រាជធានីភ្នំពេញ ៖ ក្រុមហ៊ុនបូមខ្សាច់ជាច្រើន បូករួមជាមួយនឹងការដ្ឋានស្ថាបនាផ្លូវ និងលូលើតំបន់អភិវឌ្ឍន៍ផ្ទៃដីអតីតបឹងទំពុន បាននិងកំពុងបង្កការក្តៅក្រហាយដល់ប្រជាពលរដ្ឋ ក៏ដូចជាកម្មករ-កម្មការិនីរោងចក្រកាត់ដេរជាច្រើនលើកច្រើនសារមកហើយ ពិសេសនៅល្ងាចថ្ងៃទី២២ កក្កដា ក្រុមហ៊ុនធ្វើអាជីវកម្មទាំងនោះ បានបូមខ្សាច់ ធ្វើឲ្យទឹកលិចលង់ហៀរហូរចូលដល់បរិវេណរោងចក្រកាត់ដេរ ។
ការអភិវឌ្ឍបង្កជាបញ្ហាដល់ប្រជាពលរដ្ឋ ដោយការបូមខ្សាច់ជន់លិចជះដល់លំនៅឋាន ក៏ដូចជារោងចក្រខាងលើនេះ គឺប្រជាពលរដ្ឋតែងតវ៉ាប្តឹងផ្តល់ញឹកញាប់មកហើយ តែអាជ្ញាធរមូលដ្ឋានហាក់បីដូចជា មិនសូវអើពើចំពោះទុក្ខលំបាករបស់អ្នកស្រុកឡើយ ដោយបណ្តោយឲ្យក្រុមហ៊ុនអាជីវកម្មឯកជនជាច្រើន ធ្វើព្យុះភ្លៀងតាមទំនើងចិត្តមិនខ្វល់ពីអ្វីទាំងអស់ឲ្យតែបំពេញផលប្រយោជន៍របស់ខ្លួនគ្រប់គ្រាន់។
ទាក់ទិននឹងករណីខាងលើនេះ លោក ពេជ្រ កែវមុនី អភិបាលខណ្ឌមានជ័យ ឱ្យដឹងថា លោកក៏បានឃើញអំពីបញ្ហានេះដែរ ហើយលោកកំពុងឲ្យមន្រ្តីជំនាញ ចាត់វិធានការទៅលើក្រុមហ៊ុនអភិវឌ្ឍន៍ទាំងនោះ ធ្វើយ៉ាងណាកុំឲ្យប៉ះពាល់ដល់ការលំបាករបស់អ្នកស្រុក ។ ផ្ទុះទៅវិញ មួយរយៈកន្លងមកនេះ គេបានកត់សម្គាល់ឃើញថា មេឈ្មួញធំៗ ដែលរកស៊ីបូមខ្សាច់លុបផ្ទៃបឹងតំបន់ខាងលើ បាននិងកំពុងធ្វើអាជីវកម្មយ៉ាងសម្រុក មិនខ្វល់អំពីផលប៉ះពាល់ដល់អ្នកណាឡើយ ៕
ចែករំលែកព័តមាននេះ