ទន្ទឹមនឹងការនាំមុខរបស់កីឡាករអុីតាលី Vincenzo Nibali លើតារាងថិរវេលាសរុបនៅតែបន្តជាច្រើនដំណាក់ Michael Rogers បានបង្កើតប្រវត្តិសាស្ត្រមួយសម្រាប់ខ្លួនឯងក្នុង Tour de France ឆ្នាំ២០១៤ នេះដោយបានយកឈ្នះ១ដំណាក់ជាលើកដំបូង កាលពីថៃ្ងអង្គារ ទី២២ ខែកក្កដា នៅទីក្រុង Bagnères-de-Luchon ប្រទេសបារាំង ។
អ្នកជិះកង់ឱ្យក្រុម Tinkoff-Saxo រូបនេះបានបញ្ចប់ដំណាក់មានចម្ងាយផ្លូវ២៣៧,៥គីឡូម៉ែត្រ ចេញដំណើរពីទីប្រជុំជន Carcassonne ប្រទេសបារាំង ដោយប្រើអស់ថិរវេលា៦ម៉ោង៧នាទី និង១០វិនាទីនាំមុខកីឡាករម្ចាស់ផ្ទះ Thomas Voeckler ជិះឱ្យក្រុម Team Europcar ដែលបានប្រើថិរវេលាច្រើនជាង៩វិនាទី ស្មើជាមួយកីឡាករបេឡារុស Vasili Kiryienka ដែលជិះឱ្យក្រុម Team Sky ។
គួរកត់សម្គាល់ថា នេះជាជ័យជម្នះក្នុងដំណាក់លើកដំបូងក្នុងរយៈពេល១០ឆ្នាំបន្តបន្ទាប់គ្នានៃការចូលរួមក្នុង Tour de France របស់កីឡាកររូបនេះ ។ ទោះជាយ៉ាងណា សម្រាប់Rogers ជ័យជម្នះលើកនេះនៅតែមិនទាន់អាចជួយឱ្យរូបគេសន្សំពិន្ទុបានគ្រប់គ្រាន់ដើម្បីនាំមុខលើតារាងពេលវេលាសរុបបានទេ ដ្បិតកីឡាករអុីតាលី Vincenzo Nibali ដែលបានបញ្ចប់ដំណាក់នេះក្នុងលំដាប់ណាត់លេខ២០ នោះនៅតែមានសមត្ថភាពនាំមុខគេ គ្រងអាវកាក់ពណ៌លឿងជាដដែល ។
នៅលើតារាងពេលវេលាសរុបបន្ទាប់ពីឆ្លងកាត់ការប្រណាំងអស់១៦ដំណាក់មកនេះ កីឡាករ Nibali បានប្រើអស់ថិរវេលាតិចជាងគេបំផុត គឺ៧៣ម៉ោង៥នាទីនិង១៩វិនាទីនាំមុខកីឡាករអេស្ប៉ាញ Alejandro Valverde ជិះឱ្យក្រុម Movistar Team ដែលបានប្រើពេលច្រើនជាង២នាទីនិង៣៧វិនាទី ។ ចំណែកកីឡាករបារាំង Thibaut Pinot របស់ក្រុម FDJ.fr ស្ថិតនៅលំដាប់ទី៣ បន្ទាប់ពីបានប្រើថិរវេលាច្រើនជាង Nibali ៥នាទីនិង៦វិនាទី ។
សូមបញ្ជាក់ថា ការប្រណាំងកម្មវិធី Tour de France ឆ្នាំនេះមាន២១ដំណាក់ និងមានចម្ងាយផ្លូវសរុប៣៦៦៣,៥គីឡូម៉ែត្រ ។ ឯដំណាក់ទី១៧ ដែលជាដំណាក់បន្តមានចម្ងាយផ្លូវ១២៤,៥គីឡូម៉ែត្រ ដោយការប្រណាំងចាប់ចេញដំណើរពីទីប្រជុំជន Saint-Gaudens ឆ្ពោះទៅកាន់ទីប្រជុំជន Saint-Lary-Soulan Pla d’Adet ប្រទេសបារាំង ៕
ចែករំលែកព័តមាននេះ