រាជធានីភ្នំពេញ ៖ កម្មកររោងចក្រស្បែកជើងយីហោ សាន់វើលស៊ូ ជាង១ពាន់នាក់ ដែលមានទីតាំងស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ នៅវេលាព្រឹកថ្ងៃទី២៣ កក្កដា បាននាំគ្នាហែក្បួនទៅកាន់សាលាខណ្ឌពោធិ៍សែនជ័យ ប្រយោជន៍ឱ្យអាជ្ញាធរជួយពន្លឿនក្នុងការដោះស្រាយនូវលក្ខខណ្ឌទាមទាររបស់ពួកគេ៧ចំណុច ។
ប្រភពពីកម្មករឱ្យដឹងថា ពួកគេធ្វើកូដកម្មជាច្រើនថ្ងៃហើយ គឺដើម្បីទាមទារលក្ខខណ្ឌការងារ៧ចំណុច ក្នុងនោះចំណុចសំខាន់មាន ១-សុំឱ្យខាងរោងចក្រដកប្រធានផ្នែកគ្រប់គ្រងជនជាតិចិនឈ្មោះ អ៊ូ ជាន់យាន ២-សុំឱ្យរោងចក្ររៀបចំឧបករណ៍សុវត្ថិភាព មានស្រាមដៃ ម៉ាស ស្បែកជើងការពារ និងសំលៀកបំពាក់ក្នុងពេលបំពេញការងារ ៣-ផ្តល់ប្រាក់ស្នាក់នៅនិងធ្វើដំណើរចំនួន១៥ដុល្លារ និង៤-សុំឱ្យរោងចក្របញ្ចប់កិច្ចសន្យាកម្មករចាស់ទាំងអស់និងបើកប្រាក់អត្ថប្រយោជន៍ផ្សេងៗជូនកម្មករ ។
សូមបញ្ជាក់ថា កម្មកររោងចក្រខាងលើ នាំគ្នាធ្វើកូដកម្មយូរមកហើយ តែថៅកែរោងចក្រហាក់ដូចជាមិនអើពើក្នុងការរកដំណោះស្រាយឱ្យកម្មករ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ