប់កោះសន្តិភាពថា ដំណោះស្រាយផលប៉ះពាល់ទាំងឡាយជាការងាររបស់សាលារាជធានីភ្នំពេញ ។ ជាគោលការណ៍ គឺសាលារាជធានីជាអ្នកឈានមុខដោះស្រាយ ដែលក្នុងនោះខាងក្រុមហ៊ុនរង់ចាំអនុវត្តន៍តាម ដើម្បីបញ្ចប់បញ្ហាឱ្យស្របទៅតាមច្បាប់ ។ តំណាងក្រុមហ៊ុនដដែលបញ្ជាក់ថា បងប្អូនដែលមានបញ្ហាសូមចូលមកពិភាក្សាគ្នាដោះស្រាយបញ្ហារួមគ្នាដោយសន្តិវិធី នៅសាលារាជធានី ហើយក្រុមហ៊ុនក៏ចូលរួមដែរ ដើម្បីដោះស្រាយរួមគ្នា ដោយទាំងអស់គ្នាត្រូវតែគោរពតាមអាជ្ញាធរ ។ លោកថ្លែងថា ក្រុមហ៊ុនស្វាគមន៍ជានិច្ច រួមដៃជាមួយអាជ្ញាធរដោះស្រាយរាល់បញ្ហាដែលសេសសល់ជាមួយបងប្អូន ស្របទៅតាមច្បាប់ មិនអាចរំលោភគោលការណ៍ច្បាប់បានទេ ។
ក្រុមអ្នកវិភាគយល់ឃើញថា ដំណោះស្រាយរវាងម្ចាស់កម្មសិទ្ធជាមួយក្រុមហ៊ុនឯកជន ដោយមានអាជ្ញាធរជាអាជ្ញាកណ្តាលអាចដោះស្រាយបានដោយរលូន ។ ប៉ុន្តែ ប្រសិនបើមានអ្នកនយោបាយទុទិដ្ឋិណាមួយ ឬបាតដៃទី៣ចូលអុកឡុកហើយ បញ្ហាដំណោះស្រាយអាចជាប់គាំងយូរ ដូចនៅតំបន់បឹងកក់មិនខានឡើយ ព្រោះគំរូមានច្រើនមកហើយ ។
ប៉ុន្តែ មានប្រជាពលរដ្ឋខ្លះនៅជ្រោយចង្វា ដែលដីគាត់មិនប៉ះពាល់ បានសប្បាយរីករាយទៅវិញទេ បានប្រាប់កោះសន្តិភាពថា ពួកគាត់ចង់ឃើញទីក្រុងរណបផុសចេញពីវាលបឹងនេះក្នុងពេលឆាប់ៗខាងមុខ ។ ពួកគេថា បើគ្មានការអភិវឌ្ឍក៏គ្មានទីក្រុងថ្មីកើតនៅទីនេះដែរ ៕
ចែករំលែកព័តមាននេះ