រាជធានីភ្នំពេញ ៖ Nokia XL ស៊ីមពីរ ដែលស្ថិតនៅក្នុងសែស្រឡាយ Nokia X ត្រូវបានចេញលក់នៅកម្ពុជាចាប់ពីថ្ងៃនេះតទៅហើយ ដោយផ្តល់ជូនក្នុងតម្លៃ US$168 ។ ស្របពេលជាមួយគ្នានេះ ក្រោមកិច្ចសហការរវាង Nokia និង Smart រាល់ការជាវផលិតផល Nokia សែស្រឡាយ X ពោលគឺ Nokia XL ឬ Nokia X, អតិថិជននឹងទទួលបានស៊ីមលេខពិសេសមួយ អមជាមួយនឹងកញ្ចប់សេវាកម្មអ៊ិនធើរណេត និងការហៅចេញដោយឥតគិតថ្លៃផង ។
Nokia XL មានទំហំអេក្រង់ទូលាយ (5 អ៊ីញ) កាមេរ៉ាក្រោយ 5MP ដែលភ្ជាប់មកជាមួយ Flash និងកាមេរ៉ាមុខ 2MP ។ Nokia XL មិនត្រឹមតែផ្តល់ជូនអ្នកប្រើប្រាស់នូវ Android apps តែប៉ុណ្ណោះទេ គឺថែមទាំងមានសេវាកម្ម និងកម្មវិធីដ៏ពេញនិយមជាច្រើនទៀតពី Microsoft និង Nokia ។ ក្នុងចំណោមកម្មវិធីទាំងឡាយពី Microsoft និង Nokia ក៏មាន Skype ផងដែរ ។
Nokia XL ផ្តល់ភាពងាយស្រួលបំផុតក្នុងការនិយាយជាមួយគូសន្ទនា ដោយមើលឃើញគ្នាទៅវិញទៅមកតាមវីដេអូ ។ កាមេរ៉ាមុខនៃ Nokia XL ធ្វើឱ្យអ្នកប្រើប្រាស់មើលឃើញរូបពីរនៅលើអេក្រង់ គឺរូបខ្លួនឯងផង រូបដៃគូសន្ទនាផង ។ ក្រៅពីនេះ Nokia XL នៅមានចំណុចល្អៗដ៏ច្រើនទៀត ដែលជាប្រយោជន៍សម្រាប់អ្នកប្រើប្រាស់ ។ កម្មវិធី OneDrive ដែលមានបញ្ចូលក្នុងទូរស័ព្ទមកពីនាយរួចជាស្រេច ធ្វើឱ្តអ្នកប្រើប្រាស់ចូលទៅបើកឯកសារ ឬទិន្នន័យ ឬរូបថតសំខាន់ៗនៅក្នុងឧបករណ៍អេឡិចត្រូនិកដទៃ ទៀត បានយ៉ាងងាយតាមរយៈការតភ្ជាប់ទៅនឹងប្រព័ន្ធអ៊ីនធើរណេត ។
ចំណែកការប្តូរទូរស័ព្ទចាស់មកប្រើប្រាស់ Nokia XL ក៏រឹតតែងាយស្រួលជាមួយនឹងកម្មវិធី Contacts Transfer app ។អតិថិជនអាចទាញយកកម្មវិធី Android ដ៏ច្រើនបរិបូរណ៍ពី Nokia Store ព្រោះបណ្តាកម្មវិធីទាំងនោះបានត្រូវពិសោធន៍យ៉ាងសម្រិតសម្រាំងមុននឹងដាក់ឱ្យប្រើប្រាស់ ។
លោកព្រំ រតនៈ ប្រធានផ្នែកទីផ្សារនៃប្រតិបត្តិការប្រចាំនៅកម្ពុជាបានលើកឡើងប្រកបដោយសុទិដ្ឋិនិយមថា អតិថិជនកម្ពុជាប្រាកដជាទទួលបានអត្ថប្រយោជន៍ជាច្រើនពីសេវាកម្ម និងកម្មវិធីផ្តល់ជូនដោយ Microsoft និង Nokia ហើយថែមទាំងសប្បាយរីករាយនឹងកម្មវិធី Android និងស៊ីមពិសេសពី Smart ។
លោករតនៈ ថែមទាំងបានបញ្ជាក់ទៀតថា ដោយបំពេញទៅតាមលក្ខខណ្ឌដែលបានកំណត់ អតិថិជនមិនត្រឹមតែទទួលបានលេខស៊ីមកាតពិសេសពី Smart តែមួយមុខប៉ុណ្ណោះទេ គឺថែមទាំងអាចទទួលបានអ៊ីនធើរណេត 3GB/3ខែ និងហៅទូរស័ព្ទនៅក្នុងប្រព័ន្ធរហូតដល់ 40នាទី/1ថ្ងៃ ដោយឥតគិតថ្លៃទៀតផង ។ កម្មវិធីផ្តល់ជូនបន្ថែមនេះ ក៏អនុវត្តចំពោះអតិថិជន Smart បច្ចុប្បន្ន ដែលមិនមានបំណងប្តូរលេខថ្មីដែរ ។
ចែករំលែកព័តមាននេះ