អីុស្រាអែល កាលពីថ្ងៃទី២២ កក្កដា បន្ដវាយប្រហារលើគោលដៅជាច្រើននៅជ្រោយហ្គាហ្សា ដោយអះអាងថា បទឈប់បាញ់គ្នាមួយពុំស្ថិតក្នុងរបៀបវារៈ ខណៈអ.ស.ប និងសហរដ្ឋអាមេរិកបង្កើនការខិតខំប្រឹងប្រែងដើម្បីឱ្យទទួលបានបទឈប់បាញ់គ្នាមួយក្រោយ២សប្ដាហ៍នៃជម្លោះ ។
រដ្ឋមន្ដ្រីការបរទេសអាមេរិកលោក ចន គ័ររី បានទៅប្រទេសអេហ្សុីប ជាអ្នកបង្ហាញសំណើបទឈប់បាញ់គ្នាមួយដែលរហូតមកទល់ពេលនេះត្រូវក្រុមហាម៉ាស់បដិសេធ ចំណែកអគ្គលេខាធិការអ.ស.ប លោកបានគីមូន មកកាន់អីុស្រាអែល ។ ចំនួនអ្នកស្លាប់កាលពីថ្ងៃទី២២ កក្កដា ដោយសារការវាយប្រហាររបស់អីុស្រាអែលនៅខាន់យូណេស បេអីុតហានួន ឬបេអីុតឡាហ៊ីយ៉ា ធ្វើឱ្យចំនួនជនប៉ាឡេស្ទីនស្លាប់ឡើងដល់៦១៣នាក់ ក្នុងនោះមានកុមារ១០០នាក់ ។ នេះជាតួលេខផ្ដល់ដោយបណ្ដាអ្នកទទួលខុសត្រូវសុខាភិបាលនៅហ្គាហ្សា ។
អីុស្រាអែលនិយាយថា បានសម្លាប់យុទ្ធជនប៉ាឡេស្ទីន១៨៣នាក់ ហើយបាត់បង់ទាហានខ្លួនចំនួន២៧នាក់ គឺ៣ដងច្រើនជាងចំនួនទាហានអីុស្រាអែលស្លាប់ក្នុងការវាយលុកតាមជើងគោកលើជ្រោយហ្គាហ្សា នាពេលមុននេះ ក្នុងប្រតិបត្ដិការ PLOMB DURCI កាលពីឆ្នាំ២០០៨-២០០៩ ទៅទៀត ។
ទាហានអីុស្រាអែល២នាក់ស្លាប់រយៈពេល២៤ម៉ោងចុងក្រោយនេះ ។ ជនស៊ីវិលអីុស្រាអែល២នាក់ត្រូវស្លាប់ដោយសារការបាញ់គ្រាប់រ៉ុក្កែតរបស់ពួកប៉ាឡេស្ទីនលើដែនដីខ្លួន ។ ក្រុមហាម៉ាស់ប្រកាសថា បានបាញ់គ្រាប់រ៉ុក្កែតជាច្រើនគ្រាប់ទៀតដាក់អីុស្រាអែលពិសេសលើទីក្រុងតែលអាវីវ ហើយគ្រាប់រ៉ុក្កែត១គ្រាប់បណ្ដាលឱ្យរបួសមនុស្ស២នាក់ពេលធ្លាក់ក្នុងឃុំមួយក្បែរព្រលានយន្ដហោះអន្ដរជាតិ BEN-GOURION ៕
ចែករំលែកព័តមាននេះ