មជ្ឈមណ្ឌលឧតុនិយមជាតិចិន រាយការណ៍ថា ព្យុះទីហ្វុងថ្មីឈ្មោះម៉ាតម៉ូ MATMO នឹងបោកបក់មកដល់ឆ្នេរសមុទ្រខាងកើតរបស់ចិននាថ្ងៃទី២៥ កក្កដា ក្រោយពីវាយប្រហារលើកោះតៃវ៉ាន់នាយប់ថ្ងៃទី២២ កក្កដា ។ព្យុះទីហ្វុងម៉ាតម៉ូជាព្យុះទី១០ វាយប្រហារលើប្រទេសចិននាឆ្នាំនេះ បច្ចុប្បន្នកំពុងបោកបក់ឆ្ពោះទៅភាគពាយ័ព្យក្នុងល្បឿនខ្យល់ពី២០ទៅ២៥គីឡូម៉ែត្រក្នុងមួយម៉ោង ហើយវានឹងពង្រឹងកម្លាំងថែមទៀតពេលមកដល់តៃវ៉ាន់អមដោយខ្យល់ក្នុងល្បឿន៥២គីឡូម៉ែត្រក្នុង១ម៉ោង ។
ចំណែកឯតុល្យការនៃការវាយប្រហាររបស់ព្យុះដ៏ធំឈ្មោះរ៉ាម៉ាសាន់ RAMASUN ភាសាថៃថា ព្រះអាទិទេពនៃរន្ទះវិញគិតត្រឹមថ្ងៃទី២២ កក្កដា វេលាម៉ោង៩ព្រឹកមានមនុស្សស្លាប់៤៥នាក់និងបាត់ខ្លួន២៥នាក់នៅចិន ។ យោងតាមសេចក្តីប្រកាសមួយរបស់ក្រសួងកិច្ចការស៊ីវិលចិនថា ព្យុះរ៉ាម៉ាសាន់ជាព្យុះខ្លាំងបំផុតវាយប្រហារលើភាគខាងត្បូងចិន ពុំធ្លាប់មានចាប់តាំងពី៤០ឆ្នាំមកហើយ មានខ្យល់បោកបក់និងភ្លៀងធ្លាក់ខ្លាំងបំផុតនាំឱ្យមានទឹកជំនន់ក្នុងខេត្តជាច្រើននៅភាគខាងត្បូងចិន ។ មនុស្ស១០នាក់ ស្លាប់នៅខេត្តហៃណាន់ ៩នាក់នៅខេត្តក្វាងស៊ី និង១៨នាក់ក្នុងខេត្តយុនណាន់ ។
ចំណែកនៅប្រទេសវៀតណាមវិញមនុស្សយ៉ាងតិច២៧នាក់ ស្លាប់ដោយសារទឹកជំនន់ភ្លាមៗ ការបាក់ដី ឬរន្ទះបាញ់ពេលភ្លៀងខ្លាំងដោយសារព្យុះរ៉ាម៉ាសាន់ ។ ក្នុងសេចក្តីប្រកាសមួយគណៈកម្មាធិការជាតិទទួលបន្ទុកគ្រោះមហន្តរាយធម្មជាតិវៀតណាមបញ្ជាក់ថា ភ្លៀងធ្លាក់ខ្លាំងប៉ះពាល់ ជាពិសេសដល់ភាគខាងជើងប្រទេសកាលពីចុងសប្តាហ៍កន្លងមកនេះ បានបំផ្លាញផ្ទះ៧.២០០ខ្នង និងផ្ទៃដីដាំដុះ៤.២០០ហិកតា ។
ព្យុះរ៉ាម៉ាសាន់ដំបូងវាយប្រហារលើប្រទេសហ្វ៊ីលីពីនបន្ទាប់មកលើប្រទេសចិន បណ្តាលឱ្យមនុស្សស្លាប់សរុបជាង១០០នាក់មុនពេលចុះថយកម្លាំងជាវិសម្តាពត្រូពីកាល់មួយសំដៅមកវៀតណាម ។ កាលពីឆ្នាំ២០១៣ វៀតណាមរងការវាយប្រហារដោយព្យុះចំនួន១៥ក្នុងនោះមានព្យុះហៃយ៉ាន់ ដែលបណ្តាលឱ្យមនុស្សស្លាប់សរុប៣១៣នាក់ និងបង្កការខូចខាតគិតជាប្រាក់១ពាន់លានអឺរ៉ូ៕
ចែករំលែកព័តមាននេះ