រាជធានីភ្នំពេញ ៖ កម្មវិធីប្រកួតប្រដាល់ដណ្តើមខ្សែក្រវាត់ស្រាបៀរលីអូ ក្នុងប្រភេទទម្ងន់៦០គីឡូក្រាមនៅលើសង្វៀន CTN នាថ្ងៃអាទិត្យ ទី២៧ កក្កដាខាងមុខនេះ ឈានចូលដល់សប្តាហ៍ទី២ ហើយ ។ កីឡាករដែលជាបេក្ខភាពត្រូវប្រកួតនាពេលនោះ គឺកីឡាកររឿម វណ្ណៈ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករសេក រតនា មកពីក្លិបសឹករងខេត្តសៀមរាប និងកីឡាករទេស សំខាន់ មកពីក្លិបកងពលតូចលេខ៧០ ប្រកួតជាមួយកីឡាករអុឹង បូរ៉ា មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ។
កាលពីសប្តាហ៍មុន គេបានរកឃើញកីឡាករ២រូបដែលរកបាន៣ពិន្ទុមុនគេ គឺកីឡាករថុល មករា មកពីក្លិបឃ្លាំងមឿងកីឡា និងកីឡាករង៉ែត រដ្ឋា មកពីសមាគមកីឡាប្រដាល់ក្រសួងការពារជាតិ ។ លើកនេះគេមិនទាន់ដឹងថា កីឡាកររូបណាមានសំណាងរកបាន៣ពិន្ទុជាបន្តទៀតនោះទេ ។
រវាងរឿម វណ្ណៈ និងសេក រតនា បើធ្វើការប្រៀបធៀបទៅលើបច្ចេកទេសប្រយុទ្ធ គឺរឿម វណ្ណៈ ល្អជាង ។ កីឡាកររូបនេះមានស្នៀតកែង និងជង្គង់ល្អណាស់ ឯចិត្តក៏សឿងទៀត ទើបសេក រតនា មានសង្ឃឹមតិចណាស់ក្នុងការប្រកួតលើកនេះ ។ ចំណែក ទេស សំខាន់ និងអុឹង បូរ៉ា បើគេធ្វើការប្រៀបធៀបទៅលើបច្ចេកទេសប្រកួតនៅលើសង្វៀនវិញ គឺមិនលើសគ្នាឡើយ ។
ទេស សំខាន់ មានចិត្តសឿង តែមិនសូវរហ័សក្នុងការប្រើដៃ ជើង វាយទៅលើគូប្រកួតទេ ។ រីឯ អុឹង បូរ៉ា ក៏គ្មានស្នៀតអីដែលពូកែនោះដែរ ទាំងស្នៀតកែង-ជង្គង់ និងកណ្តាប់ដៃ ពេលវាយចេញម្តងៗមានសភាពយឺតយ៉ាងខ្លាំងណាស់ តែបើហ៊ានបណ្តោយឱ្យគេវាយត្រូវច្បាស់ជាវីវរមិនខាន ដោយសារការវាយចេញនោះ ទោះបីមួយៗតែមានទម្ងន់ធ្ងន់ ល្មមឱ្យគូប្រកួតសន្លប់បាន ។ ដូច្នេះគូនេះគ្មាននរណាហ៊ានអះអាងទុកមុនពីលទ្ធផលចាញ់ឈ្នះបានឡើយ មានតែរង់ចាំមើលការប្រកួតជាក់ស្តែងបុ៉ណ្ណោះ ទើបអាចដឹងបាន ៕
ចែករំលែកព័តមាននេះ