រាជធានីភ្នំពេញ ៖ ក្រោយសម្រេចឱ្យលាឈប់ពីអាជីពអាជ្ញាកណ្តាល និងចៅក្រម ក្នុងវេទិកាកីឡាប្រដាល់ លោក ជ័យ ប៊ុនឈឿ ដែលត្រូវគេដឹងថាមានវ័យ៧៦ឆ្នាំទៅហើយនោះ ហាក់នៅតែអាល័យក្នុងអាជីពនេះដដែល ។ យា៉ងណាក៏ដោយ ស្ថានភាពរបស់លោកដែលមានវ័យកាន់តែចាស់ផង និងមានជំងឺប្រចាំកាយផង គឺមិនអាចឱ្យគាត់បន្តជិះម៉ូតូរាប់គីឡូតាំងពីខេត្តបាត់ដំបង មកធ្វើការនៅភ្នំពេញរាល់អាទិត្យដូចមុនទៀតបានឡើយ ។
រាជធានីភ្នំពេញ ៖ ក្រោយសម្រេចឱ្យលាឈប់ពីអាជីពអាជ្ញាកណ្តាល និងចៅក្រម ក្នុងវេទិកាកីឡាប្រដាល់ លោក ជ័យ ប៊ុនឈឿ ដែលត្រូវគេដឹងថាមានវ័យ៧៦ឆ្នាំទៅហើយនោះ ហាក់នៅតែអាល័យក្នុងអាជីពនេះដដែល ។ យា៉ងណាក៏ដោយ ស្ថានភាពរបស់លោកដែលមានវ័យកាន់តែចាស់ផង និងមានជំងឺប្រចាំកាយផង គឺមិនអាចឱ្យគាត់បន្តជិះម៉ូតូរាប់គីឡូតាំងពីខេត្តបាត់ដំបង មកធ្វើការនៅភ្នំពេញរាល់អាទិត្យដូចមុនទៀតបានឡើយ ។
លោក ជ័យ ប៊ុនឈឿ ដែលអ្នកណាក៏ស្គាល់ថា ជាអតីតកីឡាករ និងជាអាជ្ញាកណ្តាលដ៏មានប្រជាប្រិយភាព ហាក់នៅតែបង្ហាញឆន្ទៈចង់បម្រើវិស័យកីឡាប្រដាល់ដដែល ក្នុងពេលដែលលោកចូលនិវត្តន៍ទៅហើយ ហើយត្រូវទូរទស្សន៍បាយ័នបន្តផ្តល់ប្រាក់ខែឱ្យជាប្រចាំរាល់ខែ ។ លោកគឺជាអតីតអ្នកប្រដាល់ក្នុងសម័យសង្គមរាស្ត្រនិយម ដែលបានសម្រេចចិត្តឈប់ប្រដាល់ក្នុងវ័យ២៨ឆ្នាំ និងបានបោះជំហានចូលបម្រើការងារនៅក្នុងសហព័ន្ធកីឡាប្រដាល់ក្នុងតំណែងជាចៅក្រម និងអាជ្ញាកណ្តាលអស់រយៈពេល៤០ឆ្នាំ ដោយទើបតែបានលាឈប់កាលពីដើមឆ្នាំ២០១៤ ។ មុនសម្រេចចិត្តដើរចេញ លោកបានបន្សល់នូវស្នាដៃ និងកេរ្តិ៍ឈ្មោះយ៉ាងខ្លាំង ទើបធ្វើឱ្យប្រជាប្រិយភាពរបស់លោក នៅតែមានមហាជនភាគច្រើនចងចាំ ។
លោក ជ័យ ប៊ុនឈឿ បញ្ជាក់ថា ក្រោយការលាឈប់ពីអាជីពអាជ្ញាកណ្តាល បានជួយឱ្យលោកមានពេលច្រើន ដើម្បីសម្រាកក្នុងវ័យជរា ប៉ុន្តែមិនមែនជាគោលបំណងរបស់លោកនោះទេ គឺវាបានទាំងធ្វើឱ្យលោកអផ្សុក និងស្តាយស្រណោះនូវកិច្ចការងារដែលធ្លាប់បំពេញនោះផង ។ ដ្បិតតែរយៈកាលកន្លងមក លោកបានជិះម៉ូតូម្នាក់ឯង ឬឱ្យកូនប្រុសជូនមកតាំងពីផ្ទះកំណើតនៅខេត្តបាត់ដំបងមកធ្វើការនៅភ្នំពេញ ជារៀងរាល់ចុងសប្តាហ៍ ប៉ុន្តែលោកថាពេញចិត្តដោយក្នុងពេលនេះប្រសិនបើអាចបន្តបាន នឹងស្នើសុំស្ថាប័នបាយ័នចូលបម្រើការងារដូចមុនទៀតផង។ មកទល់ពេលនេះលោកនៅតែបន្តទទួលប្រាក់ខែចំនួន២០០ដុល្លារ ដូចដើមក្នុងមួយខែ បើទោះជាលោកបានលាឈប់ពីការងារទាំងស្រុងក្តី ។
ពាក់ព័ន្ធនឹងទឹកប្រាក់ចំនួន២០០ដុល្លារ ដែលជាប្រាក់ខែខាងបាយ័នផ្តល់ឱ្យនោះ ត្រូវលោកបញ្ជាក់ថា ខាងបាយ័នមិនតម្រូវឱ្យលោកជិះម៉ូតូមកទទួលដូចមុននោះទេ គឺបានផ្ញើតាមវីងក្នុងមួយអាទិត្យ៥០ដុល្លារ ដែលប្រាក់នេះវាមានតម្លៃយា៉ងខ្លាំងក្នុងការជួយសម្រួលដល់ជីវភាពរបស់លោក ក្នុងវ័យកាន់តែជរានេះ ។ អតីតអាជ្ញាកណ្តាលរូបនេះបញ្ជាក់ថា បើកុំតែបានប្រាក់ខែដែលបាយ័នផ្តល់ឱ្យប្រហែលជាលោកនឹងពិបាករស់ជាមិនខាន ក្នុងពេលដែលការចំណាយលើបញ្ហាថ្នាំសង្កូវ ក៏កើនឡើង ឯស្ថានភាពជីវភាពរបស់គ្រួសារ ក៏បានតែមួយគ្រប់មិនសល់ប្រាក់កាសជាដុំកំភួន ។
លោក នាង ស៊ីវត្ថា អ្នកគ្រប់គ្រងកម្មវិធីប្រដាល់នៅបាយ័ន មិនអាចសុំការបញ្ជាក់បានទេ ប៉ុន្តែយោងតាមមន្ត្រីដែលបម្រើការនៅទីនោះ បានអះអាងថា ករណីផ្តល់ប្រាក់ខែដល់លោក ជ័យ ប៊ុនឈឿ ក្រោយពេលលោកចូលនិវត្តន៍ មិនមែនជាគោលការណ៍ត្រូវតែផ្តល់នោះទេ ប៉ុន្តែគ្រាន់តែជាការអាណិតអាសូរ ដោយសារតែមើលឃើញថា លោកចាស់ទៅហើយ និងបានបម្រើវិស័យកីឡាប្រដាល់យូរមកហើយ ប៉ុន្តែមិនមានអ្វីសេសសល់តែប៉ុណ្ណោះ ។ មិនទាន់មានការបញ្ជាក់ថា ប្រាក់ខែផ្តល់ជូននេះ នឹងបន្តឱ្យលោកដល់រយៈពេលណានោះទេ ប៉ុន្តែលេចឮថា ប្រហែលជាកាត់ផ្តាច់នាពេលឆាប់ៗនេះ ក្នុងពេលដែលជីវភាពជាក់ស្តែងរបស់លោកត្រូវគេមើលឃើញថា ត្រូវការជំនួយក្នុងវ័យចាស់ជរាមិនអាចអត់បានបែបនេះ ៕
ចែករំលែកព័តមាននេះ