ប្រធានាធិបតីចិនលោក ស៊ី ជីនពីង ដែលកំពុងបំពេញទស្សនកិច្ចផ្លូវការមួយនៅគុយបា និងមេដឹកនាំគុយបា លោករ៉ាអ៊ុល កាស្ត្រូ ថ្លែងកាលពីថ្ងៃទី២២ កក្កដា នៅទីក្រុងឡាហាវ៉ាន ថា ប្រទេសទាំង២នឹងស្ថិតជាមិត្ត និងជាដៃគូស្មោះត្រង់ ដែលមានបំណងពង្រីកកិច្ចសហប្រតិបត្តិការទៅវិញទៅមក ។
ពេលជួបពិភាក្សាជាមួយប្រធានាធិបតីគុយបា លោក រ៉ាអ៊ុល កាស្ត្រូ លោក ស៊ី ជីនពីង ថ្លែងថា យើងនឹងធ្វើឱ្យស៊ីជម្រៅដល់មិត្តភាពរបស់យើង ហើយយើងរួមសហការគ្នាដោយស្មោះត្រង់ទៅវិញទៅមក អនុវត្តកិច្ចសហប្រតិបត្តិការមានផលប្រយោជន៍ទៅវិញទៅមក ហើយជំរុញភាពជាដៃគូរបស់យើងដើម្បីធ្វើការកែទម្រង់ និងអភិវឌ្ឍ ។
លោក ស៊ី បន្តថា ចិនផ្តោតសារសំខាន់យ៉ាងធំមួយដល់មិត្តភាពជាប្រវត្តិសាស្ត្ររវាងប្រជាជាតិទាំង២ ។ ទោះបីកាលៈទេសៈអន្តរជាតិ មានការវិវត្តន៍បែបណាក្តីចិន នឹងនៅតែរក្សានយោបាយពង្រីកមិត្តភាពរយៈពេលយូរអង្វែងជាមួយគុយបា ដែរ ។ចំណែកលោក រ៉ាអ៊ូល កាស្ត្រូ វិញ គូសបញ្ជាក់ថា ទំនាក់ទំនងរបស់ប្រទេសលោក ជាមួយចិនមានលក្ខណៈល្អប្រសើរបំផុត និងថា គុយបាចង់ពង្រឹងការទាក់ទងជាមួយចិនលើគ្រប់កម្រិត ។ លោកចង់ឱ្យប្រទេសទាំង២ចែករំលែកបទពិសោធន៍គ្នាក្នុងការកសាងសង្គមនិយម ហើយរៀនសូត្រពីគ្នាក្នុងវិស័យនោះ ។នាថ្ងៃដដែលនោះ លោក ស៊ី ជីនពីង ក៏បានជួបជាមួយមេដឹកនាំបដិវត្តន៍គុយបា លោក ហ្វីដែល កាស្ត្រូ ដែរ ៕
ចែករំលែកព័តមាននេះ